2 Crónicas 11:1-23
11 Rehoboammi Jerusalenman chayaspa usqhaylla juñurqan Judá ayllumanta Benjamín ayllumantawan+ pachaj pusaq chunka waranqa allin maqanakuq* soldadokunata. Chay soldadokunatan Rehoboamqa juñurqan Israel runakunawan maqanakunanpaq, chhaynapi paylla lliuta kamachinanpaq.+
2 Chay qhepamanmi Jehová Diosqa profeta* Semayata+ nirqan:
3 “Salomonpa churin Judá ayllupi kamachikuq Rehoboamta, Judá ayllupi tiyaq Israel runakunata, Benjamín ayllupi tiyaq Israel runakunatawan khaynata nimuy:
4 Jehová Diosmi nin: Ama wayqeykichis Israel runakunawanqa maqanakuq riychischu. Sapankaykichis wasiykichisman kutipuychis, noqaq munayniypin kaykunaqa pasashan,+ nispa”. Chaymi paykunaqa Jehová Diospa nisqanta kasukuspa manaña Jeroboán contra maqanakuq rirqankuñachu, aswanpas wasinkuman kutipurqanku.
5 Chaymantataq Rehoboamqa Jerusalén llaqtapi tiyapurqan, lliu Judá ayllupitaq allin perqayoq llaqtakunata jatarichirqan.
6 Kay llaqtakunatan payqa aswan allinta jatarichirqan: Belén llaqtata,+ Etan llaqtata, Tecoa llaqtata,+
7 Bej-Zur llaqtata, Socó llaqtata,+ Adulan llaqtata,+
8 Gaj llaqtata,+ Maresá llaqtata, Zif llaqtata,+
9 Adorain llaqtata, Lakís llaqtata,+ Azecá llaqtata,+
10 Zorá llaqtata, Ayalón llaqtata,+ Hebrón llaqtatawan.+ Chay llaqtakunatan Rehoboamqa Judá ayllupi Benjamín ayllupi aswan allinta jatarichirqan.
11 Chaymantapas Rehoboamqa allin perqayoq llaqtakunamanmi soldadokunaq umallinkunata kacharqan. Chay llaqtakunamanmi aswan askhata apachirqan mijuykunata, aceiteta, vinotapas.
12 Apachillarqantaqmi jark’apakunapaq jatun escudokunatapas lanzakunatapas, chhaynapi chay llaqtakuna allin preparasqa kanankupaq. Chhaynapin Rehoboamqa Judá ayllutapas Benjamín ayllutapas kamachishallarqan.
13 Lliu Israel ayllukunapi kaq sacerdotekunapas Leví ayllu runakunapas jallp’ankuta saqespan Rehoboamta yanapaq ripurqanku.
14 Leví ayllu runakunataqa Jeroboanmi churinkunapiwan Jehová Diospa sacerdoten kasqankumanta qarqopurqanku,+ chaymi paykunaqa uywa michinanku campokunatapas jallp’ankutapas saqespa+ Judá ayllupi kaq Jerusalén llaqtaman ripurqanku.
15 Chay qhepamanmi Jeroboanqa juj sacerdotekunata ajllakurqan yupaychana patakunapi* servinankupaq,+ cabraman rijch’akuq idolokunata,*+ ruwasqan torillokunatawan yupaychanankupaq.+
16 Israel ayllukunapi kaq wakin runakunan ichaqa Jehová Diosta tukuy sonqowan maskharqanku, chaymi paykunaqa sacerdotekunata Leví ayllu runakunata qatikamurqanku Jerusalén llaqtaman, chhaynapi ñaupa taytankuq Diosnin Jehová Diosman sacrificiokunata jaywanankupaq.+
17 Kinsa watan chay runakunaqa Salomonpa churin Rehoboamta yanaparqanku Judá ayllupi kamachikuynin allin tajyasqa kananpaq. Paykunaqa kinsa watan David jina Salomón jina Diosta kasukuspa kausarqanku.
18 Chaymantataq Rehoboamqa casarakurqan Jerimojpa ususin Majalajwan, Jerimojqa Davidpa churinmi karqan. Majalajpa mamanmi karqan Abijail, Abijailpa papantaq karqan Eliab, Eliabpa papantaq karqan Jesé.+
19 Tiempowantaq Majalajqa Rehoboampaq onqokurqan Jeusta, Semariasta, Zajantawan.
20 Chaymantataq Rehoboamqa Absalonpa+ nietan Macawan casarakurqan. Tiempowanmi paypas Rehoboampaq onqokurqan Abiasta,+ Ataita, Zizata, Selomijtawan.
21 Rehoboampa esposankunan karqan chunka pusaqniyoq, tiyaqmasin warminkunataq* karqan soqta chunka, churinkunataq karqan iskay chunka pusaqniyoq, ususinkunataq karqan soqta chunka. Rehoboamqa llapa esposankunamantapas llapa tiyaqmasin warminkunamantapas Absalonpa nietan Macatan astawanqa munakurqan.+
22 Rehoboammi munarqan qhepaman churin Abías rey kananta, chaymi Macapa churin Abiasta llapa churinkunata umallinanpaq churarqan.
23 Payqa allinta yuyaykuspan wakin churinkunata kachapurqan Judá ayllupi Benjamín ayllupi kaq allin perqasqa llaqtakunaman.+ Jinaspapas chay churinkunamanqa askha mijuykunatan qorqan, esposakunatapas askhatan paykunapaqqa maskhapurqan.
Uraypi willakuykuna
^ Hebreo rimaypiqa “ajllasqa” ninmi.
^ Hebreo rimaypiqa “cheqaq Diospa runan” ninmi.
^ Hebreo rimaypiqa “alto patakunapi” ninmi. Qhaway Explicasqa simikuna nisqapi “Yupaychana patakuna” nisqata.
^ Chaypiqa “cabraman rijch’akuq supaykunata” nillanmantaqmi.
^ Tiyaqmasi warmikunaqa esposakuna jinan karqanku. Qhaway Explicasqa simikuna nisqapi “Tiyaqmasi warmi” nisqata.
