2 Corintios 4:1-18
4 Diosqa khuyapayawaspankun chay llank’anata qowarqanku, chaymi mana pisipaykuchu.
2 Aswanmi saqepuyku p’enqay ruwaykunatapas pakapi ruwaykunatapas; manataqmi engañaspachu puriyku, ni Diospa simintapas q’ewiykuchu,+ aswanmi cheqaq yachachikuyta yachachispa lliu runaq conciencianpaq Diospa ñaupanpi allin ejemplo kayku.+
3 Ichaqa allin willakuykuna willasqaykuchus uma qatanawan jina pakasqa kashan chayqa, chinkayman* riqkunapaqmi pakasqa kashan.
4 Chay mana iñiqkunaq yuyaynintan kay pacha* kamachiq dios tutayachipun,+ chhaynapi Diospa rijch’aynin+ Cristomanta ancha sumaq allin willakuykunaq k’anchaynin paykunaman mana k’anchaykunanpaq.+
5 Noqaykuqa manan noqaykumantachu willashayku, aswanpas Jesucristo Señor kasqanmantan, willallaykutaqmi payrayku kamachiykichiskuna kasqaykumantapas.
6 Diosmi nirqan: “Laqhayaqmanta* k’anchay k’ancharimuchun”,+ nispa. Paymi ancha jatun yachayninta Cristoq uyanwan sonqoykuman k’anchaykurqan.+
7 T’uru mankakuna jinaña kayku chaypas,+ chay qhapaq kayqa noqaykupin kashan,+ chhaynapin sut’ita rikukun runakunaq mana aypay atisqan atiy noqaykupi kasqanta; ichaqa chay atiyqa manan noqaykumantachu jamun, aswanpas Diosmantan jamun.+
8 Imaymanawanmi ñit’isqa jina tarikuyku, ichaqa manan mana kuyurinaykukamachu; wisq’asqa jinan tarikuyku, ichaqa tariykupunin maynin lloqsinatapas;*+
9 qatikachasqan kayku, ichaqa manan saqerparisqachu kayku;+ wijch’urparisqan kayku, ichaqa manan wañuchisqachu kayku.+
10 Maytaña rispaykupas Jesús jinan wañuy patakunapiraq tarikuyku,+ chaymi sut’ita rikuchin Jesús jina ñak’arisqaykuta.
11 Arí, Jesusraykun wañuy patakunapi tarikusparaq kausayku,+ chhaynapi Jesús jina ñak’arisqayku sut’ita rikukunanpaq.
12 Chhaynaqa, wañuy patapi tarikusqaykuwanmi qankunaqa kausayta tarinkichis.
13 Qelqapin nishan: “Noqaqa iñirqanin, chaymi rimarqani”,+ nispa. Noqaykupas chhayna iñiyniyoqmi kayku, chaymi rimayku,
14 yachaykutaqmi Jesusta kausarichiqqa* noqaykutapas kausarichiwanankuta imaynan Jesustapas kausarichirqan jinata, jinaspa qankunatawan kuskata Jesuspa ñaupanman pusawananchista.+
15 Llapa chaykunaqa qankunaq allinniykichispaqmi, chhaynapi Diospa ancha sumaq sonqo kaynin astawan yapakunanpaq; chayqa yapakun aswan askha runakuna Diosman graciasta qospa jatunchaqtinkun.+
16 Chayrayku, ama pisipasunchu; aycha cuerponchisña machuyapushan chaypas, sonqonchispi imaynachus kasqanchisqa p’unchaymanta p’unchaymi astawan mosoqyashan.
17 Sasachakuykunaqa* juj tiempollan, pisillataqmi kanpas; ichaqa chhaynaña kaqtinpas, chay sasachakuykunaqa juj premiotan chaskichiwasun, chay premioqa ancha jatunpunin, wiñaypaqtaqmi kanpas.+
18 Chaypaqmi ichaqa mana rikukuq kaqkunapi yuyayta churananchis, manan rikukuq kaqkunapichu.+ Rikukuq kaqkunaqa juj tiempollapaqmi, mana rikukuq kaqkunan ichaqa wiñaypaq.
Uraypi willakuykuna
^ Chaypiqa “wañuyman” nillanmantaqmi.
^ Chaypiqa “kay tiempopi” nillanmantaqmi. Qhaway Explicasqa simikuna nisqapi “Tiempo, pacha” nisqata.
^ Laqhayaqtaqa “tutayaq” nillankutaqmi.
^ Chaypiqa yaqapaschá “manan sinchi llakisqachu kayku” nillanmantaq.
^ Griego rimaypiqa “jatarichiqqa” ninmi.
^ Chaypiqa “Pruebakunaqa” nillanmantaqmi.
