2 Reyes 21:1-26
21 Manasesqa+ chunka iskayniyoq watanpi kashaspan rey kapurqan, pisqa chunka pisqayoq watataq Jerusalenmanta kamachikurqan,+ mamanpa sutinmi karqan Efziba.
2 Manasesqa Jehová Diospa cheqnisqan ruwaykunatan ruwarqan,+ imaynan chay jallp’amanta Jehová Diospa qarqosqan nacionkuna millakunapaq ruwaykunata ruwarqanku jinata.+
3 Manasesqa papan Ezequiaspa thunisqan yupaychana patakunatan* jujmanta ruwallarqantaq.+ Payqa Israel rey Ajab jinan Baal idolopaq altarkunata ruwarqan,+ ruwallarqantaqmi yupaychana sayashaq k’ullutapas.*+ Chaymantapas cielopi llapa ch’askakunamanmi k’umuykurqan, chaykunatataqmi servirqanpas.+
4 Jehová Diosña nirqan: “Jerusalén llaqtapin sutiyqa kanqa”, nispa chaypas+ Manasesqa Jehová Diospa wasinpin juj dioskunapaq altarkunata ruwarqan.+
5 Chaymantapas Jehová Diospa wasinpa iskaynin pationpin+ altarkunata ruwarqan cielopi llapa ch’askakunata yupaychananpaq.+
6 Wawantapas ninapin ruphachirqan; payqa layqa ruwaykunatan ruwarqan,+ wañusqakunatan tapurqan, watuykunapin purirqan, jamuq tiempopi imachus pasananta yachaypi iman purirqan.+ Manasesqa Jehová Diospa cheqnisqan ruwaykunatan sinchitapuni ruwarqan, chhaynapi Diosta phiñachinanpaq.
7 Chaymantapas Manasesqa ruwasqan yupaychana sayashaq k’ullutan*+ Jehová Diospa wasinman apaykurqan. Chay wasimantan Diosqa Davidtapas churin Salomontapas nirqan: “Kay wasiypin, kay Jerusalén llaqtapin sutiyqa wiñaypaq kanqa.+ Chay llaqtatan noqaqa Israelpi kaq llapan ayllukunamanta ajllakurqani.
8 Sichus Israel runakuna lliu nisqaykunata makilla kasukunqaku,+ kamachiy Moisesman qosqay kamachikuykunatapas kasukunqaku chayqa, ñaupa taytankuman qosqay jallp’allapipunin tiyanqaku,+ manan chaymanta qarqosaqchu”, nispa.
9 Paykunan ichaqa mana kasukurqankuchu. Manasesmi paykunataqa sinchita juchallichirqan, chhaynapin paykunaqa chay jallp’amanta Jehová Diospa wijch’usqan nacionkunaq ruwasqankumantapas aswan mana allintaraq ruwarqanku.+
10 Jehová Diosqa sapa kutinmi profetankunawan willachirqan:+
11 “Judá ayllu rey Manasesqa sinchi millay ruwaykunatan ruwarqan. Paypa ñaupanta kausaq+ amorreo runakunamantapas aswan millaytaraqmi ruwarqan.+ Payqa millay idolokunata ruwaspan Judá ayllu runakunata juchallichirqan.
12 Chaymi noqa Israelpa Diosnin Jehová Dios nini: Lliu Jerusalén llaqtatan lliu Judá ayllutan sinchita ñak’arichisaq,+ jinan paykunamanta uyariqkunaqa anchata mancharikunqaku.+
13 Samaria llaqtata medisqay waskhawanmi+ Jerusalén llaqtata medisaq,+ Ajabpa wasinpi kaqkunata nivelasqay herramientawanmi*+ Jerusalenta nivelasaq. Chaymantapas imaynan jatun p’ukuta limpiaspa p’ajtikun* chhaynatan Jerusalén llaqtata ruwasaq.+
14 Judá ayllu runakunaqa puchuq herenciaymi,+ paykunatapas enemigonkunaq makinmanmi entregasaq,+ chhaynapin paykunapas juj llaqtakunaman apasqa kanqaku, kaqninkunatapas apapunqakun.
15 Paykunaqa Egiptomanta lloqsimusqankumantapachan kunan p’unchaykama cheqnisqay ruwaykunata ruwashallanku, chayta ruwaspan phiñachishallawanku, chaymi paykunata saqerparisaq,+ nispa”.
16 Manasesqa mana juchayoq runakunata wañuchispan Jerusalén llaqta junt’ataraq paykunaq yawarninta jich’arqan.+ Chaymantapas Judá ayllu runakunatan Jehová Diospa cheqnisqan ruwaykunata ruwanankupaq tanqarqan, chayta ruwaspan payqa juchallikurqan.
17 Manasespa wakin ruwasqankunapas juchallikusqankunapas lliumi Judá ayllu reykunamanta willaq libropi qelqasqa kashan.
18 Manasesqa ñaupa taytankuna jinan wañukapurqan, jinan Juzapa huertanpi p’ampapurqanku,+ chay huertaqa wasinpin kasharqan. Chay qhepamantaq churin Amón rey kapurqan.
19 Amonqa+ iskay chunka iskayniyoq watanpi kashaspan Judá ayllupi rey kapurqan, iskay watataqmi Jerusalén llaqtamanta kamachikurqan,+ mamantaq karqan Aruzpa ususin Mesulémej, Aruzqa karqan Jojbamantan.
20 Amonqa taytan Manasés jinan Jehová Diospa cheqnisqan ruwaykunata ruwarqan.+
21 Payqa taytan jinan millay idolokunata yupaycharqan, chaykunamantaqmi k’umuykurqanpas.+
22 Chhaynatan Amonqa ñaupa taytankunaq Diosnin Jehová Diosta saqerparipurqan, manataqmi Jehová Diospa nisqanman jinachu purirqan.+
23 Jinan kamachinkuna pay contra jatarirqanku, jinaspa wasinpi wañuchipurqanku.
24 Judá ayllu runakunan ichaqa rey Amón contra jatariq runakunata lliuta wañuchipurqanku, jinaspa churin Josiasta paypa rantinpi reyta churarqanku.+
25 Rey Amonpa wakin ruwasqankunaqa Judá ayllu reykunamanta willaq libropin qelqasqa kashan.
26 Chaymantataq Amontaqa Juzapa huertanpi kaq sepulturapi p’ampapurqanku,+ qhepamantaq churin Josías+ rey kapurqan.
Uraypi willakuykuna
^ Hebreo rimaypiqa “alto patakunatan” ninmi. Qhaway Explicasqa simikuna nisqapi “Yupaychana patakuna” nisqata.
^ Qhaway Explicasqa simikuna nisqapi “Sayashaq k’ullu” nisqata.
^ Qhaway Explicasqa simikuna nisqapi “Sayashaq k’ullu” nisqata.
^ Chaypiqa “nivelasqay plomadawanmi” nillanmantaqmi.
^ P’ajtiytaqa “p’ujtiy, t’ijray” nillankutaqmi.
