2 Crónicas 7:1-22
7 Salomón mañakuyta tukuqtin jinan+ janaq pachamanta nina rauray uraykamurqan,+ jinaspa sacrificiokunata ruphachina ofrendakunatawan lliuta rupharqan. Diospa wasinmantaq Jehová Diospa k’anchaynin junt’aykurqan.+
2 Jehová Diospa wasinqa Jehová Diospa k’anchayninwanmi junt’a kasharqan, chaymi sacerdotekunaqa Jehová Diospa wasinman mana jaykuyta atirqankuchu.+
3 Llapa Israel runakunataq rikusharqanku janaq pachamanta nina rauray uraykamusqanta, Jehová Diospa k’anchayninpas wasi patapi kasqanta. Jinan runakunaqa qonqorikuspa pampakama k’umuykurqanku, Jehová Diosta agradecekuspataq nirqanku: “Payqa sumaq sonqo Diosmi; mana tukukuq munakuyninqa* wiñay-wiñaypaqmi”, nispa.
4 Jinan reypas llapa Israel runakunapas Jehová Diospa ñaupanpi sacrificiokunata jaywarqanku.+
5 Rey Salomonmi sacrificiopi jaywarqan iskay chunka iskayniyoq waranqa wakakunata, pachaj iskay chunka waranqa ovejakunatawan. Chhaynatan rey Salomonqa llapa Israel runakunapiwan Diosman chay wasita entregarqanku.+
6 Sacerdotekunapas Leví runakunapas maypichus kanankupin sayasharqanku. Leví runakunaqa tocanantinkaman kasharqanku, chaykunatan paykunaqa tocaqku Jehová Diosman takishaqtinku.+ (Chay tocanakunataqa rey Davidmi ruwachirqan Jehová Diosta jatunchanankupaq agradecekunankupaq ima, chaykunatan tocaqku “mana tukukuq munakuyninqa wiñay-wiñaypaqmi” nispa takiqtinku). Sacerdotekunataq Leví runakunaq ñaupanpi fuerteta trompetakunata tocasharqanku,+ Israel runakunataq sayasharqanku.
7 Cobremanta altar+ ruwasqanqa juch’uyllan kapurqan ruphachina sacrificiokunata,+ jak’u ofrendakunata,+ wirakunata+ ima jaywananpaqqa. Chaymi Salomonqa Jehová Diospa wasinpa ñaupanpi kaq chaupi patiota ch’uyancharqan, chaypi ruphachina ofrendakunata, sumaq kausay sacrificioq wirankunatawan jaywananpaq.
8 Chay kutipin Salomonqa llapa Israel runakunapiwan qanchis p’unchay fiestata ruwarqanku.+ Chay fiestamanqa Lebó-Amajmanta* Egipto wayq’okama+ tiyaq llapa Israel runakuna jamurqanku.
9 Paykunaqa qanchis p’unchaymi altarta ruwasqankumanta fiestata ruwarqanku, chaymantapas qanchis p’unchaytawanmi fiestata ruwallarqankutaq. Pusaq kaq p’unchaytaq* llapa runakuna jatun juñunakuyta ruwarqanku.+
10 Chaymantataq Salomonqa qanchis kaq killapi iskay chunka kinsayoq p’unchaypi llapa runakunata wasinkuman kachapurqan. Israel runakunaqa ancha kusisqan wasinkuman kutipurqanku.+ Paykunaqa kusisqa sonqoyoqmi kasharqanku Davidmanpas, Salomonmanpas, Israel runakunamanpas Jehová Dios sumaq sonqo kayninta rikuchisqanmanta.+
11 Chhaynatan Salomonqa Jehová Diospa wasintapas reypa wasintapas* ruwayta tukurqan.+ Salomonqa yuyaykusqanman jinapunin Jehová Diospa wasintapas paypa wasintapas ruwarqan.+
12 Chay tutan Jehová Diosqa Salomonman mosqoyninpi rijurirqan,+ jinaspa nirqan: “Mañakamuwasqaykitaqa uyarinin, chaymi kay wasitapas sacrificiota jaywawanaykichispaq ajllakuni.+
13 Sichus mana parachimusaqchu, langostakunatapas* kamachisaq plantakunata mijunankupaq, otaq mast’arikuq onqoytapas llaqtayman apachimusaq,
14 jinaspa sutiyta apaq+ runakuna juch’uyaykukuspa+ yanapayniyta mañakamuwanqaku, mana allin ruwasqankutapas saqepunqaku chayqa,+ janaq pacha tiyanaymantan paykunata uyarimusaq, jinaspa juchankuta perdonasaq, jallp’ankutapas allintan ruruchisaq.+
15 Kay wasitaqa qhawamushallasaqmi mañakusqankutapas makillan uyarimusaq.+
16 Kay wasitan ajllakuni, jinaspa ch’uyanchani chaypi sutiy wiñaypaq kananpaq,+ chaymi kay wasitaqa qhawamushallasaq, manataqmi qonqasaqchu.+
17 ”Sichus papayki David jina ñanniykunapi purinki, tukuy nisqayta junt’anki, kamachikuyniykunatapas chaninchayniykunatapas kasukunki chayqa,+
18 papayki Davidman prometesqayman jinan gobiernoykita wiñaypaq Israel llaqtapi tajyachisaq.+ Noqan papayki Davidman prometerqani:+ Familiaykimanta jamuq runakunallapunin Israelpiqa kamachikunqa,+ nispa.
19 Ichaqa sichus saqepuwankichis, kamachikuyniykunatapas mana kasukunkichischu, jinaspa waj dioskunata yupaychankichis, chaykunamantaq k’umuykunkichispas chayqa,+
20 kay qosqay jallp’amantan Israel llaqtata chinkachipusaq,+ sutiyta jatunchananpaq ch’uyanchasqay wasitapas ñaupaymantan wijch’upusaq, manan qhawarimusaqpaschu; chhaynapin Israel llaqtaqa waj llaqtakunaq pisichasqan asipayasqan kapunqa.+
21 Kay wasipas rumi montonmi kapunqa. Chaymi chayninta puriqkunaqa admirasqa+ ninqaku: ¿Imaraykutaq Jehová Diosri kay Israel llaqtatapas kay wasitapas chhaynatari ruwarun?,+ nispa.
22 Jinan ninqaku: Egiptomanta ñaupa taytankuta orqomuq+ Jehová Diosninkuta saqerparisqankuraykun+ chhayna kashanku. Paykunaqa waj dioskunamanmi k’umuykurqanku jinaspa chaykunata yupaycharqanku,+ chaymi Diosqa kay ñak’ariyta paykunaman apachimurqan,+ nispa”.
Uraypi willakuykuna
^ Qhaway Explicasqa simikuna nisqapi “Mana tukukuq munakuy” nisqata.
^ Chaypiqa “Amajman jaykunamanta” nillanmantaqmi.
^ Chaypiqa rimashan qanchis p’unchaytawan yapasqanku qhepamantan otaq chunka pisqayoq kaq p’unchaymanta.
^ Chaypiqa “palaciontapas” nillanmantaqmi.
^ Langostaqa jatun t’isku-t’isku otaq jatun ch’illiku jinan. Chay langostakunaqa sinchi q’aruqmi kanku.
