2 Tesalonicenses 3:1-18
3 Chhaynaqa, wayqeykuna,* mañapushawallayku Jehová* Diosmanta,+ chhaynapi paypa siminta usqhaylla lliuman chayachinaykupaq,+ runakunapas qankuna jina ancha respetowan chaskinankupaq,
2 noqaykupas mana allin millay runakunamanta pakaykusqa kanaykupaqwan.+ Manan llapa runakunachu iñiyniyoqqa kanku.+
3 Señorqa junt’aqpunin, paymi kallpachasunkichis, Satanasmantapas* pakaykusunkichis.
4 Señorta qatikuq kasqaykuraykun noqaykuqa confiayku yachachisqaykuman jina kausashasqaykichispi, chayman jinapunitaqchá kausankichispas.
5 Diosmantan mañakuyku Cristo* sonqoykichista kallpachananpaq, chhaynapi Diosta munakunaykichispaq+ Cristorayku tukuy imata aguantanaykichispaqwan.+
6 Wayqeykuna,* Señorninchis Jesucristoq sutinpin kamachiykichis: T’aqakuychis noqaykuq yachachisqaykuta mana kasukuq iñiqmasikunamanta.+
7 Chaymantapas qankunaqa allintamá riki yachashankichis imaynatachus noqayku jina kausanaykichistaqa,+ ¿acaso noqaykuri mana kasukuspachu kausarqayku?
8 Manataqmi gratischu piqpa mijunantapas mijuq kayku,+ aswanmá noqaykuqa tuta-p’unchay tukuy kallpaykuwan llank’aq kayku, chhaynapi mana mayqenniykichispaqpas gastochu kanaykupaq.+
9 Noqaykuqa atiykumanmi karqan tukuy imatapas qankunamanta mañakuyta,+ ichaqa manan chaytachu ruwarqayku, chhaynapi qankunapaq ejemplo kanaykupaq.+
10 Chaymantapas, qankunawan kashaspaykuqa “pipas mana llank’ayta munaqqa amallataq mijuchunchu” nispan kamachiq kaykichis ¿riki?+
11 Chhaynaqa, ¿imaynapitaq qankuna ukhupi wakinkunari mana kasukuq kashanku?+ Manataqsi paykunaqa llank’ashankuchu, aswanpas jujkunaq ruwanankuman chapukuspas purishanku.+
12 Chay runakunatan Señor Jesucristoq sutinpi anyayku kamachiyku ima ama jujkunaq ruwanankuman chapukuspa tranquilo llank’anankupaq, imachus ganasqankuwan mijunata tarinankupaqwan.+
13 Chaymantapas, wayqeykuna,* amapunin sayk’unkichischu allin kaqkunata ruwaspaqa.
14 Ichaqa pipas mana kasukunqachu kay cartapi nimusqaykuta chayqa, chay runata señalaychis, amataq paywanqa amigontinqa kaychischu,+ chhaynapi p’enqarikunanpaq.
15 Ichaqa aman enemigoykichista jinachu qhawarinkichis, aswanpas yuyaychashallaychis+ iñiqmasiykichista jina.
16 Mañakuykun thaj kayta qoq Señor tukuy ima ruwasqaykichispi thaj kayta qonasuykichispaq.+ Llapa qankunawan Señorqa kashachun.
17 Napaykuytan qankunaman apachimuykichis, chay napaykuytaqa noqa kikiy Pablon qelqamushani,+ khaynatapunin noqaqa qelqani.
18 Señorninchis Jesucristoq ancha sumaq sonqo kaynin llapa qankunawan kachun.
Uraypi willakuykuna
^ Mayninpiqa warmipaq qharipaqwanmi Bibliapiqa “wayqeykuna” nispa nin.
^ Qhaway “Astawan yachanapaq A5” nisqata.
^ Griego rimaypiqa “millay kaqmantapas” ninmi.
^ Mayninpiqa warmipaq qharipaqwanmi Bibliapiqa “wayqeykuna” nispa nin.
^ Mayninpiqa warmipaq qharipaqwanmi Bibliapiqa “wayqeykuna” nispa nin.
