2 Reyes 7:1-20
7 Jinan Eliseoqa nirqan: “Uyariychis Jehová Diospa nisqanta, Jehová Diosmi khaynata nin: Paqarinmi kay horasta jina Samaria llaqta punkupi* tawa kilo* allin jak’u* juj siclo* pesaq qolqe valenqa, pusaq kilo* cebadataq juj siclo pesaq qolqe valenqa,+ nispa”.
2 Chayta uyarispan reyta yanapaq oficialqa Diospa profetanta nirqan: “¿Imaynataq chayri kanman? Jehová Diosña janaq pachata kicharinman chaypas manapunin nisqaykiqa junt’akunmanchu”,+ nispa. Chaymi Eliseoqa nirqan: “Chaytaqa ñawiykiwanpunin qan kikiyki rikunki,+ ichaqa manan mijunkichu”,+ nispa.
3 Samaria punku jaykunapin lepra onqoyniyoq tawa runakuna kasharqanku,+ paykunan ninakurqanku: “¿Wañunanchiskamachu jinalla kaypi tiyasunchis?
4 Khaynataq yarqay kashan chayqa,+ llaqtamanña jaykusunchis chaypas kaypiña qhepakusunchis chaypas wañupusunpunin. Aswanpas jaku Siria soldadokunaq karpakusqanman, wañuchiwasunchis chayqa sut’iñachá kanqa riki, khuyapayawasun chaytaq kausasunchis”, nispa.
5 Chaymi paykunaqa tutayaykuyta jina Siria soldadokunaq karpakusqanman rirqanku, chayman chayaspan ichaqa mana pitapas tarirqankuchu.
6 Jehová Diosmi Siria runakunaman uyarichirqan askha soldadokunaq, caballokunaq, carretakunaq jamushasqanta;+ chaymi Siria runakunaqa paykunapura ninakurqanku: “¡Israel reychá atipawananchispaq valerakamun Het runakunaq Egipto runakunaq reyninkunata!”, nispa.
7 Chayta uyarispa jinan paykunaqa wañuyta manchakuspa chay ch’isipacha usqhaylla ayqekurqanku. Karpankutapas, caballonkutapas, asnonkutapas jinatan saqerparirqanku.
8 Jinan lepra onqoyniyoq runakunaqa Siria runakunaq karpakusqanman chayaspa juj karpaman jaykurqanku, chaypin mijurqanku ujarqanku ima. Qolqetawan, qoritawan, p’achatawan aparikuspataq pakaramurqanku. Chaymantataq kutimuspanku juj karpamanñataq jaykurqanku, jinan chaymantapas imaymanata apaspa pakamullarqankutaq.
9 Chay qhepamanmi ichaqa paykunapura ninakurqanku: “Manan allintachu kaytaqa ruwashanchis. ¡Kay p’unchayqa kusikuna p’unchaymi! Paqarinkama ch’inlla kasunchis chayqa castigasqan kasunchis, aswanpas jaku kunanpacha reypa wasinpi kaqkunaman willamusunchis”, nispa.
10 Jinan paykunaqa Samaria llaqtaman kutispa llaqta punku qhawaqkunata wajaspa alto kunkawan nirqanku: “Siria runakunaq karpakusqankutan rirqayku, manan pipas chaypiqa kanchu, caballokunawan asnokunallawanmi watarayashan, karpankupas kaqllan kashan”, nispa.
11 Chay uyarisqankutan punku qhawaqkunaqa alto kunkawan runakunaman willarqanku, chhaynapin chay willakuyqa reypa wasinkama chayarqan.
12 Chayta uyarispa jinan Israel reyqa chay tutapacha jatarispa kamachinkunata nirqan: “Imatachá Siria runakunaqa ruwayta munashanku. Paykunaqa yachankun yarqaymanta kashasqanchista,+ karpankumanta lloqsispachá campopi pakakamushanku, jinaspa nishanku: Israel runakunaqa lloqsimunqakupunin, lloqsimuqtinkuqa kausashaqllata jap’irusunchis, jap’iruspataq llaqtankuman jaykusunchis,+ nispa”.
13 Jinan jujnin kamachinqa nirqan: “Wiraqocháy, ¿manachu qhawamunankupaq wakin runakunata kachasunman? Kay puchuq caballokunamanta pisqa caballota aparikuchunku. Kaypiña qhepakunqaku chaypas noqanchiswan kuskan wañunqaku imaynan wakinkuna wañupunkuña jinata, chhaynaqa kachallasunchis, sut’ichá imapas pasanqa riki”, nispa.
14 Chaymi reyqa chay runakunata kacharqan Siria runakunaq karpakusqanman: “Phaway qhawaramuychis”, nispa. Jinan chay runakunaqa iskay carretata caballokunantinta aparikurqanku.
15 Paykunaqa Siria runakunata maskhaspan Jordán jallp’akama chayarqanku, purisqanku ñanpitaq p’achakunata serviciokunata wijch’u-wijch’uta tarirqanku, chaykunataqa Siria runakunan manchakuymanta ayqekuspanku wijch’upusqaku. Jinan reypa kachasqan runakunaqa kutispa chayta reyman willamurqanku.
16 Chaymi Samaria runakunaqa llaqtamanta lloqsispa Siria runakunaq karpakusqanman rirqanku, jinaspa lliu munasqankuta apakamurqanku. Jinan tawa kilo allin jak’u juj siclo pesaq qolqe valerqan, pusaq kilo cebadataq juj siclo pesaq qolqe valerqan, chayqa Jehová Diospa nisqanman jinan junt’akurqan.+
17 Reymi yanapaqnin oficialta churarqan llaqta punkuta qhawananpaq, paytan runakunaqa punkuta lloqsishaspa sarurapurqanku, chhaynapin payqa wañupurqan. Chayqa junt’akurqan Diospa profetan reyta nisqanman jinan.
18 Tukuy imapas Diospa profetanpa nisqanman jinapunin junt’akurqan, paymi Israel reyta nisqa: “Paqarinmi kay horasta jina Samaria llaqta punkupi tawa kilo allin jak’u juj siclo pesaq qolqe valenqa, pusaq kilo cebadataq juj siclo pesaq qolqe valenqa”,+ nispa.
19 Reypa yanapaqnin oficialmi ichaqa Diospa profetanta nisqa: “¿Imaynataq chayri kanman? Jehová Diosña janaq pachata kicharinman chaypas manapunin nisqaykiqa junt’akunmanchu”, nispa. Chaymi Eliseoqa nisqa: “Chaytaqa ñawiykiwanpunin qan kikiyki rikunki, ichaqa manan mijunkichu”, nispa.
20 Chay nisqanpas junt’akurqanpunin, reyta yanapaq oficialtaqa runakunan punkuta lloqsispa sarurapurqanku, chhaynapin wañupurqan.
Uraypi willakuykuna
^ Chaypiqa “mercadokunapi” nillanmantaqmi.
^ Hebreo rimaypiqa “juj sea” ninmi. Juj sea tupunamanqa qanchis litro masmi jaykuq (7,33 L). Qhaway “Astawan yachanapaq B14” nisqata.
^ Chaypiqa “ñut’u jak’u” nillanmantaqmi.
^ Juj sicloqa 11,4 gramostan pesaq. Qhaway “Astawan yachanapaq B14” nisqata.
^ Hebreo rimaypiqa “iskay sea” ninmi.
