Jeremías 41:1-18
41 Qanchis kaq killapin Ismaelqa+ chunka runakunantin Mizpá llaqtaman+ Aicampa churin Guedaliaspa kasqanman rirqan. Ismaelqa Elisamapa nietonmi karqan, Netaniaspa churin, payqa reypa familianmantan karqan, reypa juj kaq umallin. Mizpapi kuska mijushaqtinkun,
2 Netaniaspa churin Ismaelqa chunka runankunapiwan jatarispa Aicampa churin, Safanpa nieton Guedaliasta espadawan wañuchirqanku. Chhaynatan Ismaelqa Babilonia reypa suyupi churasqan kamachikuqta wañuchirqan.
3 Ismaelqa Mizpá llaqtapi Guedaliaswan kaq judío runakunata Caldea soldadokunatapas wañuchillarqantaqmi.
4 Guedaliasta wañuchisqanku qhepantin p’unchaytaq, manaraq pipas yachashaqtin,
5 pusaq chunka runakuna Shejenmanta,+ Silomanta,+ Samariamanta+ ima jamurqanku. Sunkhanku k’isusqa, p’achanku llik’isqa, mat’asqa cuerpoyoq+ iman chay runakunaqa yuraq inciensota* jak’u ofrendatawan aparikuspa jamurqanku,+ chaytaqa apamurqanku Jehová Diospa wasinman apanankupaqmi.
6 Jinan Mizpá llaqtamanta lloqsispa Netaniaspa churin Ismaelqa paykunaman waqaspa ayparqan. Paykunaq kasqanman chayaspataq nirqan: “Jamuychis Aicampa churin Guedaliasta qhawaykamuychis”, nispa.
7 Llaqtaman jaykuruqtinku jinataq Netaniaspa churin Ismaelqa runankunantin paykunata wañuchirqanku, jinaspa t’oqoman wijch’uykurqanku.
8 Chunka runakunan ichaqa Ismaelta nirqanku: “Ama wañuchiwaykuchu, kashanmi campopi pakasqa trigoyku, cebadayku, aceiteyku, mielniykupas”, nispa. Chaymi paykunataqa mana wayqenkunatawan kuskachu wañuchirqan.
9 Ismaelqa wañuchisqan runakunaq cuerpontan jatun t’oqoman wijch’uykurqan, chay t’oqotaqa Asá reymi ruwasqa Israel rey Basawan maqanakusqan tiempopi.+ Chay t’oqotan Netaniaspa churin Ismaelqa wañuchisqan runakunawan junt’achirqan.
10 Mizpá llaqtapi+ puchuq runakunatan reypa ususinkunatawan Ismaelqa presota apapurqan. Soldadokunaq umallin Nebuzaradanmi Aicampa churin Guedaliasman+ Mizpá llaqtapi puchuq runakunataqa saqesqa. Chay runakunatan Netaniaspa churin Ismaelqa Anmón runakunaq+ jallp’anman chimpananpaq presota apasharqan.
11 Careaq churin Joanán+ paywan kaq soldadokunaq llapa umallinkunapas Netaniaspa churin Ismaelpa millay mana allinkuna ruwasqanta yacharuspan,
12 llapa runakunantin rirqanku Netaniaspa churin Ismaelwan maqanakuq, jinaspan Gabaonpi askha unukunaq* qayllanpi tarirqanku.
13 Careaq churin Joananta paywan riq soldadokunaq llapa umallinkunatapas rikuspan, Ismaelwan kaq runakunaqa anchata kusikurqanku.
14 Jinan Mizpá llaqtamanta+ Ismaelpa presota apasqan runakunaqa Careaq churin Joananwan kutimpurqanku.
15 Netaniaspa churin Ismaelmi ichaqa pusaq runakunantin Joananmanta escaparuspa Anmón runakunaq jallp’anman ripurqanku.
16 Careaq churin Joananqa paywan kaq soldadokunaq umallinkunapiwanmi Mizpamanta puchuq runakunata apapurqanku. Paykunatan Netaniaspa churin Ismaelpa makinmanta qechurqan, Aicampa churin Guedaliasta wañuchisqan qhepaman.+ Gabaonmantan apapurqanku qharikunata, soldadokunata, warmikunata, wawakunata, autoridadkunatapas.
17 Jinaspan Belenpa+ qayllanpi kaq Kimanpi alojakuna wasipi qhepakurqanku, paykunaqa Egiptoman+ chayayta yuyaykuspan chaypiqa qhepakurqanku,
18 Caldea runakunata manchakusqankurayku. Netaniaspa churin Ismaelqa Babilonia reypa suyupi kamachikunanpaq churasqan Aicampa churin Guedaliastan wañuchisqa,+ chayrayku manchasqa kasharqanku.
Uraypi willakuykuna
^ Chaypiqa “olibanota” nillanmantaqmi.
^ Chaypiqa yaqapaschá “jatun estanqueq” nillanmantaq.
