2 Samuel 4:1-12
4 Hebrón llaqtapi Abnerpa wañupusqanta+ yacharuspan Saulpa churin Is-Bosetqa+ sinchita mancharikurqan, Israel runakunapas llapankun sinchi manchasqa kasharqanku.
2 Is-Bosetpa soldadonkunaq umallinkunan karqan iskay runakuna, chay soldadokunaqa llaqtakunatan suwakuq phawaykuqku. Jujninpa sutinmi karqan Baná, jujninpataq Recab. Paykunaqa Benjamín ayllumantan karqanku, Beroj llaqtayoq Rimonpa churinkuna. (Beroj+ llaqta runakunapas Benjamín ayllupin yupasqa karqanku.
3 Paykunan Guitainman+ ayqekurqanku, chaypin kunankama forastero runakuna jina tiyashanku).
4 Jonatanpa+ juj kaq wawanpa sutinmi karqan Mefibóset, payqa wist’un karqan.+ Pisqa watanpi kashaqtinmi Jezrel+ llaqtamanta willakuy chayamurqan Saulpas Jonatanpas wañupusqanmanta. Chaymi uywaqnin warmiqa Mefiboset-ta marq’arikuspa manchakuymanta ayqekurqan. Ayqekushaspan ichaqa wawata pampaman qonqaylla kacharparirqan, chaymantapachan chay wawaqa wist’u kapurqan.+
5 Beroj llaqtayoq Rimonpa churinkunan Recabwan Banawan rirqanku Is-Bosetpa wasinta, paykunaqa kuskan p’unchayta jinan rirqanku. Chay ratun Is-Bosetqa juj ratu puñushasqa.
6 Jinan Recabwan wayqen Banawanqa+ Is-Bosetpa wasinta jaykurqanku trigo apaykuq jinalla, Is-Bosetpa kasqanman jaykuspataq wijsanpi cuchillowan sat’irurqanku. Chayta ruwaspataq usqhaylla ayqekurqanku.
7 Recabwan wayqen Banawan jaykunankupaqqa Is-Bosetqa puñunan patapin puñushasqa. Chaypin cuchillowan wañuchirqanku, chaymantataq umanta wit’uspa aparikurqanku. Jinan tutantin Arabá wayq’onta ripurqanku.
8 Hebrón llaqtaman chayaspataq, rey Davidman Is-Bosetpa+ umanta aparqanku, jinaspa nirqanku: “Reyniyku, kayqa Is-Bosetpa uman, paypa taytanmi wañuchiyta munarqasunki.+ Kunan p’unchaymi Jehová Diosqa qanpa rantiykipi Saulmanta familianmantawan vengakun”, nispa.
9 Davidmi ichaqa Beroj llaqtayoq Rimonpa churin Recabta Banatawan nirqan: “Llakikuyniymanta librawaq wiñaypaq kausaq Jehová Diospa sutinpin niyki:+
10 Juj runan Ziclag llaqtaman chayamurqan: Saulmi wañupun,+ nispa. Payqa allin willakuyta apamunanpaqmi piensasharqan, noqan ichaqa premiota qonaymantaqa chay runata wañuchirqani.+
11 ¿Chaychu mana wañuchiyman puñunanpi puñukushaqtin inocente runata wañuchiq millay runakunata? ¿Chaychu Is-Boset-ta wañuchispa yawarninta jich’arisqaykichismanta mana castigaykichisman,+ mana kay jallp’amantapas chinkachiykichisman?”, nispa.
12 Chayta nispan Davidqa runankunata kamachirqan chay runakunata wañuchinankupaq.+ Jinan Davidpa runankunaqa chay runakunata wañuchirqanku. Chaymantataq chakinkuta makinkuta kuchuruspa Hebrón unu estanqueq ladonpi warkurqanku.+ Is-Bosetpa umantan ichaqa Hebrón llaqtapi p’ampapurqanku, Abnerpa sepulturanpi.
