2 Reyes 25:1-30
-
Nabucodonosor Jerusalén llaqtata muyuykusqanmanta (1-7)
-
Jerusalenpas Diospa templonpas thunisqa kasqanmanta, iskay kaq kutipi apasqa kasqankumantawan (8-21)
-
Guedaliasta Judá ayllu runakunata umallinanpaq churasqankumanta (22-24)
-
Guedaliasta wañuchipusqankumanta, runakuna Egiptoman ayqekusqankumantawan (25, 26)
-
Babiloniapi Joaquinta kacharipusqankumanta (27-30)
25 Isqon wataña Sedequías kamachikushaqtinmi chunka kaq killapi chunka kaq p’unchaypi Babilonia rey Nabucodonosorqa+ llapa soldadokunantin Jerusalén llaqta contra maqanakuq jamurqan.+ Chay llaqtaman chayaspan karpakurqanku, jinan llaqtaq muyuriqninpi cercota jatarichirqanku llaqtaman jaykunankupaq.+
2 Rey Sedequías chunka jujniyoq wata kamachikuyninkaman Jerusalén llaqtaqa cercasqalla kasharqan.
3 Tawa kaq killapi isqon kaq p’unchaypin ichaqa Jerusalén llaqtapi sinchi yarqay kasharqan,+ manañan suyupi tiyaq runakunapaq mijuy kapurqanñachu.+
4 Chay p’unchaymi Jerusalén llaqta perqata thunimurqanku.+ Jinan Caldea soldadokuna llaqtata muyuykushaqtinku Jerusalén llaqta soldadokuna llapanku tuta ayqekurqanku iskay pata perqaq punkunta, chay punkuqa reypa huertanpa ladonpin kasharqan. Reyqa Arabá ladoman riq ñannintan ayqekurqan.+
5 Caldea soldadokunan ichaqa rey Sedequiasta qatipaspa Jericó ch’in pampapi ayparqanku, llapa soldadonkunataq ch’eqeripurqanku.
6 Jinan rey Sedequiasta jap’ispanku+ Riblá llaqtaman aparqanku Babilonia reypa kasqanman, chaypin juzgarqanku.
7 Sedequías rikushaqtinmi churinkunata wañuchipurqanku, chaymantataq Nabucodonosorqa Sedequiaspa ñawinta orqorqan, jinaspan cobremanta cadenakunawan wataspa Babiloniaman aparqan.+
8 Babilonia rey Nabucodonosor chunka isqonniyoq wataña kamachikushaqtinmi Babilonia soldadokunaq umallin Nebuzaradanqa+ pisqa kaq killapi qanchis kaq p’unchaypi Jerusalén llaqtaman chayamurqan, payqa Babilonia reypa serviqninmi karqan.+
9 Paymi kanaykurqan Jehová Diospa wasinta,+ reypa wasinta,*+ Jerusalén llaqtapi kaq llapa wasikunata,+ jinallataq allin reqsisqa runakunaq wasintapas.+
10 Nebuzaradanwan kashaq llapa Caldea soldadokunataq Jerusalén llaqtaq muyuriqnin perqakunata thunipurqanku.+
11 Chaymantataq soldadokunaq umallin Nebuzaradanqa llaqtapi qhepaq runakunata, Babilonia reyta yanapaq Judá ayllu runakunata, juj runakunatapas apapurqan.+
12 Nishu wajcha runakunatan ichaqa saqerqan uvas chajrakunata llank’anankupaq, juj sasa llank’aykunatawan ruwanankupaq.+
13 Chaymantataq Caldea soldadokunaqa ñut’upurqanku Jehová Diospa wasinpa ñaupanpi kaq cobremanta columnakunata,+ unu apana carretakunata,+ cobremanta Jatun Qocha nisqa puruñatapas.*+ Chay cobretan Jehová Diospa wasinmanta Babilonia llaqtaman apapurqanku.+
14 Apallarqankutaqmi cobremanta baldekunata, palakunata, copakunata, mecha wañuchinakunatapas. Diospa templonpi kaq cobremanta serviciokunataqa llapantan apapurqanku.
15 Soldadokunaq umallin Nebuzaradanqa ch’uya qorimanta+ ch’uya qolqemanta+ p’ukukunata, sansa apanakunata iman apapurqan.
16 Jehová Diospa wasinpaq Salomonpa ruwasqan iskaynin columnakunapas, Jatun Qocha nisqa puruñapas, unu apana carretakunapas cobremanta ruwasqan karqan. Chaykuna sinchi askha cobremanta ruwasqa kasqanraykun manaña pesarqankuchu.+
17 Sapanka columnaq sayayninmi chunka pusaqniyoq codo* karqan,+ chay columnakunaq umanpa sayaynintaq kinsa codo karqan. Chay columnakunaq umanpas, muyuriqninpi kaq mallakunapas, granadakunapas llapanmi cobremanta ruwasqa karqan.+ Chay columnakunaqa iskayninpas igual-llan karqan.
18 Soldadokunaq umallin Nebuzaradanqa apapullarqantaqmi uma sacerdote Serayata,+ payman qatiq sacerdote Sofoniasta,+ punku qhawaq kinsantin runakunatapas.+
19 Chaymantapas Jerusalén llaqtamantan apallarqantaq reypa palacionpi kaq soldadokunaq umallinta, reyta yuyaychaq pisqa runakunata, soldadokunaq umallinpa secretarionta ima, paymi runakunata guerrapaq suyupi wajachiq. Apallarqantaqmi suyumanta qhepaq soqta chunka común runakunatapas, paykunaqa Jerusalén llaqtapiraqmi kasharqanku.
20 Paykunatan Babilonia soldadokunaq umallin Nebuzaradanqa+ aparqan Riblá+ llaqtaman, Babilonia reyman.
21 Babilonia reytaq paykunata wañuchipurqan Amaj+ jallp’api, Riblá llaqtapi. Chhaynatan Judá ayllu runakunataqa jallp’ankumanta apapurqanku.+
22 Chaymantataq Babilonia rey Nabucodonosorqa Guedaliasta+ churarqan Judá ayllupi qhepaq runakunata umallinanpaq.+ Guedaliasqa karqan Safanpa+ nietonmi Aicampa+ churin.
23 Jinan Judá ayllu soldadokunaq umallinkunaqa runankunapiwan yacharurqanku Babilonia reyqa Guedaliasta umallinanpaq churasqanta, chaymi paykunaqa runankunapiwan Mizpá llaqtaman rirqanku Guedaliaswan tupaq. Netaniaspa churin Ismael, Careaq churin Joanán, Netofá llaqtayoq Tanumejpa churin Seraya, Macaj llaqtamanta runaq churin Jazanías ima, paykunawan kuskan runankunapas rirqanku.+
24 Jinan Guedaliasqa chay umallikunata runankunatawan juraspa nirqan: “Ama manchakuychischu Caldea runakuna serviytaqa. Babilonia reyta servinkichis chayqa, allillanmi kay jallp’api tiyankichis”,+ nispa.
25 Qanchis kaq killapin Ismaelqa+ chunka runankunantin Mizpá llaqtaman chayarqanku, chaypin Guedaliasta wañuchipurqanku. Wañuchipullarqankutaqmi paywan kashaq Judá ayllu runakunatapas Caldea runakunatapas.+ Ismaelqa Elisamapa nietonmi karqan, Netaniaspa churin, payqa reypa familianmantan karqan.
26 Chay pasasqan qhepamanmi chay umallikunapas Judá ayllupi qhepaq runakunapas jatunpas juch’uypas llapallanku Egipto llaqtaman ripurqanku.+ Paykunaqa Caldea runakunata manchakuspan ripurqanku.+
27 Judá ayllu rey Joaquín+ kinsa chunka qanchisniyoq wataña Babiloniapi preso kashaqtinmi, Babilonia rey Evil-Merodacqa kamachikuyta qallarirqan, jinan chunka iskayniyoq killapi iskay chunka qanchisniyoq p’unchaypi Judá rey Joaquinta kacharipurqan.+
28 Evil-Merodacqa sumaqtan qhawarirqan Joaquintaqa, Babilonia llaqtaman apasqa wakin reykunamantapas aswan allinpaqmi qhawarirqan.
29 Jinan Joaquinqa preso p’achanta ch’utikapuspa mosoq p’achawan churakurqan, chaymantapas payqa wañupunan p’unchaykaman reypa mesanpi mijurqan.
30 Sapa p’unchaymi reyqa payman mijunata qorqan, wañupunan p’unchaykaman qoshallarqan.
Uraypi willakuykuna
^ Chaypiqa “palacionta” nillanmantaqmi.
^ Chay cobre puruñaqa jatun manka jinan karqan.
^ Juj codoqa yaqa kuskan metro jinan karqan (44,5 cm). Qhaway “Astawan yachanapaq B14” nisqata.
