Zacarías 12:1-14
12 Diospa willakuynin.
Janaq pachata mast’ariq Diosmi,+kay pachaq cimentacionninta churaqmi,+runakunamanpas kausay samayta* qoq Jehová Diosmi nin:
“Jehová Diosmi Israelmanta nin:
2 ”Jerusalentan churani muyuriqninpi kaq llapa llaqtakunata machachiq vino vaso jina kananpaq. Judatapas Jerusalentapas muyuykunqakun.+
3 Chay p’unchaymi Jerusalenta llasa rumiman tukuchisaq llapa llaqtakunapaq. Llapa oqariqkunan sinchita k’irikunqaku,+ kay pachapi llapa nacionkunan pay contra juñusqa kanqaku”,+ nispa.
4 Jehová Diosmi nin: “Chay p’unchaymi llapa caballokunata sinchita mancharichisaq, caballopi sillasqa soldadokunatapas locoyachisaqmi. Judá runakunapin ñawiyqa kashanqa, llaqtakunaq caballonkunatan ichaqa ñausayachisaq.
5 Judapi umallikunan sonqonkupi ninqaku: Ejercitokunata kamachiq Jehová Diosninkuraykun Jerusalenpi tiyaqkunaqa noqanchispa kallpanchis,+ nispa.
6 Chay p’unchaymi Judapi umallikunata llant’a chaupipi raurashaq sansata jina churasaq, marq’ay-marq’ay trigo rutusqapi raurashaq nina k’anchanata jinan churasaq.+ Qayllanpi kaq llapa llaqtakunatan paña ladonmanpas lloq’e ladonmanpas ruphaykapunqa.+ Jerusalenpi tiyaqkunaqa wajmantan llaqtankupi, Jerusalenpi tiyapunqaku.+
7 ”Jehová Diosqa Judapa karpantaraqmi ñaupaqta salvanqa, Davidpa mirayninpas Jerusalenpi tiyaqkunapas ama Judá runakunamanta aswan jatunchasqa kanankupaq.
8 Chay p’unchaymi Jehová Diosqa Jerusalenpi tiyaqkunata pakaykunqa,+ chay p’unchaymi aswan pisi kallpa kaqpas David jina kanqa, Davidpa miraynintaq Dios jina kanqa, ñaupankuta puriq Jehová Diospa angelnin+ jina.
9 Chay p’unchaymi Jerusalén contra sayariq llapa nacionkunata chinkachipusaq.+
10 ”Davidpa mirayninmanmi Jerusalenpi tiyaqkunamanwanmi espirituyta jich’aykamusaq, paykunatan allinpaq qhawarisaq, paykunataq mañakamuwanqaku. Lanzawan winaspa wañuchisqanku runata rikuspan+ khuyayta llakikunqaku sapallan wawankumanta jina, phiwi* wawankumanta jinan sonqo nanayta waqanqaku.
11 Chay p’unchaymi Jerusalenpi khuyay waqay kanqa, Meguidó+ pampapi kaq Adadrimonpi jinan khuyay waqay kanqa.
12 Suyuntinpin sapanka familia sapaqpi waqanqaku. Davidpa familianmanta kaqkunan sapaqpi waqanqaku, qharikuna sapaqpi, warmikunapas sapaqpi. Natanpa+ familianmanta kaqkunan sapaqpi waqanqaku, qharikuna sapaqpi, warmikunapas sapaqpi.
13 Levipa+ familianmanta kaqkunan sapaqpi waqanqaku, qharikuna sapaqpi, warmikunapas sapaqpi. Simeipa+ familianmanta kaqkunan sapaqpi waqanqaku, qharikuna sapaqpi, warmikunapas sapaqpi.
14 Wakin familiakunapas chhaynatan sapaqpi waqallanqakutaq, qharikuna sapaqpi, warmikunapas sapaqpi.
