Zacarías 11:1-17
11 “Yau Líbano, punkuykikunata kichariy,cedro sach’aykikunata nina ruphaykunanpaq.
2 ¡Enebro sach’a, khuyayta waqay, cedro sach’an kumpakapun,jatunkaray sach’akunan ch’usaqyachisqa kapun!
¡Basanpi roble sach’akuna, qapariychis,sach’a-sach’akunan chaqosqa kapun!
3 ¡Uyariychis! Michiqkunan waqashanku,ancha jatun kayninkun chinkachisqa kapun.
¡Uyariychis! Malta leonkunan qaparishanku,Jordán mayu patapi sach’a-sach’akuna chaqosqa kapusqanrayku.
4 ”Jehová Diosniymi nin: Ñak’anapaq kaq ovejakunata michiy.+
5 Chay ovejakunatan rantiqninkunaqa ñak’an,+ manataqmi paykunaqa juchachasqachu kanku. Vendeqkunan+ ninku: Jatunchasqa kachun Jehová Diosqa, qhapaqmi kasaq, nispa. Michiqninkupas manan ovejakunata khuyapayankuchu,+ nispa.
6 ”Jehová Diosmi nillantaq: Manan jujmantaqa kay suyu runakunata khuyapayasaqchu. Llapankutan runamasinkuq makinman, reyninkuq makinmanwan jap’iykachisaq. Paykunan kay suyuta ch’usaqyachinqaku, manataqmi noqaqa makinkumanta librasaqchu, nispa”.
7 Jinan ñak’anapaq kaq ovejakunata michiyta qallarirqani.+ Llakisqa ovejakuna, chaytaqa qankunaraykun ruwarqani. Iskay taunatan jap’irqani, jujnintan suticharqani Khuyapayakuy nispa, jujnintataq Jujllachay nispa,+ jinaspan ovejakunata michiyta qallarirqani.
8 Juj killallapin kinsa michiqkunata qarqopurqani, paykunaqa umaytañan wasapawarqanku, cheqnikuwarqankutaq kanpas.
9 Chaymi nirqani: “Manañan michisaykichisñachu. Wañunayashaqqa jina wañuchun. Ch’usaqyashaqqa jina ch’usaqyachun, qhepaqkunapas paykunapura mijunakuchunku”, nispa.
10 Jinaspan Khuyapayakuy nisqa taunayta+ jap’ispa ñut’uta p’akirqani, chhaynapin llapa llaqtakunawan rimanakusqayta pak’irqani.
11 Chay p’unchaymi chay rimanakuyqa p’akisqa karqan, rikuwaqniy llakisqa ovejakunapas chaywanmi yacharqanku chay willakuyqa Jehová Diosmanta jamusqanta.
12 Chaymi nirqani: “Allinpaq qhawarinkichis chayqa pagapuwaychis, mana chayqa jap’ikapuychis”, nispa. Jinan paykunaqa kinsa chunka qolqeta pagapuwarqanku.+
13 Chaymantataq Jehová Dios niwarqan: “Chhaytukuy qolqe pagawasqankuta qolqe waqaychanaman wijch’uykuy”,+ nispa. Chaymi chay kinsa chunka qolqeta Jehová Diospa wasinpi qolqe waqaychanaman wijch’uykurqani.+
14 Chaymantataq Jujllachay nisqa taunaytañataq p’akirqani,+ chhaynapin Judawan Israelwan wayqentin kasqanku p’akisqa karqan.+
15 Jehová Diosmi niwarqan: “Mana imapaq valeq michiqpa kaqninkunata jap’iy.+
16 Suyupi juj michiq rijurimunantan jinallata qhawasaq. Chay michiqqa manan wañunayashaq ovejakunata qhawarinqachu,+ manan uñakunatapas maskhamunqachu, manan k’irisqakunatapas jampinqachu,+ manan qhali ovejakunatapas mijuchinqachu.+ Aswanmi wira ovejakunata ñak’aspa mijunqa, ovejakunaq phapatunkunatapas lliutan orqonqa.+
17 ¡Ay imaraqmi kanqa ovejakunata saqerpariq+ mana imapaq valeq michiqmanta!+
Juj espadan makinta paña ñawintawan k’irinqa.
Makinqa pasaqtan ch’akipunqa,paña ñawinpas ñausayapunqan”, nispa.