Malaquías 1:1-14
1 Diospa willakuynin.
Jehová Diosmi Malaquiaswan* Israel llaqtaman kay simikunata willachirqan:
2 Jehová Diosmi nin: “Noqaqa munakuyniytan rikuchirqaykichis”,+ nispa.
Qankunan ichaqa ninkichis: “¿Imaynatan munakuyniykita rikuchiwarqankiku?”, nispa.
Jehová Diosmi nin: “¿Manachu Esauqa Jacobpa wayqen karqan?+ Noqaqa Jacobtan munakurqani,
3 Esautan ichaqa cheqnikurqani.+ Orqonkunatapas purunyachipurqanin,+ herenciantapas monte alqokunaq tiyananmanmi tukuchipurqani”,+ nispa.
4 Diosmi nin: “Edomña nin: Thunisqan karqanchis, ichaqa jujmantan thunisqa perqakunata sayarichisunchis, nispa chaypas, ejercitokunata kamachiq Jehová Diosmi* nin: Paykunan sayarichinqaku, noqataq thunisaq, tiyasqanku jallp’atan sutichanqaku, millay ruwaqkunaq jallp’an, Jehová Diospa wiñaypaq ñakasqan llaqta,+ nispa.
5 Qankunaqa ñawiykichiswanpunin rikunkichis, jinaspan ninkichis: Jatunchasqa kachun Jehová Diosqa llapa Israel suyuntinpi, nispa.
6 ”Churiqa taytantan respetan,+ kamachitaq patronninta. Chhaynaqa, noqataq taytaykichis kani chayqa,+ ¿maytaq respetawasqaykichisri?+ Noqataq patronniykichis kani chayqa, ¿maytaq manchakuwasqaykichisri?* Sutiyta pisichaq sacerdotekuna,+ noqa ejercitokunata kamachiq Jehová Diosmi chayta niykichis.
”Qankunan ichaqa ninkichis: ¿Imaynatan sutiykita pisicharqayku?, nispa.
7 ”Qhelli mijuyta* altarniypi jaywawaspaykichismi pisichawarqankichis.
”Qankunataq ninkichis: ¿Imaynatan qhellicharqaykiku?, nispa.
”Jehová Diospa mesanqa+ manan respetanapaqchu, nispaykichismi.
8 Ñausa uywakunata sacrificiopi jaywamuwaspan qankunaqa ninkichis: Allillanmi kashan, nispa. Wist’u, onqosqa uywakunata jaywamuwaspan ninkichis: Allillanmi kashan,+ nispa”.
Ejercitokunata kamachiq Jehová Diosmi nin: “Llaqtaykipi kamachikuqman apaqtiyki, ¿kusisqachu chaskisunki? ¿Kusikunqachu qanwan?”, nispa.
9 Diosmanta mañakuychis sumaqta qhawariwananchispaq. Ejercitokunata kamachiq Jehová Diosmi nin: “Chhayna sacrificiokunata jaywamuwaqtiykichis, ¿kusisqachu mayqenniykichistapas chaskiykichisman?”, nispa.
10 Ejercitokunata kamachiq Jehová Diosmi nin: “¿Mayqenniykichistaq temploq punkunkunata mana imaraykulla wisq’awaqchis?,+ manan altarniypi ninallatapas mana imaraykuqa jap’ichiwaqchischu.+ Manan qankunawan kusikunichu, manataqmi ima ofrenda jaywamuwasqaykichispas sonqoypaq jinachu”,+ nispa.
11 Ejercitokunata kamachiq Jehová Diosmi nin: “Inti lloqsimuy ladomanta inti jaykuy ladokaman sutiyqa nacionkuna ukhupi jatunchasqa kanqa.+ Tukuy ladopin sacrificiokunata q’osñichikunqa, sutiyta jatunchanapaqmi ofrendakunatapas jaywakunqa, chayqa ch’uya regalon kanqa. Nacionkuna ukhupin sutiyqa jatunchasqa kanqa”,+ nispa.
12 Diosmi nin: “Qankunan ichaqa sutiyta pisichankichis,*+ Jehová Diospa mesanqa qhellin kashan, mesapi kaq rurukunapas mijuykunapas millakunapaqmi,+ nispaykichis.
13 Nillankichistaqmi: ¡Sayk’usqañan kashayku!, nispa, tukuy imatan mana allinpaq qhawarinkichis”, nispa. Ejercitokunata kamachiq Jehová Diosmi nin: “Qankunaqa suwasqa uywakunata, wist’u, onqosqa uywakunatan apamuwankichis, arí, ¡chhayna regalotan apamuwankichis! ¿Chhayna ofrendakunatachu chaskiykichisman?”,+ nispa. Jehová Diosmi chayta nin.
14 Ejercitokunata kamachiq Jehová Diosmi nin: “Ñakasqa kachun q’otukuq runaqa, Jehová Diosninman juj promesata ruwaspa allin orqo uywan kashaqtin, onqosqa mana valeq uywata sacrificiopi jaywamuwaq runaqa. Noqaqa ancha jatun reymi kani,+ sutiyqa nacionkuna ukhupin manchana, respetana kanqa”,+ nispa.
Uraypi willakuykuna
^ Malaquías sutiqa “willaqniy” ninantan nin.
^ Qhaway Explicasqa simikuna nisqapi “Ejercitokunata kamachiq Jehová Dios” nisqata.
^ Chaypiqa “respetawasqaykichisri” nillanmantaqmi.
^ Hebreo rimaypiqa “t’antata” ninmi.
^ Chaypiqa yaqapaschá “pisichawankichis” nillanmantaq.
