2 Samuel 14:1-33
14 Zeruyapa+ churin Joabmi yacharurqan rey Davidqa churin Absalonwan tupaytapuni munashasqanta.+
2 Chaymi Joabqa Tecoa+ llaqtamanta juj yuyaysapa warmita maskhachimurqan, chay warmitan nirqan: “Kayta valekusayki, engañollawan khuyay uyayoqman tukuy, wañuqninmanta unayña llakikushaq warmiman jina. Piniykipas wañupunman jina luto p’achawan churarukuy, amataq aceitewanqa jawikunkichu.+
3 Chaymantataq reypa kasqanman rinki, jinaspa imatachus nisayki chayta lliuta nimunki”, nispa. Jinan Joabqa imakunatachus rimananta chay warmiman yachachirqan.
4 Chaymi Tecoa llaqtayoq warmiqa reypa kasqanman rirqan. Chayaspataq qonqorikuspa pampakama k’umuykurqan, jinaspa valekurqan: “¡Yanapaykuway reyníy!”, nispa.
5 Rey Davidtaq nirqan: “¿Iman pasarusunki?”, nispa. Paytaq nirqan: “¡Llakiq ñit’isqanmi kashani! Qosaymi wañukapun, viuda warmin kani.
6 Iskay wawayoqmi karqani. Juj p’unchaymi campopi kashaspa paykunapura maqanakurqanku. Manan pipas t’aqaq karqanchu, jinan jujnin juj kaqta wañurachipurqan.
7 Kunantaq llapa familiaykuna noqa contra jatarispa nishawanku: ¡Wayqen wañuchiq wawaykita entregawayku,+ sapallanña herencia chaskiq kaqtinpas! ¡Payqa wañunanpunin wayqenta wañuchisqanmanta!, nispa. Chay wawayta wañuchinqaku chayqa mana piniyoqchá qhepakapusaq, payllapiñan suyakusharqani. Qosaypa sutinpas familiaypas chinkapunqachá”, nispa.
8 Jinan rey Davidqa chay warmita nirqan: “Ama llakikuspalla wasiykiman kutipuy. Noqaña nisaq kay problemaykita allichanankupaq”, nispa.
9 Jinan chay warmiqa nirqan: “Reyníy, wawaypa juchanmantaqa noqan taytaypa familianpiwan juchachasqa kasaqku. Qanpas gobiernoykipas manan juchachasqachu kankichis”, nispa.
10 Chaymantataq reyqa nirqan: “Sichus pipas jujmanta imatapas nisunki chayqa, noqaman payta apamuwanki, chhaynapin manaña jayk’aqpas imatapas nisunkichu”, nispa.
11 Chay warmin ichaqa nirqan: “Valekuykin reyníy, Jehová Diosniykiq sutinpi juraway, wañuq wawaymanta vengakuq+ ama kay wawayta wañuchinanpaq”, nispa. Jinan rey Davidqa nirqan: “Wiñaypaq kausaq Jehová Diospa sutinpin jurayki,+ wawaykitaqa manan pipas ni juj chujchallantapas tupaykunqachu”, nispa.
12 Chaymantataq chay warmiqa nirqan: “Perdonaykuway wiraqocháy, kaytawanmi niyta munashayki”, nispa. Rey Davidtaq nirqan: “Niway”, nispa.
13 Jinan chay warmiqa nirqan: “Wiraqocháy, chhaynaqa ¿imaraykutaq qanpas Diospa llaqtan contrari mana allinta ruwashanki?+ Wawaykita mana kutichimuspan qanpas mana allinta ruwashanki.+ Kunan niwasqaykiqa manan kay ruwasqaykiwanqa tupanchu.
14 Llapa runapas wañullasunmi. Wañuspaqa pampaman unu jich’asqa jinan kapunchis mana oqariy atiy. Chaywanpas Diosqa manan munanchu pillapas wañunantaqa, chaymi payqa munashanpuni llaqtanmanta wijch’usqa runakuna kutimpunankuta.
15 Runakunaq niwasqankuta manchakuspan noqaqa kayta niq jamushayki. Paykunatan noqaqa nirqani: Ama jinachu kaychis, reywanraq parlaramusaq, yaqapaschá payqa yanapawanman.
16 Yaqapaschá reyqa valekusqayta uyariwanman, jinaspa vengakuq runamanta noqatapas wawaytapas librawankuman, chhaynapi Diospa qowasqanku herenciata ama qechuwanankupaq,+ nispa.
17 Reyníy, qanqa Diospa angelnin jinan allinta reparanki imachus allin imataqchus mana allin chayta. Chaymi nirqani: Reyniypa niwasqanqa sonqoytan tiyaykachinqa, nispa. Reyníy, Jehová Diosniykiqa qanwanpuni kashachun”, nispa.
18 Jinan rey Davidqa nirqan: “Kay tapusqayman sut’illanta willawanki, aman imatapas pakawankichu”, nispa. Chay warmitaq nirqan: “Niway wiraqocháy”, nispa.
19 Chaymi rey Davidqa tapurqan: “¿Joabchu tukuy chaykunata yachachispa kachamurqasunki?”,+ nispa. Jinan chay warmiqa nirqan: “Arí reyníy, ñaupaykipin jurayki, nisqaykiqa cheqaqmi, Joabmi kachamuwan. Paymi tukuy chaykunata rimanaypaq yachachimuwan.
20 Joabmi tukuy chaykunata nimuwan Absalonta kutichimunaykipaq. Ichaqa wiraqocháy, qanqa Diospa angelnin jinan yachayniyoq kanki, imachus kay nacionpi pasashasqantaqa lliutan yachanki”, nispa.
21 Chaymantataq rey Davidqa Joabta wajachispa nirqan: “Nisqaykiman jinan ruwasaq.+ Chhaynaqa phaway Absalonta kutichimuy”,+ nispa.
22 Chayta niqtin jinan Joabqa qonqorikuspa pampakama k’umuykurqan, jinaspa rey Davidta jatuncharqan. Chaymantataq nirqan: “Reyníy, qanqa imatachus mañakusqaytan uyariwarqanki, chaymi kunanqa allinta yachani kay kamachiykita sumaqta qhawariwasqaykita”, nispa.
23 Jinan Joabqa Guesurman+ rispa Absalonta Jerusalenman pusamurqan.
24 Rey Davidmi ichaqa nirqan: “Wasinman kutimpuchun, noqawan tupaq ichaqa ama jamuchunchu”, nispa. Jinan Absalonqa wasinman kutimpurqan, reywan tupaqmi ichaqa mana rirqanchu.
25 Absalonqa munay rijch’ayniyoq kasqanraykun lliu Israelpi jatunchasqa karqan, pay jinaqa manan pipas karqanchu. Absalonqa chakinmanta umankaman munay rijch’ayniyoqpuni karqan.
26 Absalonqa sapa watanmi chujchanta rutuchikuq nishuta llasasqanrayku. Chay rutuchikusqan chujchatan pesaqku reypa pesananpi,* yaqa iskay kilo kuskantan* pesaq.
27 Absalonqa kinsa churiyoq+ juj ususiyoqmi karqan. Ususinpa sutinmi karqan Tamar, payqa munay rijch’ayniyoq warmin karqan.
28 Absalonqa iskay wata junt’añan Jerusalenpi tiyasharqan, ichaqa manan rirqanchu rey Davidwan tupaq.+
29 Chaymi Absalonqa Joabta wajachimurqan reyman kachananpaq, Joabmi ichaqa Absalonpa kasqanman mana riyta munarqanchu. Jujmanta wajachiqtinpas manapunin kasukurqanchu.
30 Jinan Absalonqa kamachinkunata nirqan: “Joabpa chajranqa chajraypa ladollanpin kashan. Chaypin kashan cebadan, chayta kanaramuychis”, nispa. Chaymi kamachinkunaqa ninawan kanaykamurqanku.
31 Jinan Joabqa Absalonpa wasinta rispa nirqan: “¿Imaraykun kamachiykikuna chajrayta kanaykamurqanku?”, nispa.
32 Absalontaq Joabta nirqan: “Noqan wajachimurqayki reyman rispa: Reyníy, ¿imapaqtaq Guesurmantari jamurqani?+ Chaypaqqa jaqayllapichá qhepakamuyman karqan. Qanwanmi tupayta munani, sichus imatapas juchallikurqani chayqa wañuchiway, nispa nimunaykipaq”, nispa.
33 Jinan Joabqa reypa kasqanman jaykuspa Absalonpa nisqanta lliuta nirqan. Chaymi rey Davidqa Absalonta wajachirqan, Absalontaq reypa kasqanman jaykurqan, jinaspa qonqorikuspa pampakama k’umuykurqan. Jinan rey Davidqa Absalonta much’aykurqan.+
Uraypi willakuykuna
^ Chayqa yaqapaschá pesasqa karqan reypa tiyanan palaciopi rumimanta ruwasqa pesopi. Otaq yaqapaschá chay pesoqa jujniray karqan común pesokunamanta.
^ Hebreo rimaypiqa “iskay pachaj siclota” ninmi. Qhaway “Astawan yachanapaq B14” nisqata.
