2 Samuel 19:1-43
-
Absalonpa wañupusqanmanta Davidpa waqasqanmanta (1-4)
-
Joab Davidta anyasqanmanta (5-8a)
-
Jerusalén llaqtaman Davidpa kutipusqanmanta (8b-15)
-
Simeí perdonta mañakusqanmanta (16-23)
-
Mefiboset-ta yanqa tumpasqanku sut’inchakusqanmanta (24-30)
-
Barzilái jatunchasqa kasqanmanta (31-40)
-
Israel runakunawan Judá ayllu runakunawan phiñachinakusqankumanta (41-43)
19 Jinan Joabman willarqanku: “Reymi Absalón wawanmanta khuyayta waqaykushan”,+ nispa.
2 Chaytan runakunaqa uyarirqanku, chaymi chay p’unchayqa maqanakuypi atipamusqankumanta kusisqa kanankumantaqa, llakisqa kapurqanku.
3 Davidpa runankunaqa ch’inllan Manain llaqtaman kutimpurqanku,+ guerramanta ayqekamuspa p’enqaypi qhepaq soldadokuna jina.
4 Reyqa uyanta taparukuspan waqaykuspa fuerteta nirqan: “¡Ay wawalláy wawa! ¡Wawalláy Absalón! ¡Imay sonqon wañurapunki wawalláy Absalón!”,+ nispa.
5 Jinan Joabqa reypa kasqanman jaykuspa nirqan: “¿Imaraykun khaynata llapa kamachiykikunata p’enqayman churawankiku? ¿Manachu noqaykuqa qanpa vidaykita salvanaykupaq maqanakamurqayku? ¿Manachu churiykikunaq,+ ususiykikunaq,+ esposaykikunaq, tiyaqmasi warmiykikunaq*+ vidanta salvanaykupaq maqanakamurqayku?
6 Qanqa munakuqniykikunatan cheqnikunki, cheqnikuqniykikunatataq munakunki. Manamá noqaykuqa qanpaqqa imapas valesqaykuchu, ni soldadoykikunaq umallinkunapas ni llapa kamachiykikunapas, chaytan sut’ita kunanqa yachani. Sichus kunan Absalón kausashanman chayqa kusisqachá qanqa kashawaq llapaykuña wañusqa kashaykuman chaypas.
7 Chhaynaqa jatariy, lloqsispa kamachiykikunata kallpachamuy. Manachus rinki chayqa Jehová Diospa sutinpin jurayki, kay tutan llapa runaykikuna saqepusunkiku. Chaymi ichaqa mana jayk’aq ñak’arisqaykita ñak’arinki”, nispa.
8 Jinan reyqa sayarispa llaqta punkupi tiyaykurqan. Chaytataq llapa runakunaman willachimurqanku: “Reyqa llaqta punkupin tiyashan”, nispa. Chayta uyarispan runakunaqa llapanku reypa kasqanman rirqanku.
Absalonta yanapaq Israel runakunan ichaqa llapanku wasinkuman ayqekapurqanku.+
9 Israelpi kaq llapa ayllukunapin ch’aqway kasharqan, runakunan ninakusharqanku: “Rey Davidmi librawarqanchis Filistea runakunamantapas llapa enemigonchiskunamantapas,+ kunantaq wawan Absalonmanta ayqekuspa juj llaqtapi kashan.+
10 Rey kananpaq ajllasqanchis Absalonpas+ maqanakuypin wañupun.+ Chhaynaqa, ¿imaraykutaq jinallari kashanchis? Jaku reyta kutichimpusun”, nispa.
11 Rey Davidtaq sacerdote Sadocman+ Abiatarmanwan+ willachimurqan: “Judá ayllu umalliqkunata*+ khaynata nimuychis: Llapa Israel runakunaq rimasqanmi noqaman chayamuwan. Chhaynaqa, ¿imanaqtintaq qankunari jinalla kashankichis? Jamuychis jinaspa wasiyman kutichipuwaychis.
12 Qankunaqa wayqeykunan kankichis, familiaymi* kankichis. Usqhaylla jamuychis, ¿imaraykun suyashankichis juj ayllu runakunaraq wasiyman apawanankuta?, nispa.
13 Amasatataq+ ninkichis: Noqanchisqa familiantinmi kanchis. Kunanmantapachan Joabpa+ rantinpi soldadoykunaq umallinta churasayki, manachus chay nisqayta junt’asaq chayqa Dios sinchita castigawachun, nispa”.
14 Chaykunata nisqanwanmi llapa Judá ayllu runakunawan munachikurqan. Jinan paykunaqa rey Davidman willachimurqanku: “Reyniyku, llapa kamachiykikunapiwan kutimpuy”, nispa.
15 Jinan reyqa kutimpurqan jinaspa Jordán mayuman chayamurqan. Judá ayllu runakunataq Guilgal+ llaqtaman rirqanku reywan tupaq, chhaynapi Jordán mayu chimpayta yanapamunankupaq.
16 Baurin llaqtapi tiyaq Benjamín ayllumanta Guerapa churin Simeipas+ usqhayllan Judá ayllu runakunawan kuska rirqan rey Davidman aypaq.
17 Simeiqa Benjamín ayllumanta waranqa runakunantinmi rirqan. Saulpa kamachin Zibapas+ usqhayllan Jordán mayuman rirqan, chunka pisqayoq churinkunantin iskay chunka kamachinkunantin ima. Payqa reypa ñaupantaraqmi Jordán mayuman chayarqan.
18 Jinan Jordán mayuta chimparqan* reypa wasinpi kaqkunata chimpayta yanapamunanpaq, reyta tukuypi yanapananpaqwan. Jordán mayuta chimpanankuña kashaqtintaq Guerapa churin Simeiqa reypa ñaupanpi qonqorikuspa pampakama k’umuykurqan,
19 jinaspa reyta nirqan: “Wiraqocháy, ama juchachawaychu, qonqapuy Jerusalén llaqtamanta ripushaqtiyki ñakasqayta.+ Amapuni noqapaq phiñakuychu wiraqocháy.
20 Arí, noqaqa qan contran juchallikurqani. Chayraykun noqaqa Josepa familianmanta ñaupaqta qanwan tupaq jamushani”, nispa.
21 Chayta uyarispan Zeruyapa+ churin Abisaiqa+ nirqan: “Kay runaqa wañunanmi Jehová Diospa ajllakusqanta ñakasqanrayku”,+ nispa.
22 Davidmi ichaqa nirqan: “Zeruyapa wawankuna, ¿imamantan qankuna phiñakunkichis?+ ¿Imaraykun noqa contra jatarinkichis? ¡Qhawariychis! Jujmantan Israelpi rey kapuni. Chhaynaqa manan kunanqa Israelpiqa pipas wañunqachu”, nispa.
23 Chaymantataq reyqa Simeita nirqan: “Manan pipas wañuchisunkichu”, nispa. Chay nisqan mana yanqachu kasqanta rikuchinanpaqtaq jurarqan.+
24 Saulpa nieton Mefibosetpas+ rirqanmi reyta chaskiq. Jerusalenmanta rey David ripusqanmantapacha kutimunankamaqa manan payqa chakinta maqchikusqachu, sunkhantapas manan rutukusqachu, p’achantapas manan t’aqsakusqachu.
25 Jerusalenman chayaqtintaq* rey Davidqa payta tapurqan: “Mefibóset, ¿imaraykun mana noqawan rirqankichu?”, nispa.
26 Mefiboset-taq reyta nirqan: “Wiraqocháy, yachasqaykipas jina noqaqa wist’un kani,+ chaymi kamachiyta nirqani: Asnoyta caronarampuway reywan rinaypaq, nispa. Paymi ichaqa engañaruwan.+
27 Payqa llullakuspan noqamanta imaymanata willasqasunki.+ Ichaqa wiraqocháy, qanqa Diospa angelnin jinan kanki, chayrayku imachus munasqaykita noqawan ruway.
28 Qanqa wiraqocháy, munaspaqa lliutan wañuchiwaq karqan papaypa familiantaqa, ichaqa manan chaytachu ruwarqanki. Aswanpas khuyapayawaspan qanwan kuska mesaykipi mijuchiwarqanki.+ Chhaynaqa, ¡imanispañan imatapas mañakuykiman!”, nispa.
29 Chaymi rey Davidqa nirqan: “Amaña astawan rimasunñachu. Zibawan jallp’ata t’aqanakuychis”,+ nispa.
30 Mefiboset-taq reyta nirqan: “Wiraqocháy, pay llapanta jap’ikapuchun, noqaqa kusisqañan kashani wasiykiman kutimpusqaykimanta”, nispa.
31 Chaymantapas Galaad jallp’amanta Barzilái+ runan Roguelin llaqtamanta jamurqan Davidta yanapaq. Paymi yanapamurqan Jordán mayukama.
32 Barzilaiqa kuraq runañan karqan, pusaq chunka watayoq. Payqa qhapaq runan karqan, chaymi rey Davidman mijuykunata aparqan+ Manain llaqtapi qhepakushaqtin.
33 Rey Davidmi Barzilaita nirqan: “Jaku Jerusalén llaqtata, mesaypin sapa p’unchay mijunki”,+ nispa.
34 Barzilaitaq nirqan: “Noqaqa nishu kuraqñan kani, manan unaytañachu kausayman, imapaqñan qanwan kuska Jerusalenman riyman.
35 Noqaqa pusaq chunka wataypiñan kashani.+ Manan noqaqa reparaymanchu imachus allin imataqchus mana allin chaytaqa, mijunatapas ima tomanatapas manan reparaymanchu sumaqchus kashan icha manachus chaytaqa, takiqkunatapas manan allintañachu uyariyman.+ Imapaqñan noqata Jerusalenman pusawankiman, noqaqa sasa cuidanachá kayman.
36 Imapaqñan imatapas qowankiman reyníy, noqaqa kusisqañan kashani kay Jordán mayukama qanta yanapamusqaymanta.
37 Wiraqocháy, kutipullasaq llaqtayman chaypi wañukampunaypaq, chaypin tayta-mamaypa sepulturan kashan.+ Aswanpas Kiman+ kamachiykita pusay, pay qanwan kuska kay mayuta chimpachun, payman ima munasqaykitapas qoy”, nispa.
38 Jinan rey Davidqa nirqan: “Chhaynaqa Kiman richun noqawan, imataña paypaq mañakuwanki chaypas qosaqmi, qanta munakusqayraykun ima mañakusqaykitapas ruwasaq”, nispa.
39 Chaymantataq Davidpa llapa runankuna Jordán mayuta chimpayta qallarirqanku. Reytaq chimpananpaqña kashaspa Barzilaita bendecispa much’aykurqan,+ Barzilaitaq wasinman kutipurqan.
40 Jinan rey Davidqa Kimanwan kuska Guilgal+ ladoman chimparqanku. Llapa Judá ayllu runakunapas wakin Israel runakunapas reywan kuskan chimparqanku.+
41 Wakin Israel runakunataq ichaqa reyta nirqanku: “¿Imaraykun Judá ayllu runakuna pakallapi pusamurqasunkiku? ¿Imaraykun paykunalla familiaykitapas runaykikunatapas Jordán mayuta chimpachimurqanku?”,+ nispa.
42 Llapa Judá ayllu runakunataq paykunata nirqanku: “¿Imamantataq phiñakunkichisri? Reytaqa familiayku kaqtinmi yanapamuyku,+ manan interesraykuchu, manan imata chaskinaykuraykuchu”, nispa.
43 Israel runakunan ichaqa Judá ayllu runakunata nirqanku: “Noqaykuqa chunka ayllun kayku, chayraykun aswan derechoyoq kayku reyta kutichimpunaykupaq. Qankunalla apamusqaykichiswanmi pisichawankiku”, nispa. Israel runakunaq chay nisqanmantan ichaqa Judá ayllu runakunaq nisqan aswan k’araq karqan.
Uraypi willakuykuna
^ Tiyaqmasi warmikunaqa esposakuna jinan karqanku. Qhaway Explicasqa simikuna nisqapi “Tiyaqmasi warmi” nisqata.
^ Chaypiqa “kuraq runakunata” nillanmantaqmi.
^ Hebreo rimaypiqa “aychaymi tulluymi” ninmi.
^ Chaypiqa yaqapaschá “chimparqanku” nillanmantaq.
^ Chaypiqa yaqapaschá “Jerusalenmanta chayamuqtintaq” nillanmantaq.
