2 Samuel 1:1-27
1 Saulpa wañupusqan qhepamanmi Davidqa Amalec runakunata atipasqanmanta Ziclag+ llaqtaman kutipurqan, chaypin iskay p’unchay qhepakurqan.
2 Kinsa kaq p’unchaymantaq Davidpa kasqanman juj runa chayamurqan. Payqa Saulpa kasqanmantan jamusqa p’achanpas llik’i-llik’illaña, umanpas jallp’akamallaña. Davidman asuykuspataq chay runaqa qonqorikuspa pampakama k’umuykurqan.
3 Jinan Davidqa tapurqan: “¿Maymantan jamushanki?”, nispa. Chay runataq nirqan: “Israel runakunaq karpa-karpanmantan ayqekamushani”, nispa.
4 Chaymi Davidqa nillarqantaq: “Ama jinachu kay, willaway, ¿iman pasarun?”, nispa. Chay runataq nirqan: “Israel soldadokunan guerrapi atipachikuspa ayqekapunku, askhan wañupunku. Saulpas wawan Jonatanpas wañupunkun”,+ nispa.
5 Davidtaq chay waynata tapurqan: “¿Imaynapitaq yachanki Saulpas wawan Jonatanpas wañupusqantari?”, nispa.
6 Jinan chay waynaqa nirqan: “Guilboa orqopi+ kashaspan qonqaylla Saulta rikuruni, payqa lanzanman jap’ipaykukuspan kashasqa. Filistea soldadokunataq qayllaykamushasqakuña, wakin carretakunantin wakintaq caballopi sillaykusqa.+
7 Jinan payqa kutirimuspa rikuramuwan, jinaspa wajamuwan. Noqataq nini: ¿Imapin yanapaykiman wiraqocháy?, nispa.
8 Chaymantataq niwan: ¿Pin kanki?, nispa. Noqataq nini: Amalec runan kani,+ nispa.
9 Jinan niwan: Valekuykin, wañuchipullawayña, manan wañuyta atinichu, khaynatan ñak’arishani, nispa.
10 Chaymi noqaqa sinchi k’irisqatapuni rikuspa manan kausanmanñachu nispa wañurachipurqani.+ Jinan umanmanta coronanta orqospa makinmantapas pulseranta orqospa, qanman wiraqocháy apamushayki”, nispa.
11 Chayta uyarispan Davidpas runankunapas p’achankuta llik’ikurqanku.
12 Paykunaqa sinchitan waqaykurqanku Saulpas, Jonatanpas, Jehová Diospa runankunapas, Israel runakunapas wañupusqankumanta;+ tardekamataqmi ayunarqankupas.+
13 Jinan Davidqa chay waynata nirqan: “¿Maymantan kanki?”, nispa. Chay waynataq nirqan: “Amalec runan kani, forastero runaq wawan”, nispa.
14 Chaymi Davidqa nirqan: “¿Imanispan qan Jehová Diospa ajllakusqanta wañurachirqanki?”,+ nispa.
15 Chayta nispan Davidqa jujnin kamachinta wajaspa nirqan: “¡Jamuy! ¡Kay runata wañuchiy!”, nispa. Jinan chay runata wañuchipurqan.+
16 Davidmi chay waynata nirqan: “Qan kikiykin wañunaykipaqqa juchayoq kanki. Qan kikiykin simiykiwan juchachakurqanki: Noqan Jehová Diospa ajllakusqanta wañuchirqani,+ nispa”.
17 Chaymi Davidqa Saulwan Jonatanwan wañupusqankumanta khuyayta takirqan,+
18 chay takita Judá ayllu runakunaman yachachimunankupaqtaq kamachirqanpas. Chay takitan sutichakun: “Flechana arco”, nispa. Chay takiqa Jasar libropin+ qelqasqa kashan; khaynatan nin:
19 “¡Ay Israel llaqta! Ancha munay runakunan orqoyki patapi wañupun.+
¡Atiyniyoq runakunan guerrapi wañupun!
20 Amapuni willaychischu Gaj llaqta runakunaman,+amapuni willaychischu Asquelón callekunapi.
Filistea runakunaq ususinkunachá kusikunman,Diosta mana serviq* runakunaq ususinkunachá kusikuymanta tusuykunkuman.
21 Guilboa orqokuna,+qankuna patapi ama ima sullapas* ni parapas kachunchu,Diosman ofrendata jaywanapaqpas campokunapi ama ruruchunchu.+
Chay orqokunapin atiyniyoq runakunaq jark’apakunan escudo pisichasqa karqan,Saulpa escudonqa manañan aceitewan jawisqañachu kanqa.
22 Jonatanpa flechanan arcoqa atipallaqpunin,+Saulpa espadanqa wañuchillaqpunin.+
Flechana arcopas espadapas atiyniyoq runakunatan wañuchiq, enemigokunaq yawarnintan jich’ariq.
23 Saulpas Jonatanpas+ ancha munasqan karqanku,wañuspapas kuskallapunin wañurqanku.+
Ankakunamantapas aswan usqhayllan phawaqku,+leonkunamantapas aswan kallpasapan kaqku.+
24 Israel runakunaq ususinkuna, Saulmanta waqaychis,paymi k’anchaq puka p’achawan allinta p’achachirqasunkichis,qori adornokunayoq p’achawanmi churarqasunkichis.
25 ¡Ay Israel llaqta, atiyniyoq runakunan guerrapi wañupun!
¡Jonatanmi orqoyki patapi wañupun!+
26 ¡Jonatán wayqelláy! Qanmantan sinchi llakisqa kashani.
Maytan munakurqayki.+
Munakuyniykiqa warmikunaq munakuyninmantapas aswanraqmi karqan.+
27 ¡Ay imaraqmi! Atiyniyoq runakunan wañupun,guerrapaq armakunan chinkapun”, nispa.
Uraypi willakuykuna
^ Hebreo rimaypiqa “qhari kaynin qaracha mana kuchusqa” ninmi.
^ Sullataqa “chhulla” nillankutaqmi.
