2 Crónicas 29:1-36
29 Ezequiasqa+ iskay chunka pisqayoq watanpi kashaspan rey kapurqan, iskay chunka isqonniyoq watataqmi Jerusalenmanta kamachikurqan. Paypa mamanmi karqan Zacariaspa+ ususin Abías.
2 Ezequiasqa ñaupa taytan David+ jinan Jehová Diospa munasqanman jina ruwarqan.+
3 Ezequiasqa kamachikuyta qallarisqan watapin ñaupaq kaq killapi Jehová Diospa wasinta jujmanta kicharqan, jinaspa allichayta qallarirqan.+
4 Chaymantataq sacerdotekunata Leví runakunatawan wajachirqan, jinaspa paykunata juñurqan inti lloqsimuy lado plazapi.
5 Chaypin paykunata nirqan: “Leví runakuna, uyariwaychis. Ch’uyanchakuychis,+ ñaupa taytaykichispa Diosnin Jehová Diospa wasintapas ch’uyanchaychis. Jinaspapas Diospa wasinmanta llapa idolokunata orqoychis.+
6 Taytanchiskunaqa manan tukuy sonqowanchu Jehová Diosta servirqanku, aswanpas Diospa cheqnisqan ruwaykunatan ruwarqanku.+ Paykunaqa Jehová Diostan saqepurqanku, ch’uya karpantapas manan yuyarirqankuchu.+
7 Temploq punkunkunatapas wisq’apurqankun,+ mecherokunatapas* wañuchipurqankun,+ inciensokunatapas manañan q’apachirqankuñachu,+ ruphachina sacrificiokunatapas+ Israelpa Diosninmanqa manañan ch’uya cheqaspiqa jaywarqankuñachu.
8 Chaymi Jehová Diosqa sinchita phiñakurqan Judá runakunapaq Jerusalén llaqtapi tiyaq runakunapaqpas,+ jinan paykunata p’enqayta ñak’arichirqan. Chaymi paykunata rikuq runakunaqa wakin mancharikurqanku, wakin muspharqanku, wakintaq asipayarqanku. Chaytaqa qankuna kikiykichispunin rikurqankichis.+
9 Chaymi ñaupa taytanchiskunaqa wañuchisqa karqanku,+ esposanchiskunapas wawanchiskunapas preso apasqa karqanku.+
10 Chaymi noqaqa tukuy sonqomanta munashani Israelpa Diosnin Jehová Dioswan rimanakuyta,+ chhaynapi amaña noqanchiswan phiñasqa kananpaq.
11 Chayrayku wawallaykuna, ama jinallaqa kaychischu, kallpachakuychis, qankunatan Jehová Diosqa ajllarqasunkichis ñaupanpi payta servinaykichispaq,+ sacrificiokunatapas q’osñichinaykichispaq”,+ nispa.
12 Chayta niqtin jinan Leví runakunaqa llank’ayta qallarirqanku. Cohatpa+ mirayninmantan karqanku: Amasaipa churin Májaj, Azariaspa churin Joelpiwan; Meraripa+ mirayninmantataq karqanku: Afdipa churin Quis, Jealelelpa churin Azariaspiwan; Guersonpa+ mirayninmantataq karqanku: Zimapa churin Joá, Joapa churin Edenpiwan;
13 Elizafanpa mirayninmantataq karqanku: Sinriwan Jeuelpiwan; Asafpa+ mirayninmantataq karqanku: Zacariaswan Mataniaspiwan;
14 Emanpa+ mirayninmantataq karqanku: Jeyelwan Simeipiwan; Jedutunpa+ mirayninmantataq karqanku: Semayawan Uzielpiwan.
15 Paykunan wayqenkuta juñumurqanku jinaspa ch’uyanchakurqanku, Jehová Diospa kamachisqanman jinataq reypa kamachisqanman jinataq Jehová Diospa wasinta ch’uyancharqanku.+
16 Chaymantataq sacerdotekunaqa Jehová Diospa wasinman jaykurqanku ch’uyanchanankupaq, jinan Jehová Diospa wasinpi tarirqanku idolokunata, chaykunatataq Jehová Diospa wasinpa pationman orqomurqanku.+ Leví runakunataq sacerdotekunaq orqomusqanku idolokunata Cedrón wayq’oman+ aparqanku.
17 Chhaynatan Diospa wasinta ch’uyanchayta qallarirqanku ñaupaq kaq killapi ñaupaq kaq p’unchaypi; pusaq kaq p’unchaypaqtaq Jehová Diospa wasin punkumanña ch’uyanchaspa chayarqanku.+ Jehová Diospa wasintaqa pusaq p’unchaytawanmi ch’uyancharqanku, chaymi chay killapi chunka soqtayoq p’unchaypi tukurqanku.
18 Chaymantataq sacerdotekunaqa rey Ezequiaspa kasqanman jaykurqanku, jinaspan nirqanku: “Jehová Diospa wasintaqa llapantan ch’uyancharamuyku; ofrenda ruphachina altartapas,+ Diosman jaywana t’anta* churana mesatapas,+ llapa serviciokunatapas+ ch’uyancharamuykun.
19 Chaymantapas rey Ajazpa apasqan serviciokunatan llapanta ch’uyancharamuyku,+ chaykunatan payqa aparqan Diosta saqepusqan tiempopi.+ Chay serviciokunapas kunanqa llapanmi kashan Jehová Diospa altarninpa ñaupanpi”, nispa.
20 Rey Ezequiastaq tutallamanta jatarispa llaqtapi umallikunata juñurqan, jinaspa Jehová Diospa wasinman rirqanku.
21 Paykunan aparqanku jucha pampachana ofrendapaq qanchis torokunata, qanchis carnerokunata, qanchis malta orqo ovejakunata, qanchis orqo cabrakunatawan. Chay ofrendakunatan jaywananku karqan reypaq, templopaq, llapa Judá ayllu runakunapaqwan.+ Chaymi Ezequiasqa Aaronpa mirayninmanta kaq sacerdotekunata nirqan Jehová Diospa altarninpi chay ofrendakunata jaywanankupaq.
22 Jinan sacerdotekunaqa torokunata ñak’arqanku,+ yawarninwantaq altarta ch’aqchurqanku.+ Chaymantataq carnerokunata malta orqo ovejakunatawan ñak’arqanku, yawarninwantaq altarta ch’aqchurqanku.
23 Chaymantataq sacerdotekunaqa reypa ñaupanman llapa runakunaq ñaupanman aparqanku jucha pampachana ofrendapaq orqo cabrakunata, chay cabrakunaq umanmantaq makinkuta churarqanku.
24 Jinan sacerdotekunaqa chay cabrakunata ñak’arqanku, jinaspan chay cabrakunata jaywarqanku jucha pampachana ofrendapaq, yawarnintataq altar patapi ch’aqchurqanku llapa Israel runakunaq juchan pampachasqa kananpaq. Chaytan reypa kamachikusqanrayku ruwarqanku, paymi kamachikurqan ruphachina ofrendatapas jucha pampachana ofrendatapas llapa Israel runakunarayku jaywakunanpaq.
25 Rey Ezequiastaq Leví runakunata kamachirqan Jehová Diospa wasinman rinankupaq, jinan paykunaqa rirqanku platillokunantin, cuerdayoq tocanakunantin, arpakunantin ima;+ chaytan ruwarqanku Davidpa kamachikusqanman jina,+ Diospa rikuchisqanta reyman willaq Gadpa kamachikusqanman jina,+ profeta Natanpa kamachikusqanman jina.+ Chay kamachikuykunataqa Jehová Diosmi profetankunawan willachirqan.
26 Jinan Leví runakunaqa chaypi kasharqanku Davidpa ruwasqan tocanakunantin, sacerdotekunataq trompetantinkama kasharqanku.+
27 Jinan Ezequiasqa kamachirqan ruphachina sacrificiokunata altarpi jaywanankupaq.+ Ruphachina ofrendata jaywayta qallariqtinkutaq Jehová Diosman takiyta qallarirqanku, Israel rey Davidpa ruwachisqan tocanakunatapas tocayta qallarirqanku, trompeta tocaqkunataq paykunata qatikurqanku.
28 Llapa runakunataq k’umuykurqanku trompetakunata tocashaqtinku takishaqtinku ima. Chaytan ruwarqanku ruphachina ofrendata jaywayta tukunankukama.
29 Ofrendakunata jaywayta tukuqtinku jinataq, reypas paywan kashaq llapa runakunapas qonqorikuspa pampakama k’umuykurqanku.
30 Rey Ezequiaswan Judá ayllupi umallikunawantaq Leví runakunata nirqanku takispa Jehová Diosta jatunchanankupaq, paykunatan nirqanku Davidpa takinta+ Asafpa takintawan+ takinankupaq (Asafqa Diospa rikuchisqanta willaq runan karqan). Jinan paykunaqa ancha kusisqa Diosta jatuncharqanku, qonqorikuspataq pampakama k’umuykurqanku.
31 Chaymantataq Ezequiasqa paykunata nirqan: “Qankunaqa Jehová Diosta servinaykichispaqmi kunanqa t’aqasqa kashankichis, chayrayku Jehová Diospa wasinman jamuychis, sacrificiokunata apamuychis, graciasta qonapaq ofrendakunatapas apamuychis”, nispa. Jinan runakunaqa apamuyta qallarirqanku graciasta qonapaq ofrendakunata, sacrificiokunata ima; wakin runakunataq tukuy sonqomanta ruphachina ofrendakunata apamurqanku.+
32 Ruphachina ofrenda apamusqankun karqan qanchis chunka wakakuna, pachaj carnerokuna, iskay pachaj malta orqo ovejakuna ima. Llapa chay ruphachina ofrendakunan karqan Jehová Diosman jaywanankupaq.+
33 Ch’uya ofrendakunataq karqan soqta pachaj wakakuna kinsa waranqa ovejakunapiwan.
34 Chay uywakunata ch’utinankupaqmi ichaqa pisilla karqanku sacerdotekunaqa, chaymi Leví runakunaqa paykunata yanaparqanku+ tukunankukama, sacerdotekunapas ch’uyanchakuyta tukunankukama.+ Sacerdotekunamantaqa Leví runakunan tukuy sonqomanta usqhaylla ch’uyanchakurqanku.
35 Chaymantapas askhan kallarqantaq ruphachina ofrendakunaqa,+ jinallataq sumaq kausay sacrificiopi jaywanankupaq wirakunapas,+ ruphachina ofrendapaq vino ofrendakunapas.+ Chhaynatan sacerdotekunapas Leví runakunapas Jehová Diospa wasinpi jujmanta llank’ayta qallarirqanku.
36 Ezequiaspas llapa runakunapas anchatan kusikurqanku chaykunata Dios ruwasqanrayku.+ Chaykunaqa pisi tiempollapin ruwakurqan, chaymi ancha kusisqa kasharqanku.
Uraypi willakuykuna
^ Chaypiqa “lamparakunatapas” nillanmantaqmi.
^ Chaypiqa Diospaq t’aqasqa t’antamantan rimashan.
