Zacarías 7:1-14
7 Rey Darío tawa wataña kamachikushaqtinmi isqon kaq kislev killapi* tawa kaq p’unchaypi Zacariasqa+ Jehová Diosmanta willakuykunata chaskirqan.
2 Betel llaqta runakunan Sarezerta, Réguen-Melecta, runankunatawan kacharqanku Jehová Dios paykunata chaskinanpaq mañakamunankupaq,
3 ejercitokunata kamachiq Jehová Diospa wasinpi kaq sacerdotekunatapas profetakunatapas nimunankupaq: “Imaynan watan-watan pisqa kaq killapi+ waqarqani ayunarqanipas, ¿chhaynatachu sapa wata ayunanay waqanaypas?”, nispa.
4 Ejercitokunata kamachiq Jehová Diosmi niwallarqantaq:
5 “Llapa runakunata sacerdotekunatawan nimuy: ¿Pisqa kaq killapi qanchis kaq killapi+ ayunaspa waqaspa, noqaraykuchu chay qanchis chunka watantin+ chayta ruwarqankichis?
6 ¿Manachu mijusqaykichispas ujasqaykichispas qankunaq allinnillaykichispaq karqan?
7 Jerusalén llaqtapi muyuriqnin llaqtakunapipas thajpi runakuna tiyashaqtinkun, Négueb ladopipas Sefelá ladopipas runakuna tiyashaqtinkun Jehová Diosqa ñaupa profetakunawan willachirqasunkichis,+ qankunan ichaqa mana kasukurqankichischu, nispa”.
8 Jehová Diosmi noqa Zacariasta niwallarqantaq:
9 “Ejercitokunata kamachiq Jehová Diosmi nin: Chanintapuni runamasiykichista juzgaychis,+ mana tukukuq munakuywan*+ qhawarinakuychis, khuyapayanakuychis.
10 Ama q’otuychischu viudakunata, mana taytayoqkunata,+ waj llaqtayoq runakunata+ ni wajchakunatapas,*+ ama jujkuna contraqa mana allinkunata yuyaykuychischu,+ nispa.
11 Paykunan ichaqa manapuni kasukuyta munarqankuchu,+ k’ullukunan karqanku,*+ manan uyarikuytapas munarqankuchu.*+
12 Sonqonkutan diamante rumiman* jina tukuchirqanku,+ manan ejercitokunata kamachiq Jehová Diosta kasukurqankuchu. Espiritunwanmi* ñaupa profetakunaq chaupinta kamachikuyninkunata willachirqan,+ chaykunatan mana kasukurqankuchu. Chaymi ejercitokunata kamachiq Jehová Diosqa sinchita phiñakurqan.+
13 Imaynan wajakuqtiy mana uyariwarqankuchu,+ chhaynatan noqapas wajakamuwaqtinku mana uyarirqanichu,+ ninmi ejercitokunata kamachiq Jehová Dios.
14 Muyuq wayrawanmi mana reqsisqanku nacionkunaman ch’eqerichirqani,+ maypichus tiyasqankuqa wijch’usqan kapurqan, manan pipas chaynintaqa purirqanñachu.+ Munay jallp’atan paykunaqa mancharikunaman tukuchipurqanku”, nispa.
Uraypi willakuykuna
^ Qhaway “Astawan yachanapaq B15” nisqata.
^ Qhaway Explicasqa simikuna nisqapi “Mana tukukuq munakuy” nisqata.
^ Wajchataqa “pobre” nillankutaqmi.
^ Chaypiqa “k’ulluchakuspan qhepanchawarqanku” nillanmantaqmi.
^ Chaypiqa “ninrinkutan tapakurqanku” nillanmantaqmi.
^ Chaypiqa yaqapaschá “ch’ila rumiman” nillanmantaq.