2 Reyes 14:1-29
14 Jehoaspa+ churin Amasiasmi Judá ayllupi rey kapurqan Jehoacazpa churin Jehoás iskay wataña Israelpi kamachikushaqtin.
2 Amasiasqa iskay chunka pisqayoq watanpi kashaspan kamachikuyta qallarirqan, iskay chunka isqonniyoq watataqmi Jerusalenmanta kamachikurqan. Paypa mamanmi karqan Jerusalén llaqtayoq Jehoadín.+
3 Amasiasqa papan Jehoás+ jinan tukuy imatapas Jehová Diospa munasqanman jina ruwarqan, ichaqa manan ñaupa taytan David jinapunichu.+
4 Chaymi yupaychana patakunataqa mana chinkachirqanchu,+ chaykunapin runakunaqa sacrificiokunata jaywaspa diosninkuman q’osñichishallarqanku.+
5 Kamachikuynin allin tajyasqa kaqtin jinataq Amasiasqa papan wañuchiq runakunata wañuchipurqan.+
6 Chay runakunaq churinkunatan ichaqa mana wañuchirqanchu. Payqa Moisespa qelqasqan kamachikuy simipi Jehová Diospa nisqanman jinan ruwarqan, chaypin nirqan: “Taytaqa manan churinpa juchallikusqanmanta wañuchisqachu kanan, nitaq churipas taytanpa juchallikusqanmantaqa wañuchisqachu kanan, aswanpas sapankan kikinkuq juchankumantaqa wañunanku”,+ nispa.
7 Rey Amasiasqa Kachi wayq’opin+ chunka waranqa Edom+ runakunata atiparqan.+ Chay maqanakuypin Edom runakunaq Sela llaqtanta jap’ikapurqan, jinaspa Joctel nispa sutichapurqan, chhaynataqmi kunankamapas kashan.
8 Chaymantataq Amasiasqa Israel rey Jehoasman willachimurqan: “Jamuy noqawan maqanakuq”,*+ nispa. Jehoasqa Jehoacazpa churinmi karqan, Jehoacaztaq Jehupa churin karqan.
9 Jinan Israel rey Jehoasqa Judá ayllu rey Amasiasman willachimurqan: “Juj kutinsi Líbano orqokunapi wiñaq kiskayoq qoraqa Líbano orqokunapi wiñaq cedro sach’aman willachisqa: Ususiykita qoway churiywan casarakunanpaq, nispa. Chayllamansi ichaqa Líbano orqokunapi tiyaq salqa animalqa chay kiskayoq qorata sarurapusqa.
10 Qanqa Edom runakunata atiparuspan+ jatunchakushanki. Chay runakunata atipasqaykimantaqa kusirikushallay, ichaqa wasillaykipi* qhepakuy, ¿imapaqtaq noqawanri maqanakuyta munanki atipachikunaykipaq? Llapa Judá ayllu runakunatachá sasachakuyman churawaq”, nispa.
11 Amasiasmi ichaqa mana kasukurqanchu.+
Chaymi Israel rey Jehoasqa Judá ayllu rey Amasiaswan maqanakuq rirqan, jinaspa Judá ayllupi+ kaq Bej-Semes+ llaqtapi maqanakurqanku.
12 Chaypin Israel runakunaqa Judá ayllu runakunata atiparqanku, jinan Judá ayllu runakunaqa sapankanku wasinkuman* ayqekapurqanku.
13 Israel rey Jehoasmi ichaqa Judá ayllu rey Amasiasta Bej-Semes llaqtapi jap’irqan, jinaspa Jerusalén llaqtaman apamurqan. Amasiasqa Jehoaspa churinmi karqan, Jehoastaq Ocoziaspa churin karqan. Jinan Jehoasqa Jerusalén llaqta perqata thunirqan Efraín Punku+ nisqamanta Esquina Punku+ nisqakama, chay thunisqan perqaqa yaqa pachaj pusaq chunka metron* karqan.
14 Jinan Jehová Diospa wasinmanta, reypa wasinpi* valorniyoq cosaskuna waqaychanamantawan llapanta aparqan qoritapas, qolqetapas, valorniyoq cosaskunatapas. Chaymantapas wakin runakunatan presota apallarqantaq. Chaymantataq Samaria llaqtaman kutipurqan.
15 Jehoaspa kausayninmanta wakin willakuykunapas, atiyninwan ruwasqankunapas, Judá rey Amasiaswan maqanakusqanpas lliumi Israel reykunamanta willaq libropi qelqasqa kashan.
16 Chaymantataq Jehoasqa ñaupa taytankuna jina wañukapurqan, jinaspa Israel reykunatawan kuskata Samaria llaqtapi p’ampapurqanku.+ Chay qhepamantaq churin Jeroboán+ Israelpi rey kapurqan.
17 Judá ayllu rey Jehoaspa churin Amasiasqa+ chunka pisqayoq watatawanraqmi kausarqan Israel rey Jehoacazpa+ churin Jehoaspa+ wañupusqan qhepamanqa.
18 Amasiaspa kausayninmanta wakin willakuykunaqa Judá ayllu reykunamanta willaq libropin qelqasqa kashan.
19 Qhepamanmi ichaqa Amasías contra Jerusalén llaqtapi jatarirqanku,+ jinan payqa Lakís llaqtaman ayqekurqan. Chay llaqtaman ayqekuqtinpas qhepantan runakunata kachallarqankutaq, jinan chay llaqtapi wañuchipurqanku.
20 Chaymantataq caballopi Jerusalén llaqtaman apapurqanku, jinaspa ñaupa taytankunatawan kuskata Davidpa Llaqtan+ nisqapi p’ampapurqanku.
21 Chay qhepamantaq llapa Judá ayllu runakunaqa Amasiaspa churin Azariasta*+ reyta churarqanku papanpa rantinpi kamachikunanpaq.+ Azariasqa chunka soqtayoq watallanpiraqmi kasharqan kamachikuyta qallarispaqa.+
22 Papan Amasiasta p’ampapusqanku qhepatan Azariasqa Elaj+ llaqtata qechukapurqan, jinaspa allicharqan. Chhaynapin Elaj llaqtaqa jujmanta Judá aylluq kapurqan.+
23 Jehoaspa churin Amasías Judá ayllupi chunka pisqayoq wataña kamachikushaqtinmi Jehoaspa churin Jeroboanqa+ Israelpi kamachikuyta qallarirqan, tawa chunka jujniyoq watataqmi Samariamanta Israelta kamachirqan.
24 Jehoaspa churin Jeroboanqa Jehová Diospa cheqnisqan ruwaykunatan ruwarqan. Payqa Nebajpa churin Jeroboán imaynatachus Israel runakunata juchallichirqan chay juchakunatan ruwallarqantaq.+
25 Jehoaspa churin Jeroboanmi Israelmanta qechusqanku jallp’akunata jujmanta qechukapurqan. Chhaynapin Israelpa linderonqa jujmanta kapurqan Lebó-Amajmanta*+ Arabá qochakama.*+ Chhaynapin junt’akurqan Amitaipa churin Jonaswan+ Israelpa Diosnin Jehová Diospa willachisqan. Jonasqa Gaj-Éfer+ llaqtayoq profetan karqan.
26 Jehová Diosqa rikusharqanmi Israel runakuna sinchita ñak’arishasqankuta.+ Israelpiqa manan pipas karqanchu Israel runakunata yanapananpaq, manan karqanchu ni pisi kallpakunapas ni pisichasqakunapas.
27 Jehová Diosmi ichaqa ñaupaqmantaña prometerqan Israel runakunata kay jallp’amanta ama chinkachinanpaq,+ chaymi payqa Jehoaspa churin Jeroboanta kachamurqan paykunata salvananpaq.+
28 Jeroboanpa kausayninmanta wakin willakuykunapas, atiyninwan ruwasqankunapas, maqanakusqankunapas lliumi Israel reykunamanta willaq libropi qelqasqa kashan. Jeroboanqa enemigonkunamantan qechumurqan Damasco+ llaqtatapas Amaj+ llaqtatapas, jinaspa chay llaqtakunata jujmanta kutichipurqan Israelmanwan Judá ayllumanwan. Chaykunapas lliumi Israel reykunamanta willaq libropi qelqasqa kashan.
29 Chaymantataq Jeroboanqa ñaupa taytan Israel reykuna jina wañukapurqan. Chay qhepamantaq churin Zacarías+ Israelpi rey kapurqan.
Uraypi willakuykuna
^ Chaypiqa “uya-uyapura tupasunchis” nillanmantaqmi.
^ Chaypiqa “palaciollaykipi” nillanmantaqmi.
^ Hebreo rimaypiqa “karpankuman” ninmi.
^ Hebreo rimaypiqa “tawa pachaj codon” ninmi. Qhaway “Astawan yachanapaq B14” nisqata.
^ Chaypiqa “palacionpi” nillanmantaqmi.
^ Azarías sutiqa “Jehová Diosmi yanapaqqa” ninantan nin. Paytan nikullantaq “Uzías” nispa 2Re 15:13; 2Cr 26:1-23; Is 6:1; Zac 14:5 textokunapi.
^ Chaypiqa “Amajman jaykunamanta” nillanmantaqmi.
^ Chaypiqa Kachi qochamantan rimashan, chay qochataqa “mar Muerto” nikullantaqmi.
