2 Reyes 4:1-44
-
Viuda warmiq aceitenta Eliseo askhaman tukuchisqanmanta (1-7)
-
Sunem llaqtayoq warmi Eliseota alojasqanmanta (8-16)
-
Sunem llaqtayoq warmi juj wawawan bendecisqa kasqanmanta, chay wawa wañupusqanmantawan (17-31)
-
Wawata Eliseo kausarichisqanmanta (32-37)
-
Eliseo venenoyoq mijunata allinman tukuchisqanmanta (38-41)
-
Eliseo t’antata askhaman tukuchisqanmanta (42-44)
4 Profetakunaq churinpa* esposanmi+ Eliseoman valekuq rirqan, jinaspa nirqan: “Wiraqocháy, qosayqa wañukapunñan. Yachasqayki jina payqa Jehová Diosllatan servirqan.+ Ichaqa kunanmi manuwaqniyku runa jamurusqa, jinaspan iskaynin wawaykunata esclavonpaq apayta munashan”, nispa.
2 Chaymi Eliseoqa nirqan: “¿Imapin yanapaykiman? ¿Imallaykipas wasiykipi kashanchu?”, nispa. Jinan chay warmiqa nirqan: “Manan imaypas kanchu, juj jarra aceitellaymi kashan”,+ nispa.
3 Chaymi Eliseoqa nirqan: “Phaway wasimasiykikunamanta tukuy atisqaykita ch’usaq p’uyñukunata mañarakamuy.
4 Chaymantataq wawaykikunapiwan wasiykiman jaykuspa punkuta wisq’akamunki, jinaspa llapa chay p’uyñukunaman aceiteta jich’aykunki, junt’a kaqkunatataq juj ladoman churanki”, nispa.
5 Jinan chay warmiqa ripurqan.
Wawankunapiwan wasinman jaykuspataq punkunta wisq’akamurqan, jinan wawankunaqa p’uyñukunata jaywarqanku, paytaq chay p’uyñukunaman aceiteta junt’achirqan.+
6 Llapa p’uyñukunaman aceite junt’arapuqtintaq chay warmiqa jujnin wawanta nirqan: “Jaywamuway juj p’uyñutawan”,+ nispa. Wawanmi ichaqa nirqan: “Manan kanñachu”, nispa. Chayta niqtin jinan aceiteqa manaña lloqsimurqanñachu.+
7 Chaytan chay warmiqa Diospa profetan Eliseoman willarqan. Chaymi Eliseoqa nirqan: “Chay aceiteta vendespa manuykita pagamuy, puchuq qolqetaq qanpaqwan wawaykikunapaqwan kanqa”, nispa.
8 Juj p’unchaymi Eliseoqa Sunem+ llaqtata rirqan. Chay llaqtapin juj allin respetasqa warmi tiyarqan, chay warmin Eliseota rogarqan wasinman mijuq rinanpaq.+ Sapa kuti chayninta pasaspaqa chay wasillapipunin Eliseoqa mijuq.
9 Jinan chay warmiqa qosanta nirqan: “Chay runaqa sapa kutillan kayninta purin, payqa Diospa ch’uya profetanpunin.
10 Ama jinachu kay, ¿manachu wasinchis patapi juj cuartochata ruwarapusunman?+ Chaymantaq churasunman juj puñunata, juj mesata, juj sillata, juj mecherotawan,* chhaynapi sapa kuti jamuspa chaypi samakunanpaq”,+ nispa.
11 Juj p’unchaymi Eliseoqa Sunem llaqtaman rispa chay warmiq wasinman chayarqan, jinan ruwapusqanku cuartoman seqarqan chaypi samakunanpaq.
12 Chaypi kashaspan Eliseoqa kamachin Gueazita+ nirqan: “Phaway kay wasiyoq warmita wajaramuy”, nispa. Jinan Gueaziqa chay Sunem+ llaqtayoq warmita wajamurqan.
13 Chaymantataq Eliseoqa Gueazita nirqan: “Ama jinachu kay, chay warmita niy: ¿Imaynatan kutichiykikuman tukuy kaykunata qowasqaykikumanta?+ ¿Reytachu icha soldadokunaq umallintachu niykuman qanta yanapanasuykikupaq?,+ nispa”. Chay warmin ichaqa nirqan: “Ama imatapas ruwaychischu. Noqaqa allinmi kashani, kay llaqtapiqa thajmi tiyashani”, nispa.
14 Jinan Eliseoqa Gueazita nirqan: “Chhaynaqa, ¿imatataq paypaqri ruwapusunman?”, nispa. Gueazitaq nirqan: “Payqa mana wawayoqmi,+ qosanpas ñan machuña”, nispa.
15 Chayta niqtin jinan Eliseoqa nirqan: “Phaway wajaramuy chay warmita”, nispa. Gueazí wajamuqtintaq chay warmiqa punkupi sayaykurqan.
16 Jinan Eliseoqa chay warmita nirqan: “Wataman kunan jinataqa wawayoqñan kashanki”,+ nispa. Paymi ichaqa nirqan: “Wiraqocháy, qanqa cheqaq Diospa profetanmi kanki, ama chhaynata yanqa niwaychu”, nispa.
17 Chay warmin ichaqa onqoq kapurqan, jinaspa Eliseoq nisqanman jina juj wata qhepaman juj qhari wawata onqokurqan.
18 Tiempowanmi chay wawaqa jatunña kasharqan, jinan juj p’unchay papanpa kasqanman rirqan. Papanqa rutuqkunawanmi kasharqan.
19 Chaypi kashaspan papanta nirqan: “¡Ay umalláy uma! ¡Umaymi nanashawan!”, nispa. Jinan papanqa kamachinta nirqan: “Phaway mamanman aparuy”, nispa.
20 Jinan chay kamachiqa mamanman chay erqechata apapurqan. Mamanqa moqon* patapin chaupi p’unchaykama chay wawanta tiyachirqan, chaymantataq wañukapurqan.+
21 Chay qhepamantaq chay warmiqa Diospa profetan Eliseoq cuartonman+ wawanta aparqan, puñuna pataman churaykuspataq punkuta wisq’aspa ripurqan.
22 Qosanta wajaspataq nirqan: “Ama jinachu kay, juj kamachita kachamuway, asnotawan apamuchun. Cheqaq Diospa profetanmanmi usqhaylla rirusaq, chaymantaqa kutirampullasaqmi”, nispa.
23 Qosanmi ichaqa nirqan: “¿Imaraykutaq kunanri rishanki? Manamá kunanqa mosoq killa p’unchaychu nitaq samana p’unchaychu”,+ nispa. Chaymi esposanqa nirqan: “Ama llakikuychu, manan imapas pasanchu”, nispa.
24 Jinan chay warmiqa asnota caronaruspa sillakurqan, jinaspa kamachinta nirqan: “Usqhaylla asnota aysay. Amapuni sayankichu, noqa nisayki chayña sayanki”, nispa.
25 Chay warmiqa Carmelo orqokaman rirqan, chaypin Diospa profetan Eliseoqa kasharqan. Karullamantaraq chay warmita rikuruspataq cheqaq Diospa profetan Eliseoqa kamachin Gueazita nirqan: “¡Qhawariy, Sunem llaqtayoq warmi jamushan!
26 Ama jinachu kay, phaway ayparuy, jinaspa ninki: ¿Allinchu kashanki? ¿Allinchu qosaykipas wawaykipas kashan?, nispa”. Chayta niqtintaq chay warmiqa nirqan: “Allillanmi kashayku”, nispa.
27 Diospa profetan Eliseoq kasqanman chayaspataq chay warmiqa Eliseoq chakinmanta jap’ipakurqan.+ Chayta rikuspan Gueaziqa chay warmita Eliseomanta t’aqananpaq qayllaykurqan. Cheqaq Diospa profetan Eliseon ichaqa nirqan: “Ama imanaypaschu, imamantachá sinchi llakisqa kashan, Jehová Diosqa manan willawanchu”, nispa.
28 Jinan chay warmiqa nirqan: “Wiraqocháy, ¿noqachu wawata mañakurqayki? Ama yanqaqa kusirichiwaychu nirqaykimá riki”,+ nispa.
29 Chayta uyarispa jinan Eliseoqa Gueazita nirqan: “P’achaykita cinturaykiman watarukuy,+ jinaspa kay taunayta aparikuspa kay warmiq wasinta riy. Piwanpas ñanpi tupaspaqa aman napaykunkichu, piña napaykusunki chaypas aman uyarinkichu. Kay warmiq wasinman chayaspataq taunayta chay erqechaq uyan pataman churaykunki”, nispa.
30 Chay warmin ichaqa nirqan: “Wiñaypaq kausaq Jehová Diospa sutinpi qanpa sutiykipi iman niyki, qan mana rinkichu chayqa manan noqapas kaymanta kuyurisaqchu”,+ nispa. Chaymi Eliseoqa chay warmiwan kuska rirqan.
31 Gueaziqa ñaupaqtan chay warmiq wasinman chayarqan, jinan chay erqechaq uyan pataman taunata churarqan, ichaqa manan imapas pasarqanchu, chay erqechaqa manan kausarirqanchu.+ Jinan Gueaziqa Eliseoq kasqanman kutispa nirqan: “Erqechaqa manan kausarinchu”, nispa.
32 Eliseo wasiman chayananpaqqa wañusqan chay erqechaqa puñuna patapi kumparayashasqa.+
33 Jinan Eliseoqa wasiman jaykuspa punkuta wisq’akamurqan, jinaspa Jehová Diosmanta mañakuyta qallarirqan.+
34 Chaymantataq chay erqecha pataman thallaykurqan, jinan siminqa chay erqechaq siminwan tupasharqan, ñawintaq ñawinwan, makintaq makinwan, chhaynapin chay erqechaq cuerponqa q’oñiriyta qallarirqan.+
35 Jinan Eliseoqa wasi ukhupi kayman jaqayman purikacharqan, chaymantataq jujmanta chay erqecha pataman thallaykullarqantaq, jinaspan chay erqechaqa qanchis kutita achhirqan, chaymantataq ñawinta kicharirqan.+
36 Jinan Eliseoqa Gueazita wajaspa nirqan: “Kay wawaq mamanta wajamuy”, nispa. Chaymi Gueaziqa chay warmita wajamurqan. Chay warmi jaykuqtintaq Eliseoqa nirqan: “Wawaykita oqariy”,+ nispa.
37 Jinan chay warmiqa Eliseoman qayllaykurqan, jinaspa ñaupanpi qonqorikuspa pampakama k’umuykurqan. Chaymantataq wawanta marq’arikuspa jawaman lloqsipurqan.
38 Chay qhepamantaq Eliseoqa Guilgalman kutipurqan, chay lado jallp’apiqa yarqaymi kasharqan.+ Juj p’unchaymi profetakunaq churinkunaqa+ Eliseoq ñaupanpi tiyasharqanku, jinan Eliseoqa kamachinta nirqan:+ “Jatun mankapi profetakunaq churinkunapaq mijunata wayk’urapuy”, nispa.
39 Chaykamataq jujninkuqa campota rirqan malva qorata apamuq. Chayman rishaspan tarirqan k’ita calabazakunata, chaytan payqa p’achanman junt’achinankama pallayta qallarirqan. Chaymanta kutimuspataq chay calabazakunata ñut’uta picarurqan, jinaspa wayk’usqanku mankaman jich’aykurqan, ichaqa manan yacharqanchu imachus kasqanta.
40 Chaymantataq chay mijunata runakunaman qararqanku. Malliykuspa jinan ichaqa alto kunkawan nirqanku: “¡Diospa profetan, kay mijunaqa venenoyoqmi kashan!”, nispa. Chaymi chay mijunataqa mana mijurqankuchu.
41 Jinan Eliseoqa nirqan: “Jak’uta apamuwaychis”, nispa. Chay jak’uta mijuna mankaman jich’aykuspataq kamachinta nirqan: “Kunanqa jujmanta kay mijunata paykunaman qaray”, nispa. Jinan profetakunaq churinkunaqa mijurqanku, ichaqa chay mijunaqa manan imanarqanpaschu.+
42 Chay qhepamantaq Baal-Salisamanta+ juj runa chayamurqan, chay runan Diospa profetan Eliseoman apamurqan chayllaraq cosechasqa cebadamanta iskay chunka t’antata+ juj costalpi chayllaraq cosechasqa cebadatawan.+ Jinan Eliseoqa kamachinta nirqan: “Kayta runakunaman qoy mijunankupaq”, nispa.
43 Kamachinmi ichaqa Eliseota nirqan: “¿Imaynatataq kayllatari pachaj runakunaman aypachisaq?”,+ nispa. Eliseotaq nirqan: “Qanqa qollay mijunankupaq, Jehová Diosmi nin: Llapankun mijunqaku, chaywanpas puchunqaraqmi,+ nispa”.
44 Chaymi Eliseoq kamachinqa paykunaman chay mijunata qorqan, jinan paykunaqa mijurqanku, Jehová Diospa nisqanman jinataq mijunaqa puchurqanraq.+
Uraypi willakuykuna
^ Yaqapaschá paykunaqa juj escuelapi yachachisqa karqanku profeta kanankupaq otaq juj t’aqa profetakuna karqanku. Paykunatan niqku “profetakunaq churin” nispa.
^ Chaypiqa “lamparatawan” nillanmantaqmi.
^ Moqotaqa “qonqori” nillankutaqmi.
