1 Samuel 5:1-12
5 Filistea runakunan Israel runakunamanta qechusqanku Diospa rimanakuynin arcata+ Ebenezermanta Asdoj llaqtaman aparqanku.
2 Chaypin Filistea runakunaqa Diospa rimanakuynin arcata Dagón* idoloq+ wasinman apaykurqanku, jinaspa chay idoloq ladonman churaykurqanku.
3 Tutamantantaq illarimuyta Asdoj llaqta runakunaqa Dagonta tarirqanku Jehová Diospa rimanakuynin arcaq ñaupanpi uyanpamanta wijch’urayashaqta.+ Jinan paykunaqa oqarispanku kaqta sayachipurqanku.+
4 Qhepa p’unchaypas illarimuytan yapamanta Dagonta tarillarqankutaq uyanpamanta Jehová Diospa rimanakuynin arcaq ñaupanpi wijch’urayashaqta. Ichaqa chay kutipiqa umanpas makinkunapas wit’usqan punku jaykunapi wijch’urayashasqa, challwaman rijch’akuq partellanñan kaqlla kashasqa.
5 Chaymi kunan p’unchaykama Asdoj llaqtapi Dagonpa wasinman jaykuq runakunapas sacerdotekunapas mana saruykunkuchu maypichus Dagonpa umanta makinkunatapas tarirqanku chaytaqa.
6 Jehová Diosqa sinchitan castigarqan Asdoj llaqta runakunata, muyuriqninpi kaq llaqtakunapi runakunatapas. Llapa runakunatan hemorroides*+ onqoywan jap’ichirqan.
7 Chayta rikuspan Asdoj llaqta runakunaqa nirqanku: “Amaña Israel runakunaq Diosninpa rimanakuynin arcataqa jap’isunñachu, nishutan castigashawanchis, diosninchis Dagontapas nishutan castigashan”, nispa.
8 Jinan Filistea runakunaq llapa umallinkunata juñuspa tapurqanku: “¿Imatan ruwasunchis Israel runakunaq Diosninpa rimanakuynin arcawan?”, nispa. Paykunataq nirqanku: “Gaj+ llaqtamanyá apasun”, nispa. Jinan chay llaqtaman aparqanku.
9 Gaj llaqtaman Diospa rimanakuynin arcata aparuqtinkutaq Jehová Diosqa chay llaqtatapas sinchita castigarqan. Chay llaqtapi llapa runakunatan jatuntapas juch’uytapas hemorroides+ onqoywan jap’ichirqan.
10 Chaymi paykunaqa Diospa rimanakuynin arcata Ecrón+ llaqtamanñataq aparqanku. Chay llaqtaman Diospa rimanakuynin arcata chayachiqtinku jinataq Ecrón llaqta runakunaqa qaparirqanku: “¡Israel runakunaq Diosninpa rimanakuynin arcata aparamusqaku! ¡Kunanqa llapanchischá wañusunchis!”,+ nispa.
11 Jinan Filistea runakunaq llapa umallinkunata juñuspa nirqanku: “Orqoychis kaymanta Israel runakunaq Diosninpa rimanakuynin arcata, maymantachus apamurqankichis chayman kaqta kutichipuychis, chhaynapi noqanchispas llaqtamasinchiskunapas amaña wañunanchispaq”, nispa. Llapa llaqtantin runakunan wañunankumanta sinchi manchasqa kasharqanku. Diosqa sinchitapunin chay runakunata castigarqan.+
12 Wakinmi wañurqan, mana wañuqkunataq hemorroides onqoywan castigasqa karqanku. Chaymi chay llaqta runakunaqa yanapayta mañakurqanku, janaq pachaman uyarikuqtaraqmi wajakusharqanku.
Uraypi willakuykuna
^ Chay onqoyqa runakunaq jatun jisp’ananpin qhopokuna jina jatarin.
