2 Reyes 20:1-21
20 Chay p’unchaykunapin rey Ezequiasqa onqopurqan, jinaspa wañunan patapiña kasharqan.+ Jinan Amozpa churin profeta Isaiasqa payta watukuq rirqan, jinaspa nirqan: “Jehová Diosmi khaynata nisunki: Wañupunkin, manan qhaliyankichu,+ wasiykipi kaqkunaman imachus ruwanankuta encargay, nispa”.
2 Chayta uyarispan Ezequiasqa perqa ladoman kutirispa Jehová Diosmanta mañakuyta qallarirqan:
3 “Jehová Diosníy, valekuykin. Ama jinachu kay, yuyariy qanpaq junt’aq kasqayta, tukuy sonqowan ñanniykikunapi purisqayta, munasqaykiman jina lliuta ruwasqaytapas”,+ nispa. Chayta nispataq Ezequiasqa khuyayta waqaykurqan.
4 Isaías manaraq chaupi patioman lloqsishaqtinmi Jehová Diosqa payta nirqan:+
5 “Phaway kutiy, jinaspa llaqtaypa umallin Ezequiasta nimuy: Ñaupa taytayki Davidpa Jehová Diosninmi nisunki: Mañakusqaykitan uyarimuni, waqasqaykitan rikumuni,+ chaymi noqa Jehová Dios qhaliyachisayki.+ Kinsa p’unchaymantan wasiyman jamunki.+
6 Chunka pisqayoq watatawanraqmi kausachisayki. Chaymantapas qantawan kay llaqtatawanmi Asiria reypa makinmanta salvasaykichis.+ Sutiyrayku kamachiy Davidrayku iman kay llaqtata yanapasaq,+ nispa”.
7 Chaymantataq Isaiasqa Ezequiaspa kamachinkunata nirqan: “Ch’aki higos masa k’umpata apamuychis”, nispa. Jinan paykunaqa apamurqanku, jinaspa Ezequiaspa aycha qaranpi q’eyayoq k’irinman chayta laq’arqanku. Chhaynapin Ezequiasqa pisi-pisimanta qhaliyapurqan.+
8 Ezequiasmi Isaiasta tapurqan: “¿Imaynapitaq yachasaq Jehová Dios qhaliyachiwanantari,+ kinsa p’unchaymanta Jehová Diospa wasinman rinaytapasri?”, nispa.
9 Jinan Isaiasqa nirqan: “Jehová Diosqa junt’anqapunin rimasqantaqa, chayta rikuchinasuykipaqmi Jehová Diosqa juj señalta qosunki. ¿Imatan munawaq? ¿Gradasman* chayaq llanthu chunka gradasta ñaupaqman purinantachu icha chunka gradasta qhepaman kutinantachu?”,+ nispa.
10 Chaymi Ezequiasqa Isaiasta nirqan: “Manan sasachu ñaupaqman chunka gradasta llanthuq purinanqa, qhepaman chunka gradasta kutinanmi ichaqa sasa”, nispa.
11 Chaymantataq profeta Isaiasqa Jehová Diosta rogakurqan, jinan Diosqa Ajazpa gradasninman chayaq llanthuta chunka gradasta qhepaman kutichirqan.+
12 Chay tiempopin Babilonia rey Berodac-Baladanqa yacharusqa Ezequías onqosqa kashasqanta, jinan Ezequiasman apachimusqa cartakunata juj regalotawan.+ Berodac-Baladanqa Baladanpa churinmi karqan.
13 Ezequiasqa sumaqtan chaskirqan Babilonia reypa kachamusqan runakunataqa. Chaymantapas wasinpi kaq ancha valorniyoq cosaskunatan rikuchirqan:+ qolqeta, qorita, armankunata, bálsamo aceiteta, ancha valorniyoq aceitekunata, wasinpi kaq ancha valorniyoq tukuy imaymanakunatawan. Ezequiasqa lliutapunin rikuchirqan wasinpi* kaqkunatapas lliu aylluntinpi kaqkunatapas.
14 Chaymantataq profeta Isaiasqa rey Ezequiaspa kasqanman jaykurqan, jinaspa tapurqan: “¿Maymantan chay runakuna jamusqaku? ¿Imanispan nirqasunkiku?”, nispa. Jinan Ezequiasqa nirqan: “Karu llaqtamantan jamusqaku, Babilonia nacionmantaraq”,+ nispa.
15 Chaymantataq Isaiasqa tapullarqantaq: “¿Imakunatan wasiykipi rikurqanku?”, nispa. Jinan Ezequiasqa nirqan: “Wasiypi kaqniykunataqa lliutan rikunku. Ancha valorniyoq kaqniykunatapas lliutapunin rikuchini”, nispa.
16 Jinan Isaiasqa Ezequiasta nirqan: “Uyariy, Jehová Diosmi khaynata nisunki:+
17 P’unchaykunan chayamushanña, chaypin ñaupa taytaykikunaq imaymana juñusqankuta, wasiykipi llapa kaqniykikunatawan Babiloniaman apapunqaku.+ Manan imapas kaypiqa qhepanqachu, ninmi Jehová Dios.
18 Mirayniykimanta wakin runakunatapas Babiloniamanmi apapunqaku,+ chaypin reypa palacionpi oficialkuna kanankupaq churanqaku,+ nispa”.
19 Chayta uyarispan Ezequiasqa Isaiasta nirqan: “Jehová Diospa nisqanqa chaninmi”,+ nispa. Chaymantapas nillarqantaqmi: “Chhaynaqa noqa kausanaykamaqa thaj kaychá kanqa, manachá imapas pasanqachu,* chaymi Diosta gracias nini”,+ nispa.
20 Ezequiaspa wakin ruwasqankunapas, atiyninwan ruwasqankunapas, imaynatachus unu estanqueta ruwasqanpas,+ yarqhata* ruwaspa unuta llaqta ukhuman apaykusqanpas+ lliumi Judá ayllu reykunamanta willaq libropi qelqasqa kashan.
21 Chaymantataq Ezequiasqa ñaupa taytankuna jina wañukapurqan,+ chay qhepamantaq churin Manasés+ Judapi rey kapurqan.+
Uraypi willakuykuna
^ Yaqapaschá chay gradaskunaqa karqan llanthuta qhawaspa ima horachus kasqanta yanachapaq.
^ Chaypiqa “palacionpi” nillanmantaqmi.
^ Chaypiqa “cheqaq kaychá kanqa” nillanmantaqmi.
^ Yarqhataqa “larqha, sanja” nillankutaqmi.
