2 Reyes 8:1-29
8 Eliseon Sunem llaqtayoq warmiq wawanta kausarichirqan,+ chay warmitan Eliseoqa nirqan: “Jehová Diosmi nin kay jallp’api qanchis wata yarqay kananta,+ chayrayku phaway familiaykipiwan may llaqtamanpas ripuy”, nispa.
2 Jinan chay warmiqa Diospa profetanpa nisqanman jina llapa familiantin chay llaqtamanta ripurqan. Filistea runakunaq jallp’anman+ chayaspataq qanchis wata chaypi tiyarqanku.
3 Qanchis wata qhepamantaq Sunem llaqtayoq warmiqa Filistea runakunaq jallp’anmanta kutimpurqan, jinaspa Israel reyman valekuq rirqan wasintapas jallp’antapas kutichipunanpaq.
4 Israel reyqa profeta* Eliseoq kamachin Gueaziwanmi rimasharqan, paymi nisharqan: “¿Ima admiranapaq ruwaykunatan Eliseo ruwarqan? Ama jinachu kay, llapanta willaway”,+ nispa.
5 Jinan Gueaziqa willasharqan imaynatachus Eliseo juj wawata kausarichirqan chayta,+ chay ratun chay wawaq mamanqa chayamurqan wasintawan jallp’antawan kutichipunanpaq reyta valekuq.+ Chay warmita rikuspa jinan Gueaziqa reyta nirqan: “¡Wiraqocháy, kay warmiq wawantan Eliseoqa kausarichirqan, paytaqmi chay kausarichisqan wawa!”, nispa.
6 Jinan reyqa chay warmita tapurqan imaynatachus Eliseo wawanta kausarichirqan chayta, chay warmitaq llapanta willarqan. Chaymantataq reyqa palacionpi kaq juj autoridadta nirqan: “Kay warmiq lliu kaqninta kutichipuy, ripusqanmanta kunankama jayk’atachus chajranpi llank’aspa gananman karqan chay qolqetawan qopuy”, nispa.
7 Eliseon Damasco+ llaqtata rirqan, chay tiempopin Siria rey Ben-Adajqa+ onqosqa kasharqan. Jinan reyman willamurqanku: “Cheqaq Diospa profetanmi chayaramusqa”,+ nispa.
8 Chaymi Ben-Adajqa Azaelta+ nirqan: “Regalota aparikuspa phaway cheqaq Diospa profetanman riruy,+ Jehová Diosta tapuykapuwachun qhaliyasaqchus icha manachus chayta”, nispa.
9 Jinan Azaelqa Damasco llaqtamanta allin valorniyoq kaqkunata Eliseoman aparqan, chay regalokunataqa tawa chunka camellokunapin cargarqan. Eliseoq kasqanman chayaspataq nirqan: “Kamachiyki* Ben-Adajmi kachamushawan, paymi yachayta munashan onqoyninmanta qhaliyanqachus icha manachus chayta”, nispa.
10 Eliseotaq nirqan: “Phaway wiraqochaykita nimuy: Qhaliyankin, nispa. Ichaqa Jehová Diosmi willawanña wañupunanta”,+ nispa.
11 Jinan Eliseoqa mana chinkachispa Azaelta qhawarqan, chaymi Azaelqa p’enqarikurqanraq. Chaymantataq Diospa profetan Eliseoqa waqayta qallarirqan.
12 Jinan Azaelqa nirqan: “Wiraqocháy, ¿imamantan waqashanki?”, nispa. Chaymi Eliseoqa nirqan: “Allintan yachani Israel runakunata sinchita ñak’arichinaykita.+ Qanqa allin perqasqa llaqtakunatan kanaykunki, kallpasapa runakunatan espadawan wañuchinki, wawakunatan p’anaspa wañuchinki, onqoq warmikunatataq wijsanta khallanki”,+ nispa.
13 Chayta niqtinmi Azaelqa nirqan: “Kay kamachiykiqa mana valeq alqo jinallan kani, chaychu chayta ruwayman”, nispa. Eliseon ichaqa nirqan: “Qanmi Siria runakunaq reynin kapunki,+ chaytan Jehová Dios niwan”, nispa.
14 Chaymantataq Azaelqa Eliseoq kasqanmanta ripuspa Siria reypa kasqanman chayarqan. Jinan reyqa tapurqan: “¿Imanimusunkin Eliseo?”, nispa. Azaeltaq nirqan: “Qhaliyallanqan ama llakikuchunchu, nispan nimuwan”,+ nispa.
15 Ichaqa qhepantin p’unchaymi Azaelqa juj frazadata unuman challpuruspa reyta uyanpi ñit’irurqan, chhaynapin Siria reyqa mukisqa* wañupurqan.+ Chay qhepamantaq Azaelqa rey kapurqan.+
16 Jehosafatpa churin Jehorammi+ Judá ayllupi rey kapurqan Ajabpa churin Jehoram+ pisqa wataña Israelpi kamachikushaqtin. Chay tiempopaqqa Jehorampa papan Jehosafatmi Judá ayllupiqa kamachikusharqanraq.
17 Jehoramqa kinsa chunka iskayniyoq watanpi kashaspan kamachikuyta qallarirqan, pusaq watataq Jerusalenmanta kamachirqan.
18 Payqa Ajabpa ususinwanmi casarakurqan,+ chaymi Ajabpa familian jina+ Jehová Diospa cheqnisqan ruwaykunata ruwarqan,+ chhaynapin paypas Israel reykuna jina Diospa cheqnisqan ruwaykunata ruwarqan.+
19 Jehová Diosmi ichaqa kamachin Davidta khuyapayasqanrayku Judá aylluta mana chinkachiyta munarqanchu.+ Paymi Davidman prometerqan familianmanta runakunallapuni wiñaypaq kamachikunanta.*+
20 Jehorampa kamachikusqan tiempopin Edom runakuna Judá ayllu contra jatarirqanku,+ jinan Edom runakunaqa paykunalla juj reyta ajllakurqanku.+
21 Chaymi Jehoramqa llapa carretakunantin Zairman rirqan. Chaypi kashaqtinmi Edom runakunaqa Jehoramtawan carretakunaq comandantenkunatawan muyuykurqanku, Jehorammi ichaqa juj tuta jatarispa chay Edom runakunata atiparqan, jinan llapa soldadokunaqa karpankuman ayqekurqanku.
22 Chaywanpas kunan p’unchaykaman Edom runakunaqa Judá ayllu contrallapuni kashanku. Chay p’unchaykunapin Lifná+ llaqta runakunapas Judá ayllu contra jatarillarqankutaq.
23 Jehorampa wakin ruwasqankunaqa lliumi Judá ayllu reykunamanta willaq libropi qelqasqa kashan.
24 Chaymantataq Jehoramqa ñaupa taytankuna jina wañukapurqan, jinaspa ñaupa taytankunatawan kuskata Davidpa Llaqtan nisqapi p’ampapurqanku.+ Chay qhepamantaq churin Ocozías+ rey kapurqan.
25 Jehorampa churin Ocoziasmi Judá ayllupi kamachikuyta qallarirqan Ajabpa churin Jehoram chunka iskayniyoq wataña Israelpi kamachikushaqtin.+
26 Ocoziasqa iskay chunka iskayniyoq watanpi kashaspan kamachikuyta qallarirqan, payqa juj watan Jerusalenmanta kamachirqan. Paypa mamanmi karqan Atalía,+ Ataliaqa Israel rey Omripa+ nietanmi* karqan.
27 Ocoziaspa papanqa Ajabpa familianmanta kaq warmiwanmi casarakurqan,+ chaymi Ocoziasqa Ajabpa familian jina+ Jehová Diospa cheqnisqan ruwaykunata ruwarqan.
28 Ocoziasmi Ajabpa churin Jehoramwan kuska Ramoj-Galaad+ llaqtata rirqanku Siria runakunaq reynin Azaelwan maqanakuq, chaypin Siria runakunaqa Jehoramta k’irimurqanku.+
29 Chay Ramoj-Galaad* llaqtapi Siria runakuna k’irimuqtinkun rey Jehoramqa Jezrel+ llaqtaman kutipurqan, chhaynapi Siria rey Azaelwan maqanakuspa Ramoj-Galaad llaqtapi k’irisqankumanta qhaliyapunanpaq.+ Ajabpa churin Jehoramqa Jezrel llaqtapin k’irisqa* kasharqan, chaymi Jehorampa churin Judá ayllu rey Ocoziasqa paywan tupaq rirqan.
Uraypi willakuykuna
^ Hebreo rimaypiqa “Diospa runan” ninmi.
^ Hebreo rimaypiqa “Wawayki” ninmi.
^ Mukiytaqa “muk’iy” nillankutaqmi.
^ Hebreo rimaypiqa “paymanpas churinkunamanpas wiñaypaq lamparata qonanta” ninmi.
^ Hebreo rimaypiqa “ususinmi” ninmi.
^ Hebreo rimaypiqa “Ramá” ninmi. Ramá sutiqa Ramoj-Galaad sutimantan jamun.
^ Chaypiqa “onqosqa” nillanmantaqmi.
