Amós 5:1-27
5 “Israel runakuna, uyariwaychis kay llaki taki takisqayta, qankuna contran takisaq:
2 Sipas Israelmi kikin jallp’allanpitaq urmapun,manan jujmanta jatariyta atinchu.
Lliumi payta wijch’upunku.
Manan pipas sayarichiqnin kanchu, nispa.
3 Tukuy munayniyoq Señor Jehová Diosmi nin:
Waranqa runakunawan maqanakuq lloqsiq llaqtaqa pachajllawanñan qhepanqa,pachajwan lloqsiqtaq chunkallawanña qhepanqa. Chaymi Israel runakunata pasanqa,+ nispa.
4 Jehová Diosmi Israel runakunata nillantaq:
Kutirikamuwaychis, jinan kausashallankichis.+
5 Amaña Betelmanqa+ yupaychaq riychisñachu,amaña Guilgalman+ riychischu, amaña Ber-Sebamanpas+ chimpaychischu.
Guilgalpi tiyaq runakunaqa apasqan kapunqaku,+Betelpas chinkapunqan.*
6 Jehová Diosman kutirikuychis, jinan kausashallankichis.+
Mana chayqa nina jinan Josepa mirayninta ruphanqa,Beteltapas ruphaykunqan, manataqmi pipas wañuchiyta atinqachu.
7 Qankunaqa justiciatapas ajenjo jina jayamanmi tukuchinkichis,chanin kaqtapas sarunchankichismi.+
8 Maskhaychis Kimá nisqa, Kesil* nisqa juñu-juñu ch’askakuna ruwaqta,+laqhayaqtapas* k’anchayman tukuchiqta,p’unchaytapas tutayaqman tukuchiqta,+maskhaychis lamar-qocha unu juñuqta,unu juñusqanta jallp’aman parachimuqta,+sutiyqa Jehová Diosmi.
9 Qonqayllan kallpasapa runakunaman wañuyta chayachimusaq,chhaynapin allin perqasqa llaqtakunata thunisaq.
10 Qankunaqa llaqta punkupi anyaq runakunatapas cheqnikunkichismi,cheqaqllata rimaq runakunatapas millakunkichismi.+
11 Wajchakunaq chajra ruwasqankumantapas alquilertataq* cobrankichis chayqa,trigo oqarisqankutapas impuestota jinataq jap’ikapunkichis chayqa,+manañan munay thupasqa rumimanta ruwasqaykichis wasikunapiñachu tiyankichis,+manan plantasqaykichis allin uvas sach’akunamantapas vinota tomankichisñachu.+
12 Noqaqa allintan yachani nishu askha mana allinkuna ruwasqaykichista,yachanin millay juchakuna ruwasqaykichistapas.
Chanin runakunatan ñak’arichinkichis,mana allinta ruwanaykichisraykun pagota chaskikunkichis,wajchakunapaqpas manan llaqta punkupi justiciata ruwapunkichischu.+
13 Chayraykun allin reparaq runakunaqa ch’inlla chay tiempopi kanqaku,chay tiempoqa sinchi llakikuy tiempon kanqa.+
14 Allin kaqta ruwaychis ama mana allin kaqtaqa,+allin kaqta ruwaspaqa kausashallankichismi.+
Chhaynapin ejercitokunata kamachiq Jehová Diosqa qankunawan kashanqa,nisqaykichisman jinan qankunawan kashanqa.+
15 Allin kaqkunata munakuychis,+ mana allin kaqkunatataq cheqnikuychis.
Llaqta punkupi juezkunapas chaninta juzgaychis.+
Yaqapaschá ejercitokunata kamachiq Jehová Diosqa khuyapayasunkichisman,yaqapaschá Josepa mirayninmanta puchuqkunata khuyapayanman,+ nispa.
16 Jehová Diosmi, ejercitokunata kamachiq Jehová Diosmi nin:
¡Llapan plazakunapin khuyay waqay kanqa!
¡Llapan callekunapin sonqo nanay qapariy kanqa!
Chajrapi llank’aqkunatan paykuna llakiysiqta wajakamunqaku,qolqepaq waqaqkunatan paykuna waqaysiqta pusakamunqaku.
17 Uvas chajrakunapipas khuyay waqaymi kanqa,+noqan jallp’aykiq chaupinta pasaspa castigasayki. Jehová Diosmi chayta nin.
18 ¡Ay imaraqmi qankunamanta kanqa, Jehová Diospa p’unchaynin chayamunanta munaqkuna!+
¿Jehová Diospa p’unchaynin imayna kananpaqmi piensashankichis?+
Chay p’unchayqa laqhayaqmi kanqa, manan k’anchaychu.+
19 Imaynan juj runa leonmanta ayqekushaspa osowan tupan chhaynan kanqa.
Imaynan juj runa wasinman jaykuspa perqaman jap’iykukuqtin mach’aqway pican chhaynan kanqa.
20 ¿Manachu Jehová Diospa p’unchayninqa tutayaq kanqa, k’anchay kananmantaqa?
¿Manachu laqhayaq kanqa, sut’i kananmantaqa?
21 Fiestakuna ruwasqaykichistaqa cheqnikunin, millakunin.+
Yupaychawanaykichispaq juñunakuykunapi ofrendakuna jaywamuwasqaykichistapas manan munanichu.
22 Ruphachina ofrendataña waj ofrendakunataña jaywamuwankichis chaypas,manan noqaqa chaskisaykichischu.+
Wirayachisqa uywakunataña sumaq kausay sacrificiota jina jaywamuwankichis chaypas, manan chaskisaykichischu.+
23 Amaña chhaynata qaparispa takimuwaychischu,amaña cuerdayoq tocanakuna tocasqaykichistapas uyarichimuwaychischu.+
24 Chanin ruway unu jina phawachun,+allin ruwaypas mana ch’akiq mayu jina purichun.
25 Yau Israel runakuna, tawa chunka wata ch’inneqpi kashaspa,¿jaywamuwarqankichischu sacrificiokunata ofrendakunatapas?+
26 Kunanqa Sakuj idoloykichista, Keván* idoloykichista aparikuspan ripunkichis,chay ch’aska diosniykichista marq’arikuspan ripunkichis.
27 Noqan Damasco llaqtaq waj ladonmanraq presota apachisaykichis,+ nispa. Ejercitokunata kamachiq Jehová sutiyoq Diosmi chayta nin”.+
Uraypi willakuykuna
^ Chaypiqa yaqapaschá “Betelpas layqa ruwaykuna ruwanamanmi tukupunqa” nillanmantaq.
^ Laqhayaqtaqa “tutayaq” nillankutaqmi.
^ Chay sutikunaqa juñu-juñu ch’askakunaq sutinmi. Kay jallp’amanta qhawariqtinchismi chay ch’askakunaqa rikukun animal formapi, imaymana formakunapipas.
^ Chaypiqa “impuestotataq” nillanmantaqmi.
^ Yaqapaschá chhayna sutikunawan reqsirqanku Saturno nisqa ch’askata, chaytan chay tiempopiqa diosta jina yupaychaqku.
