1 Samuel 6:1-21
-
Filistea runakuna rimanakuy arcata Israel runakunaman kutichipusqankumanta (1-21)
6 Jehová Diospa rimanakuynin arcaqa+ qanchis killañan kasharqan Filistea runakunaq jallp’anpi.
2 Jinan Filistea runakunaqa wajachimurqanku sacerdotekunatawan watuqkunatawan,+ jinaspan tapurqanku: “¿Imatan Jehová Diospa rimanakuynin arcawan ruwasaqku? ¿Imaynatan Israelman kutichipuykuman?”, nispa.
3 Paykunataq nirqanku: “Israel runakunaq Diosnin Jehová Diospa rimanakuynin arcata kutichipuspaqa, aman jinallatachu kutichipunkichis, jucha pampachana ofrendatawanmi apachinkichis.+ Chhaynapin qhaliyankichis chhaynapitaqmi yachankichis imaraykus kunankama castigasqa kashankichis chayta”, nispa.
4 Jinan Filistea runakunaqa tapullarqankutaq: “¿Imatataq jucha pampachana ofrendapaqri apachiykuman?”, nispa. Paykunataq nirqanku: “Pisqataq Filistea runakunaq umallin+ chayqa, apachiychis qorimanta ruwasqa pisqa hemorroides qhopokunata, qorimanta ruwasqa pisqa juk’uchakunatawan, qankunapas umalliykichiskunapas kasqan castigota chaskisqaykichisrayku.
5 Chhaynaqa ruwaychis qorimanta hemorroides qhopokunata, qorimanta juk’uchakunatawan,+ chaykunan llaqtaykichista tukushan. Chaymantapas Israel runakunaq Diosninta jatunchaychis. Chayta ruwankichis chayqa yaqapaschá manaña jallp’aykichistapas, diosniykichistapas ni qankunatapas castigasunkichisñachu.+
6 Ama Egipto runakuna jina faraón* jina k’ulluqa kaychischu.+ Paykunaqa Israel runakunaq Diosnin allinta castigaqtinñan+ Israel runakunata kacharipurqanku, jinan Israel runakunaqa chaymanta lloqsimpurqanku.+
7 Chhaynaqa alistaychis juj mosoq carretata, jinallataq apamuychis uñayoq iskay wakakunata, chay wakakunaqa yugoman mana jayk’aq watasqan kanan. Jinaspa chay carretata watankichis iskaynin wakakunaman, uñankunatataq waka kanchaman kutichipunkichis.
8 Chay carretamanmi churankichis Jehová Diospa rimanakuynin arcata, chay rimanakuy arcaq ladonmantaq juj cajapi churankichis qorimanta ruwasqaykichis cosaskunata, chaytan apachinkichis jucha pampachana ofrendata jina.+ Chaymantataq chay wakakunata ñanninta qatirparinkichis,
9 ichaqa makillan qhawankichis. Sichus Bej-Semes+ llaqtaman riq ñanninta chay rimanakuy arca llaqtanman apasqa kanqa chayqa, sut’itan yachasun kay castigoqa Israel runakunaq Diosninmanta jamusqanta, manachus chayninta rinqa chaytaq yachasun mana paymantachu kay castigo kasqanta, aswanpas mana imallamanta kasqanta”, nispa.
10 Filistea runakunaqa chay runakunaq nisqanman jinan ruwarqanku. Uñayoq iskay wakakunatan apamurqanku, chay wakakunamanmi carretata watarqanku, uñankunatataq kanchanman wisq’ampurqanku.
11 Chaymantataq carreta pataman churarqanku Jehová Diospa rimanakuynin arcata, chay rimanakuy arcaq ladonmantaq juj cajapi churarqanku qorimanta ruwasqanku hemorroides qhopokunata juk’uchakunatawan.
12 Wakakunaqa Bej-Semes+ llaqtaman riq ñannintan waqaspa rectollata rirqanku, manan pañamanpas ni lloq’emanpas kutirirqankuchu. Filistea runakunaq umallinkunataq wakakunaq qhepanta qatiparqanku Bej-Semes llaqta linderokama.*
13 Bej-Semes llaqta runakunaqa chay pampakunapin trigota rutusharqanku. Chayllamanmi rikurqanku Diospa rimanakuynin arcata, chaywanmi anchata kusikurqanku.
14 Chay wakakunaqa Bej-Semes llaqtayoq Josuepa chajranmanmi carretata aysaykurqanku, chaypin juj jatun rumiq ladonpi sayaykurqanku. Chay llaqta runakunataq carretamanta llant’ata ruwaspa chay wakakunata+ Jehová Diosman jaywarqanku ruphachina ofrendata jina.
15 Leví ayllu runakunan+ Jehová Diospa rimanakuynin arcatapas qori cosaskunayoq cajatapas uraykachirqanku, jinaspa chay jatun rumi pataman churaykurqanku. Chay p’unchaymi Bej-Semes+ llaqta runakunaqa Jehová Diosman jaywarqanku ruphachina ofrendakunata juj sacrificiokunatawan.
16 Chayta rikuspan Filistea runakunaq pisqantin umallinkunaqa kikin p’unchaypacha Ecrón llaqtaman kutipurqanku.
17 Qorimanta hemorroides qhopokunatan Filistea runakunaqa jucha pampachana ofrendata jina Jehová Diospaq apachirqanku.+ Jujta Asdoj+ llaqtamanta, jujta Gaza llaqtamanta, jujta Asquelón llaqtamanta, jujta Gaj+ llaqtamanta, jujtataq Ecrón+ llaqtamanta.
18 Qorimanta juk’uchakunataq karqan jayk’a llaqtakunatachus Filisteapi pisqantin umallikuna gobiernarqanku chayman jina. (Chaypiqa yupakurqan allin perqasqa llaqtakunantinta jawa llaqtachakunantintan).
Bej-Semes llaqtayoq Josuepa chajranpi Jehová Diospa rimanakuynin arcata churaykusqanku jatun rumiqa kunankaman testigo kashan.
19 Ichaqa pisqa chunka waranqa qanchis chunka* Bej-Semes llaqta qharikunatan Jehová Diosqa wañuchirqan rimanakuynin arcata qhawaykusqankurayku, jinan llapa llaqtantin runakuna paykunamanta khuyayta waqaykurqanku. Jehová Diosqa askhatapunin chay llaqta runakunata wañuchirqan.+
20 Chaymi Bej-Semes llaqta runakunaqa ninakurqanku: “¿Pitaq kay ch’uya Diospa+ ñaupanpi kaytari atinman? ¿Pin Jehová Diospa ñaupanpi kayta atinman? ¿Maymanpunitaq apachisunman Diospa rimanakuynin arcatari?”,*+ nispa.
21 Jinan Quiryaj-Jearin+ llaqtapi runakunaman willachimurqanku: “Filistea runakunan Jehová Diospa rimanakuynin arcata kutichimpusqaku, jaykumuspa apapuychis”,+ nispa.
Uraypi willakuykuna
^ Egipto reykunatan “faraón” nispa niqku.
^ Linderotaqa “colinda, qorpa” nillankutaqmi.
^ Hebreo rimaypiqa “qanchis chunka, pisqa chunka waranqa” ninmi.
^ Hebreo rimaypiqa “¿Maymantaq rinqa kaymantari?” ninmi.
