2 Reyes 10:1-36
10 Ajabpa+ churinkunaqa qanchis chunkan karqan, paykunaqa Samaria llaqtapin tiyarqanku. Jinan Jehuqa cartata qelqaspa apachirqan Samaria llaqtapi kaq Jezrel llaqta autoridadkunaman, umalliqkunaman,*+ Ajabpa wawankunata uywaq qharikunaman* ima. Chay cartapin Jehuqa paykunata nirqan:
2 “Qankunaqqa imaymanaykichismi kan: maqanakunaykichispaq carretaykichiskuna, caballoykichiskuna, armaykichiskuna, allin perqasqa llaqtaykichis ima. Chaymantapas qankunawanmi kashan wiraqochaykichis Ajabpa churinkuna. Kay cartata leespaykichis jina
3 Ajabpa churinkunamanta aswan allin kaqta ajllaspa reyta churaychis, jinaspa reyniykichispa familianrayku maqanakuq jamuychis”, nispa.
4 Paykunan ichaqa sinchita mancharikurqanku, jinaspa nirqanku: “Iskay reykunapas manamá paytaqa atiparqankuchu,+ ¿chaychu noqanchis atipasunman?”, nispa.
5 Chaymi reypa palacionmanta* encargakuqpas, llaqtapi kamachikuqpas, umalliqkunapas, reypa wawankunata uywaq qharikunapas Jehuman willachimurqanku: “Manan pitapas kaypiqa reyta ajllasaqkuchu, noqaykuqa kamachiykikunan kayku, imachus ruway munasqaykitaqa ruwallay, tukuy kamachiwasqaykikutan noqaykuqa ruwasaqku”, nispa.
6 Jinan Jehuqa jujmanta cartata apachillarqantaq, chaypin nirqan: “Sichus noqawan kashankichis, tukuy kamachisqaytataq kasukunkichispas chayqa, reyniykichispa churinkunaq umanta qhorumuychis, jinaspa paqarin kay horasta jina kay Jezrel llaqtaman apamuwaychis”, nispa.
Ajabpa qanchis chunka churinkunaqa paykunata uywaq allin reqsisqa qharikunapiwanmi Samaria llaqtapi kasharqanku.
7 Jinan Samaria llaqtapi umallikunaqa chay cartata leespa jina reypa qanchis chunka churinkunata jap’irqanku, jinaspa lliuta wañuchirqanku.+ Chay wañusqakunaq umantataq canastakunapi Jezrel llaqtaman apachirqanku.
8 Jinan Jehuman willamurqanku: “Reypa churinkunaq umantan aparamusqaku”, nispa. Chaymi Jehuqa nirqan: “Llaqta punku jaykunaman iskay montonpi churamuchunku, jina chaypi paqarinkama kashachun”, nispa.
9 Tutamantantaq Jehuqa runakunata wajachispa nirqan: “Noqan reytaqa wañuchirqani,+ qankunaqa manan imamantapas juchayoqchu* kankichis. Ichaqa, ¿pitaq kaykunatari wañuchirqan?
10 Kaykunataqa Jehová Diosmi ruwarqan kamachin Eliaswan willachisqanman jina.+ Chhaynaqa allinta kayta yuyariychis: Jehová Diospa nisqanqa junt’akunqapunin,+ Ajabpa familian contra Jehová Diospa nisqanqa llapanmi junt’akunqa”, nispa.
11 Chaymantapas Jezrel llaqtapi kaq Ajabpa familiantan lliuta wañuchirqan, wañuchillarqantaqmi yanapaqnin allin reqsisqa runakunatapas, amigonkunatapas, sacerdotenkunatapas.+ Chhaynatan Jehuqa lliuta wañuchirqan.+
12 Chaymantataq Jehuqa Samaria llaqtaman rirqan, chay llaqtaman rina ñanpin karqan oveja rutuna* wasi.
13 Chaypin Jehuqa Judá rey Ocoziaspa+ wayqenkunawan tuparqan, jinan paykunata tapurqan: “¿Pikunan kankichis?”, nispa. Paykunataq nirqanku: “Ocoziaspa wayqenkunan kayku. Reypa wawankunata, reypa mamanpa wawankunata watukuqmi rishayku”, nispa.
14 Chayta niqtinku jinan Jehuqa runankunata kamachirqan: “¡Kay runakunata jap’iychis!”, nispa. Jinan paykunaqa llapankuta jap’imurqanku, jinaspa oveja rutuna wasipi kaq pozoq qayllanpi wañuchirqanku. Llapanpiqa tawa chunka iskayniyoq runakunan karqanku, paykunatan Jehuqa lliuta wañuchirqan.+
15 Chaymanta ripuspataq Jehuqa Recabpa+ churin Jehonadabwan+ tuparqan, payqa Jehuwan tupaqmi jamusharqan. Jinan Jehuqa napaykuspa* nirqan: “Imaynan sonqoyqa junt’aq qanpaq kashan, ¿chhaynachu sonqoyki noqapaq junt’aq kashan?”, nispa.
Jehonadabtaq nirqan: “Arí”, nispa.
Jinan Jehuqa nirqan: “Chhaynaqa makiykita jaywamuway”, nispa.
Makinta jaywaqtintaq Jehuqa Jehonadabta carretanman wichachirqan.
16 Jinan nirqan: “Jehová Dios contra kaqkunataqa manan jinallatachu qhawasaq,+ jaku, qan kikiykin chayta rikumunki”, nispa. Jinan Jehuqa Jehonadabta carretanpi aparqan.
17 Samaria llaqtaman chayaspataq Ajabpa familianmanta qhepaqkunata llapanta chay llaqtapi wañuchirqan,+ chayqa junt’akurqan Eliaswan Jehová Diospa willachisqanman jinan.+
18 Chaymantataq Jehuqa llapa runakunata wajachirqan, jinaspa nirqan: “Ajabpa Baalta yupaychasqanqa manan imapaschu,+ noqan ichaqa astawanraq Baalta yupaychasaq.
19 Chaymi kunan Baalman sacrificiokunata jaywasaq, chayrayku kayman jamuchunku Baalta llapa yupaychaqkuna, Baalpa llapa profetankuna,+ llapa sacerdotenkunapas.+ Ama jujpas faltachunchu, mana jamuqqa wañuchisqan kanqa”, nispa. Jehuqa Baal yupaychaqkunata llapanta wañuchinanpaqmi engañollawan chhaynata nisharqan.
20 Chaymantapas Jehuqa nillarqantaqmi: “Baalta yupaychananchispaq runakunaman willamuychis”, nispa. Jinan llapa runakunaqa willamurqanku.
21 Jehuqa lliu Israelmanmi chayta willachimurqan, jinan Baalta yupaychaqkunaqa llapallanku Baalpa templonman jamurqanku,+ manan ni jujpas faltarqanchu. Chhaynapin Baalpa templonqa junt’apuni kasharqan.
22 Chaymantataq Jehuqa p’acha waqaychaqta nirqan: “Baalta yupaychaqkunapaq llapankupaq p’achata apamuy”, nispa. Jinan payqa p’achakunata apamurqan.
23 Jehutaq Recabpa churin Jehonadabwan+ Baalpa templonman jaykurqanku. Jinan Jehuqa Baal yupaychaqkunata nirqan: “Kaypiqa Baalta yupaychaqkunallan kanan, manan Jehová Diosta yupaychaqkunaqa kananchu, paykunata allinta qankuna ukhupi maskhaychis”, nispa.
24 Chaymantataq Baalta yupaychaqkunaqa ruphachina ofrendakunata sacrificiokunata ima jaywayta qallarirqanku. Jehutaq runankunamanta pusaq chunkata jawaman churarqan, paykunatan nirqan: “Qankunaq makiykichismanmi kay runakunata entregashaykichis, pipas kay runakunamanta jujllatapas ayqechikunqa chayqa vidanwanmi paganqa”, nispa.
25 Ruphachina ofrendata jaywayta tukuqtinkutaq Jehuqa soldadokunata* oficialkunatawan kamachirqan: “¡Jaykuychis, Baal yupaychaqkunata lliuta wañuchimuychis! ¡Ama ni jujpas ayqekuchunchu!”,+ nispa. Jinan chay soldadokunawan oficialkunawanqa lliuta espadawan wañuchirqanku, wañusqakunatataq jawaman wijch’umurqanku. Chhaynatan paykunaqa templopi kaq aswan ukhu cuartoman jaykurqanku.
26 Chaymantataq yupaychana sayashaq k’ullukunata*+ templomanta orqomuspanku lliuta kanarqanku,+
27 Baal yupaychana sayashaq rumitapas lliutan ñut’urqanku.+ Baalpa templontapas lliutan thunirqanku,+ jinan jisp’ana wasiman tukuchipurqanku, chhaynataqmi kunankamapas kashan.
28 Chhaynapin Jehuqa Baal yupaychayta Israelpi chinkachipurqan.
29 Tukuy chaykunataña ruwarqan chaypas Jehuqa Nebajpa churin Jeroboán jinan juchallikushallarqan. Jeroboanqa Israel runakunatan juchallichirqan Betel llaqtapi Dan llaqtapi qori torillokunata churaspa.+ Chaykunatan Jehuqa mana chinkachirqanchu.
30 Jehová Diosmi Jehuta nirqan: “Qanqa allintan ruwarqanki, yuyaykusqayman jinan Ajabpa familiantapas lliuta chinkachirqanki,+ chaymi nietoykiq nietonkama Israelpiqa kamachikunqa”,+ nispa.
31 Jehumi ichaqa mana tukuy sonqomantachu Israelpa Diosnin Jehová Diospa kamachikuyninkunata kasukurqan.+ Payqa imaynatachus Jeroboán Israel runakunata juchallichirqan chay juchakunatan ruwallarqantaq.+
32 Chay p’unchaykunapin Jehová Diosqa Israel jallp’ata juch’uyachiyta qallarirqan. Siria rey Azaelmi Israel contra tukuy ladomanta jatarirqan.+
33 Azaelqa Jordán mayumanta inti lloqsimuy ladoman kaq Galaad jallp’atan jap’ikapurqan; Gad aylluq, Rubén aylluq, Manasés aylluq jallp’ankunata.+ Chay jallp’akunaqa karqan Arnón wayq’o qayllapi kaq Aroer llaqtamanta Galaadkaman, Basán jallp’akunakaman.+
34 Jehupa wakin ruwasqankunapas atiyninwan ruwasqankunapas lliumi Israel reykunamanta willaq libropi qelqasqa kashan.
35 Chaymantataq Jehuqa ñaupa taytankuna jina wañukapurqan, jinan Samaria llaqtapi p’ampapurqanku. Chay qhepamantaq churin Jehoacaz+ Israelpi kamachikuyta qallarirqan.
36 Jehuqa iskay chunka pusaqniyoq watan Samariamanta Israelta kamachirqan.
Uraypi willakuykuna
^ Hebreo rimaypiqa “Ajabta uywaq qharikunaman” ninmi.
^ Chaypiqa “kuraq runakunaman” nillanmantaqmi.
^ Hebreo rimaypiqa “wasinmanta” ninmi.
^ Chaypiqa “chaninmi” nillanmantaqmi.
^ Hebreo rimaypiqa “watana” ninmi. Yaqachus jina chaypiqa rutunankupaq ovejakunata watankuman karqan.
^ Chaypiqa “bendecispa” nillanmantaqmi.
^ Hebreo rimaypiqa “phawaqkunata” ninmi. Chay phawaqkunaqa reypa carretanpa ñaupanta phawaq soldadokunan karqanku.
^ Chaypiqa “sayashaq rumikunata” nillanmantaqmi.
