2 Reyes 5:1-27
5 Siria soldadokunaq umallinmi karqan Naamán. Paywanmi Jehová Diosqa Siria runakunata salvarqan,* chaymi Siria reyqa chay runata respetarqan ancha allinpaqtaq qhawarirqanpas. Naamanqa allin maqanakuq runan karqan, ichaqa lepra* onqoyniyoqmi karqan.
2 Juj kutinmi Siria soldadokunaqa Israel runakunawan maqanakuq rispa juj sipaschata presota aparqanku, chay sipaschan Naamanpa esposanpa kamachin kapurqan.
3 Chay sipaschan patronanta nirqan: “Samaria llaqtapin kan juj profeta,+ sichus patronniy payman rirunman chayqa qhaliyarachinmanmi lepra onqoyninmanta”,+ nispa.
4 Jinan payqa* reypa kasqanman rispa chay sipaschaq nisqanta willarqan.
5 Chayta willaqtinmi Siria reyqa Naamanta nirqan: “¡Allinmi! ¡Kunanpacha riy! Juj cartatawan Israel reyman apachisayki”, nispa. Jinan Naamanqa aparikurqan chunka talento* pesaq qolqeta, soqta waranqa siclo pesaq qorita, chunka p’achatawan.
6 Israel reypa kasqanman chayaspataq chay cartata qorqan, chay cartapin Siria reyqa nirqan: “Kay cartatan apachimushayki kamachiy Naamanta lepra onqoyninmanta qhaliyachinaykipaq”, nispa.
7 Chay cartata leespan Israel reyqa p’achanta llik’ikurqan, jinaspa nirqan: “¡¿Noqari Dioschu kani pitapas wañuchinaypaq, pitapas kausachinaypaq+ otaq pitapas qhaliyachinaypaq?! ¡Qhawariychis! Siria reymi kay runata kachamusqa lepra onqoyninmanta qhaliyachinaypaq. Kayta ruwaspaqa noqawan maqanakuytamá munashan riki”, nispa.
8 Diospa profetan Eliseon yacharurqan Israel rey p’achanta llik’ikusqanta, chaymi usqhaylla willachimurqan: “¿Imaraykun p’achaykita llik’ikurqanki? Chay runata noqaman kachamuway, chhaynapin yachanqa Israelpi juj profeta kasqanta”,+ nispa.
9 Chaymi Naamanqa Eliseoq kasqanman caballokunantin carretakunantin rirqan, chayaspataq wasi punkupi sayaykurqan.
10 Eliseon ichaqa juj runata kacharqan Naamanta kayta nimunanpaq: “Jordán mayuta riy, jinaspa qanchis kutita bañakamuy,+ chhaynapin lepra onqoyniykiqa thanipunqa, jinan ch’uya kapunki”, nispa.
11 Chayta uyarispan Naamanqa phiñasqa kutipuspa nirqan: “Noqaqa nisharqanin: Kikin profetachá aypamuwaspa Jehová Diosninpa sutinta wajakunqa, jinaspa makinta maywispa lepra onqoyniyta qhaliyachiwanqa, nispa.
12 Damasco+ llaqtapi kaq Abaná mayuraqmá Farpar mayuraqmá aswan allinpas Israelpi kaq mayukunamantaqa, chay mayukunapichá chaypaqqa bañakamushayman onqoyniymanta qhaliyanaypaqqa”, nispa. Chayta nispan Naamanqa phiñasqallaña kutiripurqan.
13 Kamachinkunan ichaqa payman qayllaykuspa nirqanku: “Patronníy,* sichus chay profeta sasa ruwayta kamachisunkiman karqan chayqa, ruwawaqmi karqan ¿riki? Chhaynaqa, qhaliyapunaykipaq mayupi bañakamuy nishallasunkitaq chayqa bañakamuyyá”, nispa.
14 Jinan Naamanqa Diospa profetanpa nisqanman jina Jordán mayuman jaykuspa qanchis kutita unuman chinkaykurqan.+ Chhaynapin Naamanqa qhaliyapurqan, aychanpas erqechaq aychanman jinan tukurapurqan.+
15 Chaymantataq Naamanqa llapa runankunapiwan Diospa profetanpa kasqanman kutirqan,+ jinan ñaupanpi sayaykuspa nirqan: “Kunanqa allintan yachani Israelpi cheqaq Dios kasqanta, manan maypipas pay jina Diosqa kanchu.+ Ama jinachu kay, kay regalo* apamusqayta chaskiykuway”, nispa.
16 Profeta Eliseon ichaqa nirqan: “Servisqay wiñaypaq kausaq Jehová Diospa sutinpin niyki, manapunin regaloykitaqa chaskiykimanchu”,+ nispa. Anchataña Naamán rogakurqan regalo apasqanta chaskinanpaq chaypas manapunin Eliseoqa chaskirqanchu.
17 Chaymi Naamanqa Eliseota nirqan: “Manataq ima regaloytapas chaskiwankichu chayqa, iskay mulaq carganan jallp’ata kaymanta apakusaq. Kunanmantaqa Jehová Diosllamanmi ruphachina ofrendatapas sacrificiokunatapas jaywasaq, manañan juj dioskunamanqa jaywasaqchu.
18 Ichaqa Jehová Diospa perdonawanantan munani. Siria reymi Rimón idoloq templonman rispa makiymanta jap’ipakuspa chay idoloman k’umuykukun, chaymi noqapas paywan kuska k’umuykuni, chayta sapa kuti ruwaqtiy Jehová Dios perdonawachun”, nispa.
19 Chaymi Eliseoqa nirqan: “Ama llakikuychu, ripullay”, nispa. Jinan Naamanqa ripurqan. Karutaña rishaqtintaq
20 profeta Eliseoq kamachin Gueaziqa yuyaykurqan:+ “¡Maypitaq wiraqochay Eliseori chay Siria runa Naamanta+ jinallata kacharparipunman! ¡Maypitaq regalo apamusqantapas mana chaskikunmanchu! Wiñaypaq kausaq Jehová Diospa sutinpin jurani, ayparusaqpuni imallatapas qowananpaq”, nispa.
21 Jinan Gueaziqa Naamanpa qhepanta phawaylla rirqan. Qhepanta juj runa phawamushasqanta rikuspataq Naamanqa carretanmanta uraykurqan, jinaspa chay runaman aypaspa nirqan: “¿Iman pasarun?”, nispa.
22 Gueazitaq nirqan: “Manan imapas pasanchu, allinmi kashayku. Wiraqochay Eliseoq kachamusqanmi jamushani. Efraín ayllu orqo-orqomantan iskay waynakuna chayaramunku, paykunaqa profetakunaq churinkunan* kanku, paykunapaqsi juj talento pesaq qolqeta iskay p’achatawan qoykuwanki”,+ nispa.
23 Jinan Naamanqa nirqan: “Iskay talento pesaq qolqeta aswanpas qosayki”,+ nispa. Manaña chaskikuyta munarqanchu chaypas Naamanqa jinatapunin iskay costalman winarurqan iskay talento pesaq qolqeta iskay p’achatawan, chaytataq iskay kamachinkunaman qorqan. Paykunan chay costalkuna q’epiykusqa Gueazipa ñaupanta rirqanku.
24 Ofelman* chayaqtinkutaq Gueaziqa chay costalkunata chaskispa wasiman apaykurqan, Naamanpa kamachinkunatataq kacharparipurqan. Chay runakuna ripuqtinkutaq
25 Gueaziqa Eliseoq kasqanman jaykurqan. Jinan Eliseoqa tapurqan: “¿Maymantan jamushanki?”, nispa. Gueazitaq nirqan: “Manan maytapas rinichu”,+ nispa.
26 Eliseon ichaqa nirqan: “Qanqa yaqapaschá nishanki: Chay runaq qhepanta risqaytapas chay runawan tupasqaytapas manan yachanchu, nispa. Ichaqa Gueazí, manan kunanqa qolqe chaskina p’acha chaskina tiempochu, nitaq qhari kamachikuna, warmi kamachikuna, ovejakuna, wakakuna, aceituna chajrakuna, uvas chajrakuna chaskina tiempochu.+
27 Kunanmi Naamanpa+ lepra onqoynin qantapas, wawaykikunatapas, wawaykikunaq familiankunatapas wiñaypaq jap’isunkichis”, nispa. Jinan Gueaziqa Eliseoq kasqanmanta usqhaylla ripurqan, lloqsinanpaqmi ichaqa lepra onqoyniyoqña kapushasqa rit’i jina yuraqllaña.+
Uraypi willakuykuna
^ Chaypiqa “atipachirqan” nillanmantaqmi.
^ Chaypiqa yaqapaschá Naamanmanta rimashan.
^ Juj talentoqa 34,2 kilotan pesaq. Qhaway “Astawan yachanapaq B14” nisqata.
^ Hebreo rimaypiqa “Papáy” ninmi.
^ Hebreo rimaypiqa “bendición” ninmi.
^ Yaqapaschá paykunaqa juj escuelapi yachachisqa karqanku profeta kanankupaq otaq juj t’aqa profetakuna karqanku. Paykunatan niqku “profetakunaq churin” nispa.
^ Chay cheqasqa Samaria llaqtapin tarikurqan, yaqapaschá juj moqo pata karqan otaq llaqta jina allin perqasqa karqan.
