2 Crónicas 21:1-20
21 Chaymantataq Jehosafatqa ñaupa taytankuna jina wañukapurqan, jinaspa ñaupa taytankunawan kuskata Davidpa Llaqtan nisqapi p’ampapurqanku. Chay qhepamantaq churin Jehoram+ rey kapurqan.
2 Jehorampa wayqenkunataq karqan: Azarías, Jeyel, Zacarías, Azarías, Miguel, Sefatiaspiwan. Llapa chaykunan karqanku rey Jehosafatpa churinkuna.
3 Chay churinkunamanmi Jehosafatqa qolqemanta qorimanta regalokunata qorqan, qollarqantaqmi valorniyoq cosaskunata, Judá ayllupi kaq allin perqasqa llaqtakunatapas.+ Jehoramtan+ ichaqa phiwi* churin kasqanrayku paypa rantinpi kamachikunanpaq churarqan.
4 Taytanpa rantinpi kamachikuyta qallarispa jinan Jehoramqa espadawan wañuchirqan llapa wayqenkunata+ Israelpi wakin autoridadkunatawan, chhaynapin kamachikuyninqa allin tajyasqa kapurqan.
5 Jehoramqa kinsa chunka iskayniyoq watanpi kashaspan kamachikuyta qallarirqan, pusaq watataq Jerusalenmanta kamachirqan.+
6 Payqa Ajabpa ususinwanmi casarakurqan,+ chaymi Ajabpa familian jina Jehová Diospa cheqnisqan ruwaykunata ruwarqan, chhaynapin paypas Israel reykuna jina Diospa cheqnisqan ruwaykunata ruwarqan.+
7 Jehová Diosmi ichaqa Davidwan rimanakusqanrayku Davidpa familianta mana chinkachiyta munarqanchu.+ Paymi Davidman prometerqan familianmanta runakunallapuni wiñaypaq kamachikunanta.*+
8 Jehorampa kamachikusqan tiempopin Edom runakuna Judá ayllu contra jatarirqanku,+ jinan Edom runakunaqa paykunalla juj reyta ajllakurqanku.+
9 Chaymi Jehoramqa soldadonkunaq umallinkunapiwan llapa carretankunapiwan Edomman rirqan. Chaypi kashaqtinmi Edom runakunaqa Jehoramtawan carretakunaq comandantenkunatawan muyuykurqanku, Jehorammi ichaqa juj tuta jatarispa chay Edom runakunata atiparqan.
10 Chaywanpas kunan p’unchaykaman Edom runakunaqa Judá ayllu contrallapuni kashanku. Chay p’unchaykunapin Lifná llaqta+ runakunapas Judá ayllu contra jatarillarqankutaq. Chhaynatan Jehoram contra jatarirqanku ñaupa taytankunaq Diosnin Jehová Diosta saqepusqanrayku.+
11 Chaymantapas Jehoramqa Judá ayllupi kaq orqo patakunapin yupaychana patakunata* ruwachirqan,+ chhaynapi Jerusalén llaqta runakuna juj dioskunata yupaychaspa Diosta wasanchanankupaq. Chhaynatan Jehoramqa Judá ayllu runakunata Diosmanta t’aqarqan.
12 Chay qhepamantaq profeta Eliasqa+ juj willakuyta Jehoramman qelqamurqan, chaypin nirqan: “Ñaupa taytayki Davidpa Diosnin Jehová Diosmi kayta nisunki: Qanqa manan taytayki Jehosafat+ jinachu ruwarqanki, nitaq Judá rey Asá+ jinapaschu.
13 Aswanpas Israel reykuna jinan mana allinkunata ruwarqanki,+ jinan Judá ayllu runakunatapas Jerusalén llaqtapi tiyaq runakunatapas tanqarqanki Diosta wasanchaspa juj dioskunata yupaychanankupaq,+ imaynan Ajabpa familiankuna juj dioskunata yupaycharqanku jinata.+ Chaymantapas taytaykiq wasinpi kaq wayqeykikunatan wañuchirqanki,+ paykunaqa qanmanta aswan allin runakunan karqanku.
14 Chaymi kunan Jehová Diosqa sasachakuykunata apamunqa llaqtayki runakuna contra, churiykikuna contra, esposaykikuna contra, llapa kaqniykikuna contra ima.
15 Qanpas imaymana onqoykunawanmi ñak’arinki. Ch’unchulniykimantan onqopunki, p’unchaykunaq pasasqanman jinataq astawanraq onqopunki, ch’unchulniykipas lloqsimunankamaraq, nispa”.
16 Jinan Jehoram contra jatarirqanku Filistea runakunapas+ Etiopía runakunaq ladonpi tiyaq Arabia runakunapas.+ Chaykunaqa pasarqan Jehová Diospa munayninpin.+
17 Chay runakunaqa Judá aylluman chayamuspan paykunata atiparqanku, jinan apapurqanku reypa wasinpi* kaq imaymana kaqninkunata,+ churinkunata, esposankunata ima; sullk’a churin Jehoacazllatañan*+ manaqa aparqankuchu.
18 Chaykuna qhepamanmi Jehoramqa Jehová Diospa munayninpi ch’unchulninmanta onqopurqan, chay onqoyqa mana jampiy atiymi karqan.+
19 Iskay wata qhepamantaq Jehorampa ch’unchulninqa lloqsipurqan onqosqanrayku, chhaynapin payqa sinchita ñak’arispa wañupurqan. Jehoram wañupuqtinqa manan ima inciensotapas paypa sutinpi kanarqankuchu, imaynan ñaupa taytankunapaq ruwarqanku jinataqa.+
20 Jehoramqa kinsa chunka iskayniyoq watanpi kashaspan kamachikuyta qallarirqan, pusaq watataq Jerusalenmanta Judá aylluta kamachirqan. Jehoram wañupuqtinqa manan pipas waqarqanchu. Jinan p’ampapurqanku Davidpa Llaqtan+ nisqapi, ichaqa manan reykunaq sepulturanpichu p’amparqanku.+
Uraypi willakuykuna
^ Hebreo rimaypiqa “paymanpas churinkunamanpas wiñaypaq lamparata qonanta” ninmi.
^ Hebreo rimaypiqa “alto patakunata” ninmi. Qhaway Explicasqa simikuna nisqapi “Yupaychana patakuna” nisqata.
^ Chaypiqa “palacionpi” nillanmantaqmi.
^ Paytaqa “Ocozías” nikullantaqmi.
