2 Crónicas 30:1-27
-
Ezequías Pascua Fiestata ruwasqanmanta (1-27)
30 Rey Ezequiasmi llapa Israel runakunaman Judá ayllupi tiyaq runakunamanwan willaqkunata kacharqan,+ Efraín ayllu runakunamanpas Manasés ayllu+ runakunamanpas cartatan qelqarqan. Paykunamanmi willachimurqan Jerusalén llaqtapi kaq Jehová Diospa wasinman jamunankupaq, jinaspa Israelpa Diosnin Jehová Diospaq Pascua Fiestata ruwanankupaq.+
2 Reywan, umallikunawan, Jerusalenpi tiyaq llapa runakunapiwanmi ichaqa rimanakurqanku iskay kaq killapi Pascua Fiestata ruwanankupaq.+
3 Ñaupaq kaq killapiqa pisi sacerdotekunallan ch’uyanchakurqanku,+ Israel runakunapas manan Jerusalén llaqtapiqa juñukurqankuchu, chaymi paykunaqa mana atirqankuchu chay killapi Pascua Fiesta ruwayta.+
4 Chay killapi ruwanankupaq rimanakusqankuqa allinmi karqan reypaqpas llapa runakunapaqpas.
5 Jinan chay rimanakusqankuta llapa Israel runakunaman willachimurqanku Ber-Sebamanta Dankama.+ Chhaynapi llapa runakuna Jerusalén llaqtaman jamuspa Israelpa Diosnin Jehová Diospaq Pascua Fiestata ruwanankupaq. Israel runakunaqa manan Diospa kamachisqanman jinachu chay fiestataqa llapanku kuska ruwasharqanku,+ chaymi llapa Israel runakunata wajachimurqanku.
6 Jinan willaqkunaqa reypa kamachisqanman jina reywan umallikunapiwan carta qelqasqankuta aparqanku Israelpi tiyaq llapa runakunaman, Judá ayllupi tiyaq llapa runakunamanwan. Chay willaqkunan nirqanku: “Uyariwaychis Israel runakuna. Abrahanpa, Isaacpa, Israelpa Diosnin Jehová Diosman kutirikuychis; chhaynapin paypas Asiria reykunaq makinmanta ayqekuq runakunata sumaqta chaskinqa.+
7 Ama wayqeykichiskuna jinaqa nitaq ñaupa taytaykichiskuna jinaqa kaychischu, paykunaqa ñaupa taytaykichiskunaq Diosnin Jehová Diostan saqepurqanku. Chaymi Diosqa paykunata ñak’arichirqan, jinan runakunaqa paykunata rikuspa mancharikurqanku. Chaytaqa qankunapunin rikushankichis.+
8 Jinaspapas ama ñaupa taytaykichiskuna jinaqa k’ullu sonqo kaychischu.+ Jehová Diosta kasukuychis, jinaspa wiñaypaq ch’uyanchasqan wasiman jamuychis,+ chaypi Jehová Diosta serviychis. Chayta ruwankichis chayqa Diosqa manañan qankunapaqqa phiñakunqachu.+
9 Sichus Jehová Diosman kutirikunkichis chayqa, wayqeykichiskunata wawaykichiskunata preso apaqkunan paykunata khuyapayaspa kay llaqtaman kutichimunqaku.+ Jehová Diosqa khuyapayakuqmi llakipayakuqmi,+ sichus payman kutirikunkichis chayqa manan payqa saqesunkichischu”,+ nispa.
10 Jinan willaqkunaqa Efraín ayllupi kaq Manasés ayllupi+ kaq llapa llaqtakunaman rirqanku, jinallataq Zabulón ayllupi kaq llaqtakunamanpas. Chay runakunan ichaqa paykunata asipayarqanku.+
11 Ichaqa Aser ayllupi, Manasés ayllupi, Zabulón ayllupi kaq wakin runakunan juch’uyaykukurqanku, jinan Jerusalén llaqtaman jamurqanku.+
12 Diosqa Judá ayllupi tiyaq runakunatapas bendecirqanmi reypa kamachisqanta kasukunankupaq. Chay kamachikuykunataqa Jehová Diospa nisqanman jinan reypas umallikunapas kamachikurqanku.
13 Jinan iskay kaq killapi+ Jerusalén llaqtapi askhapuni runakuna juñukurqanku Mana Levadurayoq T’anta Fiestata ruwanankupaq.+
14 Jinan waj dioskunaq altarninta, incienso q’apachina altarkunatapas+ lliuta Jerusalén llaqtapi thunirqanku,+ chaykunatataq Cedrón wayq’oman wijch’uykurqanku.
15 Chaymantataq iskay kaq killapi chunka tawayoq p’unchaypi Pascua Fiestapaq uywakunata ñak’arqanku. Sacerdotekunawan Leví runakunawanmi ichaqa p’enqarikurqanku, chaymi ch’uyanchakuspa Jehová Diospa wasinman ruphachina ofrendakunata apamurqanku.
16 Sacerdotekunapas Leví runakunapas Diospa kamachin Moisespa nisqanman jinan imachus ruwanankuta ruwarqanku. Sacerdotekunaqa Leví runakunamanta chaskisqanku yawartan altar patapi ch’aqchurqanku.+
17 Jerusalén llaqtaman jamuq runakunaqa askhan mana ch’uyanchasqachu karqanku, chaymi qhelli kasharqanku, chayraykun Leví runakunaqa chay runakunaq rantinpi Pascua sacrificiokunata ñak’arqanku.+ Chhaynapi Jehová Diospa ñaupanpi ch’uyanchasqa kanankupaq.
18 Chaymantapas askha runakunan mana ch’uyanchasqachu karqanku, astawanqa Efraín ayllumanta, Manasés ayllumanta,+ Isacar ayllumanta, Zabulón ayllumanta kaq runakuna, chaywanpas paykunaqa Pascua Fiestapin mijurqanku. Chay ruwasqankuqa manan Diospa kamachisqanman jinachu karqan, chayraykun rey Ezequiasqa paykunapaq mañapurqan. Paymi khaynata nirqan: “Jehová Diosníy, qanqa munakuq Diosmi kanki,+ khuyapayaykuy
19 ñaupa taytankuq Diosnin Jehová Diosta tukuy sonqomanta maskhaq runakunata,+ manaña qanpa nisqaykiman jinachu ch’uyanchakurqanku chaypas khuyapayaykuy paykunata”,+ nispa.
20 Jinan Jehová Diosqa Ezequiaspa mañakusqanta uyarirqan, chaymi paykunata perdonarqan.
21 Jinan Jerusalén llaqtapi kaq Israel runakunaqa Mana Levadurayoq T’anta Fiestata+ kusisqa qanchis p’unchayta ruwarqanku.+ Leví runakunapas sacerdotekunapas sapa p’unchaymi Jehová Diosta jatuncharqanku, paykunaqa kallpawanmi tocanankuta Jehová Diospaq sapa p’unchay tocarqanku.+
22 Chaymantapas Ezequiasqa Jehová Diosta allin yuyaywan serviq llapa Leví runakunatan sumaqta kallpacharqan. Paykunaqa qanchis p’unchaymi mijurqanku,+ sumaq kausay sacrificiota jaywarqanku,+ ñaupa taytankuq Diosnin Jehová Diostapas agradecekurqanku.
23 Jinan llapa runakunaqa ninakurqanku qanchis p’unchaytawan chay fiestata ruwanankupaq, chaymi paykunaqa qanchis p’unchaytawan chay fiestata kusisqa ruwarqanku.+
24 Judá ayllu rey Ezequiasmi llapa runakunapaq qorqan waranqa torokunata qanchis waranqa ovejakunatawan, umallikunapas llapa runakunapaqmi qollarqankutaq waranqa torokunata chunka waranqa ovejakunatawan.+ Chaypiqa askha sacerdotekunan ch’uyanchakusharqanku.+
25 Chay p’unchaykunaqa llapa runakunan kusisqa kasharqanku: Judá ayllu runakunapas, sacerdotekunapas, Leví runakunapas, Israelmanta jamuq runakunapas,+ Israelmanta jamuq waj llaqtayoq runakunapas,+ Judá ayllupi tiyaq forastero runakunapas.
26 Jerusalén llaqtapiqa manan chhayna fiestaqa karqanchu Israel rey Davidpa churin Salomonpa kamachikusqan p’unchaymantapachaqa,+ chaymi Jerusalén llaqtaman jamuq runakunaqa ancha kusisqa kasharqanku.
27 Chaymantataq Leví ayllumanta kaq sacerdotekunaqa runakunaq ñaupanpi sayaykurqanku, jinaspa paykunata bendecirqanku.+ Paykunaq mañakusqantataq Diosqa janaq pacha ch’uya tiyananmanta uyarimurqan.
