2 Samuel 20:1-26
20 Benjamín ayllumantan juj runa karqan Seba+ sutiyoq, payqa Bicripa churinmi karqan, paymi ch’aqwata jatarichisharqan. Oveja waqrata tocaspan+ nirqan: “¡Israel runakuna! Manan imapas Davidwanqa ruwananchis kanchu, manan Jesepa wawanmantaqa ima herenciapas chaskinanchis kanchu.+ ¡Jaku ripusunchis! Sapankanchis diosninchiskunaman kutipusun”,*+ nispa.
2 Chayta uyarispan llapa Israel runakunaqa Davidta saqepurqanku, jinaspa Bicripa churin Sebata qatikapurqanku.+ Judá ayllu runakunan ichaqa reyninkuta mana saqerqankuchu, chaymi Jordán mayumanta Jerusalén llaqtakama compañamurqanku.+
3 Jerusalenmanta ayqekushaspan Davidqa chunka tiyaqmasin warmikunata* wasinta cuidananpaq saqerqan.+ Chay warmikunatan Davidqa juj wasiman churarqan Jerusalenpi kaq wasinman* kutimuspa, paykunata cuidanankupaqtaq guardiakunata churarqan. Paykunamanqa manan mijunata faltachirqanchu, ichaqa manan jayk’aqpas paykunawanqa puñurqanñachu.+ Qosanku David kausasharqanña chaypas paykunaqa viudakuna jinan wañupunankukama chay wasipi tiyarqanku.
4 Rey Davidmi Amasata+ nirqan: “Llapa Judá ayllu runakunata kinsa p’unchayllapi juñumuy, jinaspa kayman jamuychis”, nispa.
5 Jinan Amasaqa Judá ayllu runakunata juñumuq rirqan, ichaqa manan kinsa p’unchayllapichu juñumurqan.
6 Chaymi Davidqa Abisaitañataq+ nirqan: “Phaway kamachiykunawan Bicripa churin Sebata+ qatiparuy, allin perqayoq llaqtaman jaykuruqtinqa manapas tarisunmanñachu. Chay runaqa Absalonmantapas aswan mana chanintapasraqchá ruwawasunman”,+ nispa.
7 Jinan paypa qhepanta rirqanku Joabpa+ runankuna, keretita runakuna, peletita runakuna,+ llapa kallpasapa runakunapiwan. Paykunaqa Bicripa churin Sebata qatipanankupaqmi Jerusalén llaqtamanta lloqsirqanku.
8 Gabaón+ llaqtapi kaq jatun rumiq qayllanman chayaqtinkutaq Amasaqa+ paykunaman aypamurqan. Joabqa maqanakuna p’achayoqmi kasharqan, cinturanpitaq juj espadata apasharqan. Amasaman qayllaykushaqtintaq espadan pampaman urmarqan.
9 Jinan Joabqa Amasata nirqan: “Allillanchu kashanki wayqéy”, nispa. Chaymantataq much’aykuq jina paña makinwan Amasapa sunkhanta llamiykurqan.
10 Jinan Joabqa qonqaylla Amasata espadanwan wijsanpi sat’irurqan,+ jinaspan ch’unchulninkuna lloqsimuspa pampamanraq urmarqan. Amasaqa manan yuyaykullarqanpaschu espadanwan payta wañuchinanta. Joabqa ch’ulla kutillata wijsanpi sat’iruspan Amasata wañuchipurqan. Chay qhepamantaq Joabqa wayqen Abisaipiwan Bicripa churin Sebata qatipashallarqanku.
11 Joabpa jujnin kamachintaq Amasapa cuerponpa ladonpi sayaykuspa nirqan: “¡Llapa Joabpa partenmanta kaqkuna, llapa rey Davidta yanapaqkuna Joabta qatikuychis!”, nispa.
12 Chaykamataq Amasaqa ñan purinapi yawarninpi qhospasharqan. Ñanninta riqkunaqa llapankun Amasapa cuerponpa ladonpi sayaykuqku. Chayta rikuspan Joabpa kamachinqa Amasapa cuerponta ñanpa juj ladonman apaspa p’achawan pakaykurqan.
13 Chay qhepatataq ichaqa Joabpa qhepanta riqkunaqa llapanku phawaylla rirqanku Bicripa churin Sebata+ qatipaq.
14 Sebaqa Israelpi llapa ayllukunata pasaspan Abel Bej-Macá+ llaqtaman chayarqan. Bicrí runakunapas juñukuspankun paypa qhepanta chay llaqtaman jaykurqanku.
15 Joabpa runankunataq* Abel Bej-Macá llaqtaman chayaspa chay llaqtata muyuykurqanku. Chay llaqtaqa muyuriqninpi perqayoqmi karqan, chaymi Joabpa runankunaqa perqa k’uchuman jallp’ata montorqanku chay llaqtata atipanankupaq. Chaymantapas perqa k’uchutan t’oqoyta qallarirqanku perqata thuninankupaq.
16 Chaymi juj allin yuyayniyoq warmiqa llaqta perqa patamanta fuerteta nimurqan: “¡Uyariwaychis! Ama jinachu, Joabta wajaripuwaychis, paywanmi rimayta munashani”, nispa.
17 Joab qayllaykuqtintaq chay warmiqa tapurqan: “¿Qanchu kanki Joab?”, nispa. Paytaq nirqan: “Arí, noqan kani”, nispa. Jinan chay warmiqa nirqan: “Uyariykuway wiraqocháy”, nispa. Joabtaq nirqan: “Niway”, nispa.
18 Chay warmitaq nirqan: “Ñaupa tiempopin niqku: Pipas problemayoq kaqkunaqa Abel llaqtata tapukuq richunku, chhaynapin problemankuqa allichasqa kapunqa, nispa.
19 Noqaqa Israelpi junt’aq runakunaq thajpi kausaq runakunaq rantinpin rimashani. Kay llaqtaqa importante llaqtan Israelpiqa, chay llaqtatan qanqa thuniyta munashanki. ¿Imaraykun Jehová Diospa qowasqanku herenciata chinkachiyta munashanki?”,+ nispa.
20 Chaymi Joabqa nirqan: “Manapunin jayk’aqpas kay llaqtataqa chinkachiymanchu.
21 Manapunin chaytaqa ruwaymanchu. Noqaqa maskhamushani rey David contra sayariq Efraín orqo-orqomanta+ Bicripa churin Sebatan.+ Payta entregawankichis chayqa ripullasaqmi”, nispa. Jinan chay warmiqa Joabta nirqan: “¡Noqaykuña chay runaq umantaqa perqa patanta wijch’umusaykiku!”, nispa.
22 Chaymantataq chay yuyaysapa warmiqa chay llaqta runakunawan rimarqan. Chaymi chay runakunaqa Bicripa churin Sebaq umanta wit’uspa Joabman wijch’umurqanku. Jinan Joabqa oveja waqrata tocarqan, llapa runakunataq wasinkuman kutipurqanku.+ Joabpas Jerusalén llaqtamanmi reypa kasqanman kutipurqan.
23 Joabqa Israelpi llapa soldadokunaq umallinmi karqan,+ Jehoiadapa+ churin Benayataq+ keretita runakunaq peletita runakunaq+ umallin karqan.
24 Adorantaq+ karqan llank’anankupaq obligasqa runakunamanta encargakuq, Ailujpa churin Jehosafat-taq+ karqan reypa qelqaqnin.
25 Sevataq karqan secretario, Sadocwan+ Abiatarwantaq+ sacerdotekuna karqanku.
26 Jaír runa Irataq Davidpa palacionpi jatun autoridad kapurqan.*
Uraypi willakuykuna
^ Chaypiqa yaqapaschá “karpanchiskunaman kutipusun” nillanmantaq.
^ Tiyaqmasi warmikunaqa esposakuna jinan karqanku. Qhaway Explicasqa simikuna nisqapi “Tiyaqmasi warmi” nisqata.
^ Chaypiqa “palacionman” nillanmantaqmi.
^ Hebreo rimaypiqa “Joabwan paykunawantaq” ninmi.
^ Hebreo rimaypiqa “Davidpa sacerdoten kapurqan” ninmi.
