2 Samuel 3:1-39
3 Saulpa familianta yanapaq runakunan Davidpa yanapaqnin runakunawan unay tiempo maqanakuyllapi kasharqanku. Davidqa tiempoq pasasqanman jinan aswan atiyniyoqman tukupusharqan,+ Saulpa familianta yanapaq runakunataq ichaqa pisi-pisimanta pisi kallpayapusharqanku.+
2 Chay tiempopin Davidqa Hebrón llaqtapi kashaspa wawakunayoq kapurqan.+ Phiwi* churinmi karqan Amnón,+ Jezrel llaqtayoq Ainoan+ esposanpi.
3 Iskay kaq wawantaq karqan Kileaf, Carmelo llaqtayoq Abigaíl+ esposanpi, Abigailqa Nabalpa viudanmi karqan. Kinsa kaq wawantaq karqan Absalón,+ Macá esposanpi. Macapa taytanmi karqan Talmái,+ Guesur runakunaq reynin.
4 Tawa kaq wawantaq karqan Adonías,+ Aguij esposanpi. Pisqa kaq wawantaq karqan Sefatías, Abital esposanpi.
5 Soqta kaq wawantaq karqan Itrean, Eglá esposanpi. Davidpa chay wawankunaqa Hebrón llaqtapin nacerqanku.
6 Saulpa familianta yanapaq runakuna Davidpa yanapaqnin runakunawan maqanakushasqanku tiempopin, Abnerqa+ Saulpa familian ukhupi aswan atiyniyoqman tukupusharqan.
7 Saulpa tiyaqmasinmi* karqan Ayopa ususin Rizpá.+ Juj p’unchaymi Is-Bosetqa+ Abnerta nirqan: “¿Imanaqtinmi papaypa tiyaqmasinwan puñurqanki?”,+ nispa.
8 Chayta niqtinmi Abnerqa sinchi phiñasqa Is-Boset-ta nirqan: “¿Imá? ¿Noqari alqo jinachu Judá ayllupi kashani? Noqaqa kunan p’unchaykaman taytaykiq familiantapas, wayqenkunatapas, amigonkunatapas mana traicionaspa* servishallani. Qantapas manan traicionarqaykichu, manan Davidman entregarqaykichu. Qantaq juj warmiwan pantarusqaymanta juchachashawanki.
9 Jehová Dios sinchita castigawachun sichus Diospa jurasqanman jina Davidta mana yanapasaqchu chayqa.+
10 Diosmi jurarqan Saulpas familianpas Israelpi manaña kamachikunanpaq, Davidmantaq jurarqan lliu Judá ayllupi lliu Israelpi rey kapunanpaq, chhaynapi Danmanta Ber-Sebakama+ kamachikunanpaq”, nispa.
11 Is-Boset-taq Abnerta manchakusqanrayku mana imanirqanpaschu.+
12 Chayllamanmi Abnerqa Davidman willachimurqan: “¿Piqpa makinpin kay jallp’a kashan?”, nispa. Chaymantapas willachillarqantaqmi: “Juj acuerdota noqawan ruway, noqataq tukuy atisqayta ruwasaq llapa Israel runakuna yanapanasuykipaq”,+ nispa.
13 Davidtaq nirqan: “Allinmi, nisqaykiman jina ruwasunchis. Ichaqa kayllatan mañakuyki: Kayman jamuspaqa Saulpa ususin Micaltan+ pusamuwanki, mana jinaqa aman jamunkichu”, nispa.
14 Chaymantapas Davidqa Saulpa churin Is-Bosetmanmi+ willachimullarqantaq: “Esposay Micalta qopuway. Paywan casarakunaypaqmi papaykiqa mañawarqan pachaj Filistea runakunaq qhari kaynin qarachata”,+ nispa.
15 Chaymi Is-Bosetqa Laispa churin Paltielmanta+ Micalta qechuchimpurqan.
16 Paltielmi ichaqa Mical esposanwan kuska waqaykuspa rirqan Baurin+ llaqtakama. Jinan Abnerqa Paltielta nirqan: “¡Phaway, kutipuy!”, nispa. Jinan Paltielqa kutipurqan.
17 Chaykamataq Abnerqa Israelpi umalliqkunaman* willachimurqan: “Unayñan qankunaqa munashankichis David reyniykichis kananta ¿riki?
18 Chhaynaqa, Davidta chaskiychis reyniykichista jina. Jehová Diosmi Davidmanta nirqan: Kamachiy Davidwanmi+ Israel llaqtayta salvasaq Filistea runakunamantapas lliu enemigonkunamantapas, nispa”.
19 Jinamanmi Abnerqa Benjamín ayllu+ runakunawan rimaq rirqan. Chaymantataq pakallapi Hebrón llaqtata rirqan Davidwan rimaq. Chaypin Davidman willarqan Benjamín ayllu runakunawan llapa Israel runakunawan imatachus rimanakusqankuta.
20 Iskay chunka runankunantin Abner Hebrón llaqtaman chayaqtintaq Davidqa paykunapaq askha mijunata wayk’uchirqan.
21 Jinan Abnerqa Davidta nirqan: “Wiraqocháy rirusaq, llapa Israel runakunata juñuramusaq qanwan juj acuerdota ruwanankupaq. Chhaynapin rey kapunki lliu Israel nacionpi”, nispa. Jinan Davidqa Abnerta mana imanispa sumaqllata kachapurqan.
22 Chay ratun Joabqa Davidpa kamachinkunapiwan kutimusharqanku maqanakuq risqankumanta, paykunaqa imaymana qechumusqankutan apamusharqanku. Hebrón llaqtaman chayanankupaqtaq Abnerqa pasapusqaña.
23 Soldadokunantin Joab+ chayaqtintaq payta nirqanku: “Nerpa+ wawan Abnermi+ rey Davidwan rimaq jamusqa, Davidmi ichaqa mana imanispalla kacharparipun”, nispa.
24 Jinan Joabqa rey Davidpa kasqanman jaykuspa nirqan: “¿Abner kayman jamushaqtinchu jinallata kacharparipurqanki? ¿Imaraykun chayta ruwarqanki?
25 ¡Qanqa yachashankimá riki Nerpa churin Abnerqa imayna runachus kasqanta! Chay runaqa engañashasunkin, payqa imatachus ruwashanki maytachus rinki chayta yachaqpunin jamururqan”, nispa.
26 Chaymantataq Joabqa Davidpa kasqanmanta ripuspa runankunata kacharqan Abnerta maskhamunankupaq. Jinan chay runakunaqa Sirá unu pozoq kasqanmanta Abnerta kutichimurqanku. Joabpa chay ruwasqantaqa Davidqa manan yacharqanchu.
27 Hebrón+ llaqtaman chayamuqtinkutaq Joabqa pakallapi rimanankupaq Abnerta llaqta punku ukhuman jaykuchirqan. Chaypi kashaspan Joabqa Abnerta cuchillowan wijsanpi sat’iruspa wañuchipurqan,+ chaytan Joabqa ruwarqan Asael wayqenta wañuchisqanmanta.*+
28 Chayta yacharuspan Davidqa nirqan: “Jehová Diospa ñaupanpiqa noqapas runaykunapas manan juchayoqchu kayku Nerpa churin Abner wañupusqanmantaqa.+
29 Abner wañusqanmantaqa Joab castigasqa kachun+ taytanpa wasinpi lliu kaqkunapiwan. Joabpa wasinpiqa kanqapunin qhari kayninmanta onqoyniyoq runa,+ otaq lepra* onqoyniyoq runa,+ otaq puskaspa llank’aq runa,* otaq espadawan wañuq runa, otaq yarqaymanta muchuq runa”,+ nispa.
30 Chhaynatan Joabwan Abisaiwanqa+ Abnerta+ wañuchipurqanku, wayqenku Asaelta Gabaón llaqtapi maqanakushaspa wañuchisqanmanta.+
31 Jinan Davidqa Joabta chaypi kaq runakunatawan nirqan: “P’achaykichista llik’ikuychis qhasqa p’achawantaq churakuychis, Abnerpa wañupusqanmanta waqaychis”, nispa. Rey Davidpas qhepantan rirqan p’ampanankupaq Abnerpa cuerponta apashaqtinkuqa.
32 Jinan Abnerta Hebrón llaqtapi p’ampapurqanku. Rey Davidqa Abnerpa sepulturanpa ladonpin kunkayoqta waqaykurqan, jinan llapa runakunapas waqayta qallarillarqankutaq.
33 Rey Davidqa Abnerpa wañupusqanraykun khaynata takirqan:
“¿Mana yuyayniyoq runa jinachu Abner wañunan karqan?
34 Abner, makiykiqa manan watasqachu karqan,chakiykipas manan watasqachu karqan.
Qanqa mana chanin runakunaq wañuchisqan jinan wañurqanki”,+ nispa.
Chay ratun llapa runakunaqa jujmanta waqaykullarqankutaq.
35 Chaymantataq p’unchayllaraq kashaqtin llapa runakuna Davidta rogarqanku mijunanpaq. Davidmi ichaqa jurarqan: “¡Dios castigawachun sichus manaraq inti chinkaykushaqtin t’antatapas otaq imallatapas mijusaq chayqa!”,+ nispa.
36 Llapa runakunan chay nisqanta allinpaq qhawarirqanku. Chaymantapas rey Davidpa tukuy ruwasqantan runakunaqa allinpaq qhawarillarqankutaq.
37 Chaykunata rikuspan Israel runakunaqa llapanku repararqanku Nerpa churin Abnerpa wañusqanmantaqa mana rey Davidchu juchayoq kasqanta.+
38 Jinan rey Davidqa kamachinkunata nirqan: “Kay p’unchaymi Israel nacionpi wañupun allin reqsisqa umalli.+
39 Reyña kani+ chaypas kunanqa mana kallpayoqmi tarikuni. Zeruyapa churinkunaqa+ sinchi millay runakunan kanku.+ Imachus ruwasqanman jina Jehová Dios castigachun mana allin ruwaqtaqa”,+ nispa.
Uraypi willakuykuna
^ Tiyaqmasi warmikunaqa esposakuna jinan karqanku. Qhaway Explicasqa simikuna nisqapi “Tiyaqmasi warmi” nisqata.
^ Chaypiqa “mana tukukuq munakuywan” nillanmantaqmi. Qhaway Explicasqa simikuna nisqapi “Mana tukukuq munakuy” nisqata.
^ Chaypiqa “kuraq runakunaman” nillanmantaqmi.
^ Hebreo rimaypiqa “Asael wayqenpa yawarninmanta” ninmi.
^ Chaypiqa yaqapaschá juj wist’u runa warmiq ruwananta ruwananmanta rimashan.
