1 Samuel 29:1-11
-
Filistea runakuna Davidpi mana confiasqankumanta (1-11)
29 Filistea soldadokunan+ Afec llaqtapi juñukurqanku, Israel runakunataq Jezrelpi+ karpasqa kasharqanku pujyuq qayllanpi.
2 Filistea runakunata kamachiqkunaqa soldadokunantinmi jamusharqanku, wakinmi jamusharqan pachaj soldadokunantin, wakintaq waranqa soldadokunantin. Davidtaq runankunapiwan Akiswan+ kuska Filistea soldadokunaq qhepanta jamusharqan.
3 Chaymi Filistea soldadokunaq umallinkunaqa Akista nirqanku: “¿Imatan kay hebreo runakuna kaypi ruwashanku?”, nispa. Akistaq nirqan: “Payqa Davidmi. Rey Saulpa kamachinmi. Payqa wata masñan noqawan kashan.+ Noqawan kasqanmantapachaqa manan ima mana allintapas paypiqa tarinichu”, nispa.
4 Filistea soldadokunaq umallinkunataq phiñasqa Akista nirqanku: “¡Niy chay runata qosqayki llaqtaman kutipunanpaq!+ Amapuni noqanchiswan kuskaqa maqanakuq richunchu, rispaqa noqanchis contrapaschá jatarinman.+ Soldadonchiskunatapas reyninmanmi entreganman, chhaynapi reynin payta perdonananpaq, ¡chayqa may allinchá paypaqqa kanman!
5 Kay Davidmantamá riki Israel runakunaqa takispa tususpa nirqanku:
Saulmi waranqa runata wañuchimun,Davidtaq chunka waranqa runata,+ nispa”.
6 Chaymi Akisqa+ Davidta wajaspa nirqan: “Wiñaypaq kausaq Jehová Diospa sutinpin niyki, qanqa allin runan kanki, noqawan kasqaykimantapachaqa manan ima mana allintapas qanpiqa tarinichu.+ Chaymi noqaqa mayta munani soldadoykunawan kuska maqanakuq rinaykita,+ ichaqa wakin kamachiqkunan qanpi mana confiankuchu.+
7 Chhaynaqa kutipullay, amataq imatapas ruwaychu Filistea runakunata kamachiqkuna ama phiñakunanpaq”, nispa.
8 Chayta uyarispan Davidqa Akista nirqan: “Wiraqocháy, kayman jamusqaymantapachaqa manan noqaqa ima mana allintapas ruwarqanichu, sichus ruwarqani chayqa niway. Wiraqocháy, ¿imaraykutaq mana riyta atiymanchu qanwan kuska enemigoykikuna contra maqanakuqri?”, nispa.
9 Akistaq Davidta nirqan: “Noqapaqqa allin runapunin qanqa kanki, Diospa angelnin jina.+ Ichaqa Filistea soldadokunaq umallinkunan niwanku: Amapuni noqanchiswan kuskaqa maqanakuq richunchu, nispa.
10 Chhaynaqa qanpas qanwan jamuq runakunapas paqarin tutallamata jatariychis, jinaspa tutallamanta kutipuychis”, nispa.
11 Jinan Davidqa runankunawan kuska tutallamanta kutipurqanku Filistea runakunaq jallp’anman. Filistea soldadokunataq Jezrelman+ wicharqanku.
