2 Samuel 18:1-33
18 Jinan Davidqa runankunata yuparqan, jinaspa waranqa-waranqaman pachaj-pachajman t’aqaruspa sapanka t’aqaman umallikunata churarqan.+
2 Chaymantataq Davidqa chay runankunata kinsa jatun t’aqaman t’aqarqan. Juj kaq t’aqata umallinanpaqmi churarqan Zeruyapa+ churin Joabta,+ iskay kaq t’aqamantaq churarqan Joabpa wayqen Abisaita,+ kinsa kaq t’aqamantaq Gaj llaqtayoq Ittaita.+ Chaymantataq rey Davidqa paykunata nirqan: “Noqapas qankunawanmi risaq”, nispa.
3 Paykunataq nirqanku: “Ama riychu reyníy.+ Ayqekamusaqkuña chaypas, kuskantaña wañuchimuwanqaku chaypas paykunamanqa manan imapas qokunqachu. Qanpa vidaykin ichaqa valen chunka waranqa runaykikunaq vidan jina.+ Chayrayku aswanpas kayllamanta yanapayta apachimuwankiku”, nispa.
4 Rey Davidtaq nirqan: “Nisqaykichisman jina kachun”, nispa. Jinan rey Davidqa llaqta punkullapi qhepakurqan, llapa runankunataq maqanakuq lloqsirqanku pachaj-pachajninpi waranqa-waranqanpi.
5 Chaymantataq rey Davidqa Joabta, Abisaita, Ittaitawan kamachirqan: “Noqata munakuwasqaykichisrayku, Absalonta ama imanankichispaschu”,+ nispa. Reypa chay kamachisqantaqa llapa runakunan uyarirqanku.
6 Jinan Davidpa runankunaqa campoman lloqsirqanku Absalonta yanapaq Israel runakunawan maqanakuq, jinaspa Efraín sach’a-sach’api maqanakurqanku.+
7 Chay maqanakuypiqa Davidpa runankunan atiparqanku Absalonta yanapaq Israel runakunataqa.+ Chay p’unchayqa iskay chunka waranqa runakunan wañurqanku.
8 Chay maqanakuyqa llapa chay lado jallp’antinmanmi ch’eqerirqan. Espadawan wañuchisqa kaqkunamantaqa sach’a-sach’apin aswan askha wañurqanku.
9 Absalonqa mulanpi sillaykusqa rishaspan qonqay Davidpa runankunawan tuparqan. Jinan mulanqa jatun sach’a ukhuman winarukurqan, jinaspan Absalonpa chujchanqa chay sach’aq ramankunaman mayt’urukurqan. Mulanmi ichaqa mana sayarqanchu chaymi Absalonqa sach’api warkurayapurqan.
10 Juj runataq chayta rikuspa Joabman willamurqan:+ “Absalonmi juj jatun sach’api warkurayashan”, nispa.
11 Joabtaq chay runata nirqan: “Rikushaspaykiri ¿imaraykutaq mana wañuchirqankichu? Wañuchiwaq karqan chayqa chunka qolqeta juj correatawanmi qoykiman karqan”, nispa.
12 Chay runan ichaqa Joabta nirqan: “Waranqa qolqetaña qowankuman chaypas manapunin noqaqa reypa wawantaqa llamiykullaymanpaschu. Reymi qantapas, Abisaitapas, Ittaitapas kamachirqasunkichis: Absalontaqa aman pipas imananqapaschu,+ nispa.
13 Sichus chay kamachisqasuykichista mana kasukuspa Absalonta wañuchiyman karqan chayqa, manapunin chaytaqa reymanta pakayta atiymanchu karqan, qanpas manan yanapawankimanchu karqan”, nispa.
14 Chayta niqtinmi Joabqa nirqan: “¡Yanqan qanwanqa tiempoyta usuchini!”, nispa. Jinan kinsa lanzakunata aparikuspa Absalonta sonqonpi sat’irurqan, chay ratuqa sach’allapiraqmi Absalonqa kausashaqlla warkurayasharqan.
15 Jinamantaq Joabpa arma apaysiqnin chunka runakuna chayman chayarqanku, jinaspa Absalonta jujpaqkama wañuchipurqanku.+
16 Chaymantataq Joabqa oveja waqrata tocaspa chay guerrata tukuchipurqan, jinan Davidpa runankunaqa Absalonta yanapaq Israel runakunata qatipasqankumanta kutimpurqanku.
17 Absalonpa cuerpontataq sach’a-sach’api kaq t’oqoman wijch’uykurqanku, jinaspa chay pataman rumiwan montoykurqanku.+ Absalonta yanapaq Israel runakunataq llapanku wasinkuman ayqekapurqanku.
18 Absalonqa kausashallasparaqmi Reypa Wayq’on+ nisqapi juj columnata sayarichirqan. Paymi nirqan: “Manan waway kanchu sutiyta apananpaq”,+ nispa. Chaymi chay columnata sutinwan suticharqan, chaytan kunankama sutichanku Absalonpa Columnan nispa.
19 Sadocpa churin Aimaztaq+ Joabta nirqan: “Ama jinachu kay rirusaq, reyman kay willakuyta willaramusaq. Jehová Diosmi enemigonkunamanta libraspa justiciata paypaq ruwapun”,+ nispa.
20 Joabmi ichaqa nirqan: “Manan riwaqchu, juj p’unchayña rinki. Kunanqa reypa wawanmi wañupun, chaymi mana riwaqchu”,+ nispa.
21 Cus runatan+ ichaqa Joab nirqan: “Phaway, imachus rikusqaykita reyman willamuy”, nispa. Jinan Cus runaqa Joabpa ñaupanpi k’umuykurqan, chaymantataq phawaylla rirqan.
22 Sadocpa churin Aimazmi ichaqa jujmanta Joabta nillarqantaq: “Valekuykin wiraqocháy, Cus runaq qhepanta jinata rirusaq imaña kaqtinpas”, nispa. Joabtaq ichaqa nirqan: “Imapaqñataq riwaq wawáy, ¿imatañataq willamunkiri?”, nispa.
23 Chaywanpas Aimazqa jujmantan nillarqantaq: “Imaña kaqtinpas rirusaqpuni”, nispa. Chaymi Joabqa Aimazta nirqan: “Jinapasyá riy”, nispa. Jinan Aimazqa phawaylla rirqan Jordán jallp’anta riq ñanninta, Cus runatapas pasarurqanraqmi.
24 Llaqtaqa jawa punkuyoq ukhu punkuyoqmi karqan, chay punkukunaq chaupinpin Davidqa tiyasharqan.+ Llaqta qhawaqtaq+ perqawan tupaq punku pataman wicharqan, chaymanta qhawarispan rikurqan juj runa phawaylla jamushaqta.
25 Chay rikusqantan llaqta qhawaqqa alto kunkawan reyman willamurqan. Reytaq nirqan: “Sapallantaq jamushan chayqa ima willakuytachá apamushan”, nispa. Chay runa qayllaykamushaqtintaq
26 llaqta qhawaqqa juj runata phawaylla jamushaqta rikullarqantaq. Jinaspan punku qhawaqta alto kunkawan nimurqan: “¡Qhawariy! ¡Juj runapas sapallan phawaylla jamushallantaq!”, nispa. Jinan reyqa nirqan: “Chay runapas ima willakuytachá apamushallantaq”, nispa.
27 Llaqta qhawaqtaq nillarqantaq: “Ñaupaqta jamushaq runaqa Sadocpa churin Aimáz+ jinan phawamushan”, nispa. Chaymi reyqa nirqan: “Payqa allin runan. Allin willakuytapunin apamushanman”, nispa.
28 Jinan Aimazqa karullamantaraq reyta nimurqan: “¡Allin willakuytan apamushayki!”, nispa. Chaymantataq reyman qayllaykurqan, qonqorikuspa pampakama k’umuykuspataq reyta nirqan: “¡Jatunchasqa kachun Jehová Diosniyki! Paymi contraykipi sayariq enemigoykikunata makiykiman entregasunki”,+ nispa.
29 Rey Davidmi ichaqa tapurqan: “¿Allinchu kashan waway Absalón?”, nispa. Aimaztaq nirqan: “Qhepayta jamushaq kamachiykitawan Joab kachamushawaqtinkuqa ch’aqwaymi kasharqan, imamantachus ch’aqwasqankutaqa manan yachanichu”,+ nispa.
30 Jinan rey Davidqa nirqan: “Kay ladoman jamuy”, nispa. Chaymi Aimazqa chay ladollapi sayaykurqan.
31 Chayllamanmi Cus runaqa+ chayamurqan, jinaspa reyta nirqan: “Juj willakuytan apamushayki reyníy. Jehová Diosmi kay p’unchay justiciata ruwapusunki, paymi qan contra sayariq enemigoykikunamanta librasunki”,+ nispa.
32 Reytaq ichaqa nirqan: “¿Allinchu kashan waway Absalón?”, nispa. Cus runataq nirqan: “Wiraqocháy, wañuchiyta munaspa qan contra sayariqkunapas llapa enemigoykikunapas Absalón jina wañupuchunku”,+ nispa.
33 Chayta uyarispan reyqa mana imanakuytapas atirqanchu, jinaspan punku patapi kaq cuartoman wichaspa chaypi khuyayta waqaykurqan. Kayman jaqayman purispataq nirqan: “¡Ay wawalláy Absalón! ¡Ay wawalláy wawa! ¡Wawalláy Absalón! ¡Noqachá wañuyman karqan qan wañunaykimantaqa! ¡Imay sonqon wañukapunki wawalláy Absalón!”,+ nispa.
