2 Samuel 13:1-39
13 Davidpa churin Absalonpan karqan juj panan, sutinmi karqan Tamar,+ payqa munay rijch’ayniyoq sipasmi karqan. Paymantan Davidpa juj kaq churin Amnonqa+ enamorasqa kasharqan.
2 Chaymi payqa llakikuymanta onqorqanraq. Panan Tamarqa manan pi qhariwanpas puñurqanraqchu, chaymi Amnonpaqqa sasa karqan, manataqmi ima ruwaytapas atirqanchu.
3 Amnonpa amigonmi karqan yuyaysapa runa Jehonadab,+ payqa Davidpa wayqen Simeapa+ churinmi karqan.
4 Jehonadabmi Amnonta tapurqan: “¿Imaraykutaq qanri reypa churin kashaspayki sapa tutamantan llakisqalla kashanki? Willaykuway”, nispa. Amnontaq nirqan: “Absalón wayqeypa panan Tamarmantan enamorasqa kashani”,+ nispa.
5 Jinan Jehonadabqa nirqan: “Onqosqaman tukuspa puñunaykiman jaykuy, papayki jamuqtintaq ninki: Ama jinachu kay, panay Tamar jamuchun, jinaspa onqosqakunapaq mijunata ñaupaypi wayk’uspa pay kikin jaywawachun, nispa”.
6 Jinan Amnonqa onqosqaman tukuspa puñunanman jaykurqan, papan David visitamuqtintaq Amnonqa nirqan: “Valekuykin, panay Tamarta kachamuway, ñaupaypi iskay t’antata sonqoman rijch’akuqta ruwapuwachun, jinaspa pay kikin jaywawachun”, nispa.
7 Tamarqa wasipin kasharqan, jinan Davidqa willachimurqan: “Ama jinachu kay, phaway turayki Amnonpa wasinta riruspa imallatapas wayk’urampuy”, nispa.
8 Chaymi Tamarqa Amnón turanpa wasinta rirqan, maypichus puñusharqan chayman. Jinaspa Amnonpa rikushasqan t’antata ruwapurqan.
9 Chaymantataq chay ruwasqan t’antata turan Amnonman jaywarqan, paymi ichaqa mana mijuyta munarqanchu, aswanmi nirqan: “¡Llapaykichis lloqsiychis!”, nispa. Jinan llapanku lloqsirqanku.
10 Chaymantataq Amnonqa Tamarta nirqan: “Puñunay cuartoman apamuspa qan kikiyki mijuchiway”, nispa. Chaymi Tamarqa chay ruwasqan t’antata turanpa puñunan cuartoman apaykurqan.
11 Mijunata jaywananpaq qayllaykuqtintaq Amnonqa Tamarta jap’iruspa nirqan: “Panáy, noqawan puñuy”, nispa.
12 Tamartaq ichaqa nirqan: “¡Amayá turáy chaytaqa ruwawaychu! ¡Ama pisichawaychu! Israelpiqa juchan chay ruwayqa,+ ama chhayna p’enqayta ruwaychu.+
13 Chayta ruwawaqtiykiqa millaytachá runakunaqa qhawawankuman, qantapas millaytachá Israelpiqa qhawasunkikuman. Aswanpas reyta nimuy, payqa manan noqawan tiyanaykitaqa jark’asunkichu”, nispa.
14 Amnonmi ichaqa mana kasurqanchu. Kallpasapa kasqanraykun payqa Tamarta violaspa pisicharqan.
15 Chaymantataq Amnonqa qonqaylla Tamarta sinchita cheqnikuyta qallarirqan. Ñaupaqpiqa maytan munakurqan, qhepamantaq ichaqa sinchita cheqnikapurqan. Chaymi nirqan: “¡Jatariy, lloqsiy kaymanta!”, nispa.
16 Jinan Tamarqa nirqan: “¡Ama turáy, ama kaymantaqa qarqowaychu! ¡Chayqa kay ruwawasqaykimantapas aswan millayraqchá kanman!”, nispa. Amnonmi ichaqa mana kasurqanchu.
17 Aswanmi kamachinta wajaspa nirqan: “Kay warmita jawaman orqoy, jinaspa punkuta aldabawan wisq’ay, manan rikuyta munanichu”, nispa.
18 Jinan kamachinqa jawaman payta orqospa punkuta aldabawan wisq’arqan. (Tamarqa munay largo p’achawan churasqan kasharqan. Chhaynatan reypa doncella sipas* ususinkunaqa p’achakuqku).
19 Chaymi Tamarqa usphawan umanman churakurqan,+ munay largo p’achantapas llik’ikurqan. Umanta jap’iykuspataq alto kunkawan waqaykuspa ripurqan.
20 Tamarta rikuspataq turan Absalonqa+ nirqan: “Turayki Amnonpunin kaytaqa ruwaramusunki ¿riki? Jina kachun, Amnonqa turaykin,+ ama pimanpas willankichu. Amaña nishuta chaypi piensaychu”, nispa. Chaymantapachan Tamarqa turan Absalonpa wasinpi tiyapurqan runakunamanta t’aqasqa.
21 Chayta yacharuspan rey Davidqa sinchita Amnonpaq phiñakurqan.+ Ichaqa phiwi* churin kasqanrayku munakusqanrayku iman mana imanirqanpaschu; manan sonqonta k’iriyta munarqanchu.
22 Absalonpas Amnontaqa manan imanirqanpaschu, ichaqa panan Tamarta pisichasqanraykun cheqnikurqan.+
23 Iskay wata qhepatataq Absalonqa Efraín+ ayllu cercapi, Baal-Azorpi ovejankunaq willmanta rutuchisharqan. Chaymi payqa reypa llapan wawankunata juj fiestaman invitarqan.+
24 Rey Davidman rispataq Absalonqa nirqan: “Reyníy, ovejaykunaq willmantan rutuchishani. Ama jinachu kay, kamachiykikunawan kuska jaku risunchis”, nispa.
25 Rey Davidmi ichaqa nirqan: “Manan wawáy riymanchu. Llapayku risaqku chayqa sasa atiendenachá kaykuman”, nispa. Maytaña Absalón rogarqan chaypas manapunin riyta munarqanchu, aswanmi bendeciykurqan.
26 Jinan Absalonqa nirqan: “Manataq qan rinkichu chayqa, wayqey Amnonyá noqaykuwan richun”,+ nispa. Chaymi rey Davidqa nirqan: “¿Imaraykutaq Amnonwanri riyta munanki?”, nispa.
27 Absalón rogasqanraykun ichaqa rey Davidqa kacharqan Amnontapas lliu churinkunatapas.
28 Chaymantataq Absalonqa kamachinkunata nirqan: “Makillan kashankichis. Vinota ujaspa Amnón kusirikushaqtinmi noqa kamachisaykichis: ¡Amnonta wañuchiychis!, nispa. Chay ratun qankunaqa wañuchinkichis. Ama manchakuspan chayta ruwankichis, noqan kamachishaykichis. Kallpachakuychis, valiente kaychis”, nispa.
29 Jinan Absalonpa kamachinkunaqa paypa kamachisqanman jina Amnonta wañuchirqanku. Rey Davidpa wakin churinkunataq sapankanku mulankuman sillaykukuspa ayqekurqanku.
30 Ñanllataraq rishaqtinkutaq rey Davidman willarqanku: “Absalonmi llapa wawaykikunata wañurachipun, manan ni jujpas kausanchu”, nispa.
31 Chayta niqtinkun rey Davidqa sayarispa p’achanta llik’ikurqan, jinaspataq pampaman wijch’ukurqan. Kamachinkunapas p’achankutan llik’ikullarqankutaq, jinan rey Davidpa ladonpi sayasharqanku.
32 Davidpa wayqen Simeapa+ churin Jehonadabtaq+ ichaqa Davidta nirqan: “Wiraqocháy, ama chay nisqankutaqa creeychu, manan llapan wawaykikunatachu wañuchimunku, Amnonllatan wañuchimunku.+ Absalonmi payta wañuchinankupaqqa kamachirqan. Tamar+ pananta violasqan+ p’unchaymantapachan payqa wañuchiytapuni munasharqan.+
33 Wiraqocháy ama llakikuychu, manan cheqaqchu reypa llapa wawankunatan wañuchipunku nisqankuqa. Amnonllan wañusqaqa kashan”, nispa.
34 Absalontaq ichaqa ayqekapurqan.+ Chaymantataq llaqta qhawaqqa rikurqan orqoq qayllanta riq ñanninta askha runakuna jamushaqta.
35 Jinan Jehonadabqa+ reyta nirqan: “¡Qhawariy reyníy! Noqaqa nisharqaykipunin, wawaykikunaqa kutimpushankun”, nispa.
36 Jehonadab rimayta tukuruqtin jinan rey Davidpa churinkunaqa khuyayta waqaykuspa punkuta jaykumurqanku. Rey Davidpas kamachinkunantinmi sonqo nanayta waqaykullarqankutaq.
37 Rey Davidqa askha p’unchaykunan wawan Amnonmanta waqarqan. Absalontaq ichaqa Amiujpa churin Talmaipa+ kasqanman ayqekurqan, Talmaiqa Guesur runakunaq reyninmi karqan.
38 Absalonqa kinsa watan Guesurpi+ tiyamurqan.
39 P’unchaykuna pasaqtintaq rey Davidpa sonqonqa tiyaykapurqan Amnón wawanpa wañupusqanmanta. Chay qhepamantaq ichaqa Absalón wawanwanñataq tupaytapuni munasharqan.
Uraypi willakuykuna
^ Doncella sipastaqa “qhariwan mana jayk’aq puñuq sipas” nillankutaqmi.
