Isaías 39:1-8
-
Babilonia reypa willaqninkunamanta (1-8)
39 Chay tiempopin Babilonia rey Merodac-Baladanqa yacharusqa Ezequías onqosqa kasqanmanta qhaliyasqanta,+ jinan Ezequiasman apachimusqa cartakunata juj regalotawan.+ Merodac-Baladanqa Baladanpa churinmi karqan.
2 Ezequiasqa may sumaqtan chaskirqan Babilonia reypa kachamusqan runakunataqa. Chaymantapas wasinpi kaq ancha valorniyoq cosaskunatan rikuchirqan:+ qolqeta, qorita, armankunata, bálsamo aceiteta, ancha valorniyoq aceitekunata, wasinpi kaq ancha valorniyoq tukuy imaymanakunatawan. Ezequiasqa lliutapunin rikuchirqan wasinpi* kaqkunatapas lliu aylluntinpi kaqkunatapas.
3 Chaymantataq profeta Isaiasqa rey Ezequiaspa kasqanman jaykurqan, jinaspa tapurqan: “¿Maymantan chay runakuna jamusqaku? ¿Imanispan nirqasunkiku?”, nispa. Jinan Ezequiasqa nirqan: “Karu llaqtamantan jamusqaku, Babilonia nacionmantaraq”,+ nispa.
4 Chaymantataq Isaiasqa tapullarqantaq: “¿Imakunatan wasiykipi rikurqanku?”, nispa. Jinan Ezequiasqa nirqan: “Wasiypi kaqniykunataqa lliutan rikunku. Ancha valorniyoq kaqniykunatapas lliutapunin rikuchini”, nispa.
5 Jinan Isaiasqa Ezequiasta nirqan: “Uyariy, ejercitokunata kamachiq Jehová Diosmi khaynata nisunki:
6 P’unchaykunan chayamushanña, chaypin ñaupa taytaykikunaq imaymana juñusqankuta, wasiykipi llapa kaqniykikunatawan Babiloniaman apapunqaku. Manan imapas kaypiqa qhepanqachu,+ ninmi Jehová Dios.+
7 Mirayniykimanta wakin runakunatapas Babiloniamanmi apapunqaku, chaypin reypa palacionpi oficialkuna kanankupaq churanqaku,+ nispa”.
8 Chayta uyarispan Ezequiasqa Isaiasta nirqan: “Jehová Diospa nisqanqa chaninmi”, nispa. Chaymantapas nillarqantaqmi: “Chhaynaqa noqa kausanaykamaqa thaj kaychá kanqa, manachá imapas pasanqachu”,*+ nispa.
Uraypi willakuykuna
^ Chaypiqa “palacionpi” nillanmantaqmi.
^ Chaypiqa “cheqaq kaychá kanqa” nillanmantaqmi.
