1 Tesalonicenses 5:1-28
5 Wayqeykuna,* tiempokunamanta señalasqa p’unchaykunamantawanqa manan imatapas qelqamunayraqchu.
2 Qankunaqa allintamá yachankichis Jehová* Diospa p’unchayninqa+ imaynan suwapas tutalla jamun chhaynata chayamunanta.+
3 Runakunan nishanqaku: “¡Kunanmantaqa thajmi kasunchis, allin waqaychasqan kasunchis!”, nispa; chayllamanmi qonqaylla ch’usaqyachisqa kanqaku,+ imaynan onqoq warmitapas qonqaylla nanay jap’in chhaynata, paykunaqa manapunin maymanpas ayqekuyta atinqakuchu.
4 Wayqeykuna,* qankunaqa manan laqhayaqpichu* kashankichis, chhaynaqa manan p’unchayqa suwata jinachu jap’isunkichis.
5 Qankunaqa llapaykichispas k’anchaypi kaqkuna, p’unchaypi kaqkunan kankichis.+ Noqanchisqa manan ni tutayaqmantachu ni laqhayaqmantachu kanchis.+
6 Chhaynaqa, amaña wakin runakuna jinaqa puñukushasunchu,+ aswanpas rijch’asqalla kashasun,+ yuyayninchispitaq kashasunpas.+
7 Puñuqkunaqa tutapin puñunku, machaqkunapas tutapin machanku;+
8 ichaqa noqanchis p’unchaymanta kaqkunaqa yuyayninchispi kashasun, qhasqo* jark’anawan jina iñiyta munakuytawan churakusun, salvasqa kananchis suyakuywanpas cascowan jina churakusun.+
9 Diosqa manan castigasqa kananchispaqchu ajllawarqanchis, aswanpas Señorninchis Jesucristowan salvasqa kananchispaqmi.+
10 Paymi noqanchisrayku wañurqan,+ chhaynapi rijch’ashasunmanña puñushasunmanña chaypas,* paywan kuska kausananchispaq.+
11 Chayrayku imaynan ruwashankichis jinata qankunapura sonqochanakushaychis kallpachanakushaychis.+
12 Wayqeykuna,* valekuykikun qankuna ukhupi tukuy kallpankuwan llank’aqkunata respetanaykichispaq, paykunan Señorpa llank’ananpi umallishasunkichis yuyaychashasunkichispas.
13 Arí, chhayna llank’asqankumanta paykunataqa munakuywan allintapuni rikuychis;+ qankunapurapas sumaqta kausaychis.+
14 Chaymantapas, wayqeykuna,* kallpachaykikun mana kasukuqkunata anyanaykichispaq,+ llakisqakunata* sumaqta rimapayaspa kallpachanaykichispaq, pisipaqkunatapas yanapanaykichispaqwan; chaymantapas lliuwan pacienciakuq kaychis.+
15 Amapuni mayqenniykichispas mana allinmantaqa mana allinllawantaq kutichichunchu,+ aswanpas jujkuna-jujkunapaq allin kaqllatapuni ruwaychis, chhaynatapuni ruwaychis lliu runapaqpas.+
16 Kusisqallapuni kashaychis.+
17 Tukuy tiempo Diosmantaqa mañakushallaychispuni.+
18 Tukuy imamanta graciastapas qoshallaychispuni,+ chaykuna ruwanaykichistan Diosqa munan Cristo Jesuspa discipulon kasqaykichisrayku.
19 Amapuni munaychischu Diospa espiritun qankunapi nina jina chiriyapunantaqa,+
20 ama pisichaychischu profeciakunatapas.+
21 Allinta t’aqwiychis tukuy imapas allinchus kashan icha manachus chayta,+ jinaspa imachus allin kaqtapuni ruwaychis.
22 Tukuy mana allin kaqmanta karunchakuychis.+
23 Thaj kayta qoq Diosmantan mañakuni paypaq t’aqanasuykichispaq, jinallataq espirituykichis, almaykichis,* cuerpoykichispas allin waqaychasqa kananpaq, arí, Señorninchis Jesucristoq chayamusqan tiempopi* mana juchachana tukuy imapipas allin kananpaq.+
24 Wajasuqniykichis Diosqa junt’aqmi; payqa junt’anqapunin chayta.
25 Wayqeykuna,* noqaykupaqpas Diosmanta mañapushallawayku.+
26 Llapa iñiqmasikunata ch’uya much’aywan napaykuychis.
27 Señorpa sutinpin kamachiykichis kay cartata llapa iñiqmasikunaman leekunanpaq.+
28 Qankunawan kachun Señorninchis Jesucristoq ancha sumaq sonqo kaynin.
Uraypi willakuykuna
^ Mayninpiqa warmipaq qharipaqwanmi Bibliapiqa “wayqeykuna” nispa nin.
^ Qhaway “Astawan yachanapaq A5” nisqata.
^ Mayninpiqa warmipaq qharipaqwanmi Bibliapiqa “wayqeykuna” nispa nin.
^ Laqhayaqtaqa “tutayaq” nillankutaqmi.
^ Qhasqotaqa “pecho” nillankutaqmi.
^ Chaypiqa “wañusqaña kashasunman chaypas” nillanmantaqmi.
^ Mayninpiqa warmipaq qharipaqwanmi Bibliapiqa “wayqeykuna” nispa nin.
^ Mayninpiqa warmipaq qharipaqwanmi Bibliapiqa “wayqeykuna” nispa nin.
^ Chaypiqa “pisipasqa kaqkunata” nillanmantaqmi. Griego rimaypiqa “pisi almayoqkunata” ninmi.
^ Qhaway Explicasqa simikuna nisqapi “Cristoq chayamusqan tiempo” nisqata.
^ Mayninpiqa warmipaq qharipaqwanmi Bibliapiqa “wayqeykuna” nispa nin.
