2 Reyes 22:1-20
22 Pusaq watayoq kashaspan Josiasqa+ rey kapurqan, kinsa chunka jujniyoq watataq Jerusalenpi kamachikurqan,+ mamantaq karqan Jedidá, Bozcaj+ llaqtayoq Adayaq ususin.
2 Josiasqa ñaupa taytan David jinan Jehová Diospa munasqanman jina kausarqan,+ payqa manapunin Diospa ñanninmantaqa t’aqakurqanchu ni lloq’emanpas ni pañamanpas.
3 Chunka pusaqniyoq wataña kamachikushaspan rey Josiasqa Jehová Diospa wasinman kacharqan secretario Safanta; Safanpa papanmi karqan Mesulanpa churin Azalías.+ Safantan reyqa nirqan:
4 “Uma sacerdote Hilquiasman+ riy, Jehová Diospa wasinman runakunaq apasqanku qolqeta juñumuchun,+ punku qhawaqkuna runakunamanta chaskisqanku qolqeta.+
5 Chay qolqetataq qochunku Jehová Diospa wasinta allichaymanta encargakuqkunaman, paykunan chay qolqewan paganqaku Jehová Diospa wasinta allichaqkunaman:+
6 imaymana ruway yachaq artesanokunaman, wasi ruwaqkunaman, imaymanapi llank’aqkunaman ima. Chaymantapas chay qolqewanmi rantikunqa wasita allichanapaq maderakunatapas thupasqa rumikunatapas.+
7 Chay qolqeta imakunapi gastasqankutaqa aman tapunkichischu, paykunaqa confianapaq runakunan kanku”,+ nispa.
8 Chay qhepamantaq uma sacerdote Hilquiasqa secretario Safanta+ nirqan: “Kamachikuy qelqatan+ Jehová Diospa wasinpi tariruni”, nispa. Jinan chay qelqata Safanman qorqan, paytaq leeyta qallarirqan.+
9 Chaymantataq secretario Safanqa reypa kasqanman rirqan, jinaspa nirqan: “Ñan kamachiykikunaqa juñuramunkuña Diospaq apamusqanku qolqetaqa, chaytataq qonkuña Jehová Diospa wasinta allichaymanta encargakuqkunaman”,+ nispa.
10 Safanqa reytan nillarqantaq: “Sacerdote Hilquiasmi kay qelqata+ qomuwan”, nispa. Jinan Safanqa reypa ñaupanpi chay qelqata leerqan.
11 Reytaq kamachikuy qelqaq nisqanta uyarispa jina p’achanta llik’ikurqan.+
12 Jinan reyqa Diosta tapumunankupaq kacharqan sacerdote Hilquiasta, Safanpa churin Aicamta,+ Micayaq churin Acborta, secretario Safanta, kamachin Asayatawan. Paykunatan nirqan:
13 “Phaway riychis noqaq rantiypi llapa Judá ayllu runakunaq rantinpi ima, jinaspa Jehová Diosta tapumuychis kay tarimusqaykichis qelqapi nisqanmanta. Kay qelqapi tukuy nisqanqa noqanchispaqmi qelqasqa kashan, chaykunatan ñaupa taytanchiskunaqa mana junt’arqankuchu, chaymi Jehová Diosqa sinchi phiñasqa noqanchispaq kashan”,+ nispa.
14 Jinan sacerdote Hilquiasqa, Aicamwan, Acborwan, Safanwan, Asayawan ima rirqanku profetisa Huldapa kasqanman.+ Huldapa qosanmi karqan Salum, Salumtaq karqan Ticvapa churin, Ticvataq karqan Araspa churin. Salumqa p’acha waqaychaqmi* karqan. Salumwan Huldawanqa Jerusalén llaqtapi kaq Mosoq Barrio nisqapin tiyarqanku, chaypin reypa kachasqan runakunaqa Huldawan rimarqanku.+
15 Chaypin Huldaqa paykunata nirqan: “Israelpa Diosnin Jehová Diosmi kachamuqniykichis runata nin:
16 Noqa Jehová Diosmi niyki: Kay llaqtamanmi chaypi tiyaq runakunamanwanmi sinchi llakita apamusaq, Judá ayllu reypa leesqan qelqapi nisqanman jina.+
17 Kay llaqta runakunan saqerpariwanku, phiñachiwanankupaqtaq+ juj dioskunaman sacrificiokunata q’osñichishanku,+ chaykunata ruwasqankuraykun kay llaqta runakunaman k’araq phiñakuyniyta chayachimusaq, manataqmi phiñakuyniyqa pasanqachu,+ nispa.
18 Chaymantapas Jehová Diosta tapunaykichispaq kachamuqniykichis Judá ayllu reytan kayta nillankichistaq: Israelpa Diosnin Jehová Diosmi kayta nisunki: Kamachikuy qelqata uyariqtiykin
19 qanqa sonqoykita llamp’uyachirqanki.+ Noqan kay llaqta contra, chaypi tiyaq runakuna contra ima nirqani: Qankunamanmi sinchi llakita chayachimusaq, chay jawan qankunaqa sinchita mancharikunkichis, nispa. Chayta uyarispan qanqa noqa Jehová Diospa ñaupaypi juch’uyaykukurqanki, p’achaykitapas llik’ikurqanki,+ waqarqanki ima. Chaymi mañakusqaykita uyarimuni. Chaykunatan noqa Jehová Dios nini.
20 Chayraykun qanqa thajpi wañukapunki, ñaupa taytaykikunawantaq p’ampasqa kapunki, kay llaqtaman ñak’ariykuna chayachimusqaytapas manan rikunkichu, nispa”. Jinan chay runakunaqa uyarisqankuta reyman willaq kutipurqanku.
Uraypi willakuykuna
^ Salumqa sacerdotekunaq otaq reykunaq p’achantan waqaychanman karqan.
