Jeremías 37:1-21
37 Josiaspa churin Sedequiasmi+ kamachikuyta qallarirqan Jehoiaquinpa churin Coniaspa*+ rantinpi, Babilonia rey Nabucodonosormi Sedequiastaqa Judá suyupi reyta churarqan.+
2 Paymi ichaqa Jehová Dios profeta Jeremiaswan willachisqan simikunata mana kasukurqanchu, manan kamachinkunapas kay suyu runakunapas kasukurqankuchu.
3 Rey Sedequiasmi Selemiaspa churin Jeucalta+ Maseyaq churin sacerdote Sofoniastawan+ kacharqan profeta Jeremiasta “ama jinachu kay, noqaykurayku Jehová Diosninchismanta mañapuwayku” nispa nimunankupaq.
4 Jeremiasqa manaraqmi wisq’asqachu karqan, chaymi llaqtapi libre purisharqan.+
5 Faraonpa* ejercitonmi Egiptomanta lloqsimurqan,+ chayta yachaspan Jerusalenta muyuykuq Caldea runakunaqa Jerusalenmanta ripurqanku.+
6 Jinan profeta Jeremiasqa Jehová Diosmanta kay simikunata chaskirqan:
7 “Jehová Diosmi, Israelpa Diosninmi nin: Tapuwanaykichispaq kachamuwaqniykichis Judá reyta nimuychis: Yanapanasuykichispaq jamushaq faraonpa ejercitonqa Egiptomanmi kutipunqa, nacionninmanmi kutipunqa.+
8 Caldea runakunataq kutimunqaku kay llaqta contra maqanakunankupaq, atipaspan ninawan kanaykunqaku,+ nispa.
9 Jehová Diosmi nin: Ama qankuna kikiykichista engañakuychischu, Caldea runakunaqa ripunqakupunin manan phawaykamuwasunñachu nispa, manan paykunaqa ripunqakuchu.
10 Qankuna contra maqanakuq Caldea runakunaq ejercitontaña atipawaqchis chaypas, k’irisqakunallaña qhepanman chaypas, paykunan karpankumanta lloqsimuspa kay llaqtata ninawan kanaykunkuman,+ nispa”.
11 Faraonpa ejerciton jawa Caldea ejército Jerusalenmanta ripusqan qhepamanmi,+
12 Jeremiasqa Jerusalenmanta lloqsispa Benjamín aylluman+ rirqan tupaqnin jallp’ata chaypi chaskimunanpaq.
13 Benjamín Punku nisqaman chayaqtinmi ichaqa, Hananiaspa nieton Selemiaspa churin guardiakunaq umallin Iriyaqa profeta Jeremiasta jap’ispa nirqan: “¡Qanqa Caldea runakunaq ladonmantan kashanki!”, nispa.
14 Jeremiastaq nirqan: “¡Manan chhaynachu!, manan Caldea runakunaq ladonmantachu kashani”, nispa. Iriyan ichaqa mana uyariqpas tukurqanchu, aswanmi Jeremiasta jap’ispa autoridadkunaq kasqanman aparqan.
15 Autoridadkunaqa sinchita phiñakuspan Jeremiasta maqaykurqanku,+ jinan carcelman wisq’arqanku,+ chayqa karqan secretario Jehonatanpa wasinmi, chaytan carcelman tukuchipusqaku.
16 Jeremiasqa wasiq pampa toq’onpin askha p’unchaykuna wisq’asqa karqan.
17 Chaymantan rey Sedequiasqa wasinman* pusachimuspa pakallapi tapurqan:+ “¿Imallatapas Jehová Dios nirqasunkichu?”, nispa. Jeremiastaq nirqan: “¡Arí, Babilonia reypa makinmanmi entregasqa kanki!”,+ nispa.
18 Jeremiasqa rey Sedequiastan nillarqantaq: “¿Ima mana allintan ruwarqani qan contra, kamachiykikuna contra, kay llaqta contrapas carcelman wisq’awanaykichispaq?
19 ¿Maytaq, manan Babilonia reyqa qankuna contra kay llaqta contrapas jamunqachu, niq profetaykichiskunari?+
20 Señorníy, reyníy, ama jinachu kay, uyariykuway. Rogakuykin, mañakusqayta ruwapuway, ama secretario Jehonatanpa wasinmanqa kutichiwaychu,+ chaypiqa wañupusaqmi”,+ nispa.
21 Jinan rey Sedequiasqa kamachikurqan Guardiakunaq Pation nisqaman+ Jeremiasta churaspa qhawanankupaq. Sapa p’unchaymi t’anta ruwaqkunaq callenmanta apamuspa juj muyu t’antata qoqku,+ chaymantaqa manañan llaqtapi t’anta kapurqanchu.+ Jeremiasqa Guardiakunaq Pation nisqallapin kasharqan.
Uraypi willakuykuna
^ Paytaqa “Joaquín, Jeconías” nikullantaqmi.
^ Egipto reykunatan “faraón” nispa niqku.
^ Chaypiqa “palacionman” nillanmantaqmi.
