Daniel 4:1-37
-
Rey Nabucodonosor Dioslla kamachikuq kasqanta reparasqanmanta (1-3)
-
Rey juj jatunkaray sach’ata mosqokusqanmanta (4-18)
-
Reypa mosqokusqanta Daniel sut’inchasqanmanta (19-27)
-
Ñaupaqta rey Nabucodonosorpi junt’akusqanmanta (28-36)
-
Reymi qanchis tiempo locoyapun (32, 33)
-
-
Rey janaq pacha Diosta jatunchasqanmanta (37)
4 “Noqa rey Nabucodonosormi jallp’antinpi kaq llapa llaqtakunaman, nacionkunaman, imaymana rimayniyoq runakunaman willani: ¡Thaj kay qankunapaq kachun!
2 Willaytan munashaykichis ancha jatun Dios milagrokunata musphanapaq kaqkunatawan noqapaq ruwapuwasqanmanta.
3 ¡May jatunmi milagrokuna ruwasqanqa, atiywan musphanapaq kaqkuna ruwasqanpas! Gobiernonqa wiñaypaq gobiernon, kamachikuyninqa llapa miraykunapaqmi.+
4 ”Noqa Nabucodonosormi wasiypi thaj kasharqani, kamachikunay palaciopi mana imamanta llakikuspa.
5 Ichaqa manchakunapaq jina kaqtan mosqokurqani. Puñunaypi puñushaqtiymi umayman jamuwarqan rijuriykuna, chaykuna rikusqaymi mancharichiwarqan.+
6 Chaymi kamachikurqani Babiloniapi kaq llapa yachayniyoq runakunata apamunankupaq, chhaynapi mosqokusqayta sut’inchawanankupaq.+
7 ”Jinan jamurqanku watuq sacerdotekuna, suerte qhawaqkuna, Caldea runakuna,* ch’askata qhawaspa watuqkuna ima.+ Paykunamanmi mosqokusqayta willarqani, ichaqa manan sut’inchayta atiwarqankuchu.+
8 Chayllamanmi jamurqan Daniel, paytan diosniypa sutinwan suticharqani+ Beltsasar+ nispa, paypin kashan ch’uya dioskunaq espiritun.+ Paymanmi willarqani mosqokusqayta, nirqanin:
9 ”Watuq sacerdotekunaq umallin Beltsasar,+ yachanin ch’uya dioskunaq espiritun qanpi kashasqanta,+ pakasqa kaqkunatapas lliuta yachasqaykita.+ Willaway mosqokusqay imaninanchus chayta, sut’inchaway chaykunata.
10 ”Puñunaypi kashaqtiymi rijuriykuna umayman jamuwarqan. Kay jallp’a pacha chaupipin juj jatunkaray+ sach’a kashasqa.+
11 Chay sach’aqa altota wiñaspan rakhuyarqan, janaq pachamanraqmi chayarqan, kay pachapi tukuy ladomantataqmi rikukurqan.
12 Raphinkunapas munaymi kasqa, rurusapataqmi kasqapas, llapanmi chaymanta mijuqku. Chay sach’a k’uchupin animalkunapas llanthukuqku, phalaq animalkunapas chaypin tiyaqku. Llapa kausaqkunan chay sach’amanta mijuqku.
13 ”Puñunaypi puñushaspa chaykunata rikushaqtiymi, janaq pachamanta juj ch’uya kaq, juj cuidaq uraykamushasqa.+
14 Paymi qaparimurqan: ¡Chay sach’ata wit’uychis,+ raphinkunatapas pallaychis, rurunkunatapas wijch’uychis! Llanthunpi kaq animalkunapas ayqechunku, k’allmanpi kaq phalaq animalkunapas ripuchunku.
15 K’ullunwan saphinkunawan ichaqa jinalla kachun, chaytaq fierrowan cobrewan watasqa kachun, chaypi pasto-pasto ukhupi kachun. Cielomanta chayamuq sulla* chay pataman sullamuchun, uywakunawan kuska chay pasto-pastopi kachun.+
16 Sonqonpas cambiasqa kachun, runaq sonqon sonqoyoq kananmantaqa animalpa sonqon sonqoyoq kachun, qanchis tiempo+ chhayna kachun.+
17 Chaytan cuidaqkuna kamachikunku,+ chaytataq ch’uya kaqkuna willashanku, chhaynapi llapa kausaqkuna ancha jatun Dioslla runakunata kamachiq kasqanta yachanankupaq,+ pitachus kamachikuqpaq munasqanta churaq kasqantapas yachanankupaq. Payqa aswan k’umuykuq runatan kamachikuqtapas churan, nispa.
18 ”Chhaynatan noqa Nabucodonosor mosqokusqani. Kunanqa Beltsasar, willaway imaninanmi chay mosqokusqay, gobiernasqaypi llapa yachayniyoq runakunamanñan chayta willani, manan sut’inchayta atiwankuchu.+ Qanqa atinkipunin chayta willawayta, yachanin qanpi ch’uya dioskunaq espiritun kasqanta, nispay.
19 ”Chayta willaqtiymi Beltsasar sutiyoq Danielqa llakikurqan,+ manchasqa iman kasharqan.
”Jinan noqaqa nirqani: Imananmi Beltsasar, ama chay mosqokusqayta ni chay mosqokusqay imaninanchus chaytapas manchakuychu, nispa.
”Beltsasartaq niwarqan: Reyníy, mosqokusqaykiqa cheqnikuqniyki runakunapi junt’akuchun, chay mosqokusqayki imaninanchus chaypas enemigoyki runakunaman chayachun.
20 ”Chay rikusqayki sach’aqa, rakhuyaspa jatunta wiñaspa janaq pachakama chayaq sach’aqa, kay pachapi lliu ladomanta rikukuq sach’aqa,+
21 chay munay raphikunayoq, askha ruruyoq, mijuytapas llapaman qoq sach’aqa, uywakunatapas llanthuq, phalaq animalkunamanpas wasita qoq sach’aqa+
22 qanmi kanki reyníy. Qanqa manchay jatunmi kanki, atiyniykipas janaq pachakamaraqmi chayashan,+ gobiernoykipas kay pachaq k’uchunkunakamaraqmi chayashan.+
23 ”Chay mosqoypin rikusqanki juj cuidaqta, ch’uya kaqta+ janaq pachamanta uraykamushaqta, paymi nimusqa: Chay sach’ata wit’uychis, chinkachiychis chayta, k’ulluntawan saphinkunallatawanmi kaqta saqenkichis, chaytataq fierrowan cobrewan watankichis, chaypin kanqa pasto-pasto ukhupi. Sullan chayman chayamunqa, uywakunawan kuskan chay pasto-pastopi kanqa, qanchis tiempon chhayna kanqa,+ nispa.
24 Reyníy, kaymi chaypa sut’inchaynin, kaytan ancha jatun Dios qanpaq kamachikun:
25 Runakuna ukhumantan wijch’usqa kanki, campopi animalkunawan kuskan tiyanki, torokuna jinan pastota mijunki. Cielomanta chayamuq sullan apichasunki,+ joq’ochasunki, chaykaman qanchis tiempo+ pasanqa, qanchis tiempon chhayna kanki,+ ancha jatun Dioslla runakunata kamachiq kasqanta yachanaykikama, pitachus kamachikuqpaq munasqanta churaq kasqantapas yachanaykikama.+
26 ”Sach’aq k’ulluntaqa saphinkunatapas kaqllapitaq saqenanku karqan chayqa,+ maypachachus janaq pachapi Dios cheqaq kamachikuq kasqanta yachanki chayñan jujmanta gobiernoykita chaskikapunki.
27 Chhaynaqa reyníy, kay yuyaychasqayta chaskiykuway. Amaña juchakunapi puriychu, aswanpas allin kaqta ruway, amaña mana allinkunataqa ruwaychu, aswanpas wajchakunata* khuyapayay. Chayta ruwanki chayqa, ichapaschá unaytaraq allillan kawaq,+ nispa”.
28 Tukuy chaykunan rey Nabucodonosorta pasarqan.
29 Chunka iskayniyoq killakuna qhepatan reyqa Babiloniapi palacion patapi purisharqan.
30 Chaypin reyqa nisharqan: “¿Manachu kayqa kamachikunaypaq noqa kikiy kallpaywan jatarichisqay Jatun Babilonia? ¿Manachu kayqa jatun kayniypas mast’arikunanpaq kashan?”, nispa.
31 Chaykunata rey rimashallaqtinraqmi janaq pachamanta juj kunka uyarikurqan, khaynatan nimurqan: “Rey Nabucodonosor, uyariy. Kamachikuymi qanmanta qechusqa kapun.+
32 Runakuna ukhumantan wijch’usqa kanki, campopi animalkunawan kuskan tiyanki, torokuna jinan pastota mijunki. Chaykaman qanchis tiempo pasanqa, ancha jatun Dioslla runakunata kamachiq kasqanta yachanaykikama, pitachus kamachikuqpaq munasqanta churaq kasqantapas yachanaykikama”,+ nispa.
33 Chay ratupin chay simikuna Nabucodonosorpi junt’akurqan. Payqa runakuna ukhumantan wijch’usqa karqan, jinaspa torokuna jina pastota mijuyta qallarirqan. Cuerpontapas janaq pacha sullan joq’ocharqan, chujchanpas ankaq phurun jinan jatunllataña wiñarqan, sillunkunapas phalaq animalkunaq sillun jinaraqmi wiñarqan.+
34 “Chay tiempo pasaqtinmi+ noqa Nabucodonosorqa janaq pachata qhawarirqani, jinaspa yuyayniyman kutirqani. Jinan ancha jatun Diosta alabarqani, wiñay-wiñaypaq kausaq Diostan jatuncharqani, paypa kamachikuynin wiñaypaq kasqanrayku, gobiernonpas llapa miraykunapaq kasqanrayku.+
35 Paypa ñaupanpiqa kay pacha runakunaqa manan imapaschu kanku. Payqa ima munasqantan ruwan janaq pacha ejercitowanpas kay pacha runakunawanpas. Paytaqa manan pipas jark’anmanchu+ nitaq ninmanchu: ¿Imatan ruwarqanki?,+ nispaqa.
36 ”Chay ratupin yuyayniyman kutirqani, jinaspa jatun gobiernoyta jujmanta chaskikapurqani, chaskikapullarqanitaqmi jatun kayniyta atiyniyoq kayniytapas.+ Palaciopi umalliykunapas autoridadniykunapas makillan noqaman jamuwarqanku, jujmantan kamachikuq kapurqani, astawanraqmi atiyniypas jatun kayniypas yapakurqan.
37 ”Kunanqa noqa Nabucodonosormi janaq pacha reyta alabani jatunchani ima.+ Paypa tukuy ruwasqankunaqa cheqaqmi, ñanninkunapas chaninmi,+ payqa llapa uma oqariqkunatapas k’umuykachinmanmi”.+
Uraypi willakuykuna
^ Chay runakunaqa layqakuna ch’askata qhawaspa watuqkuna iman karqanku.
^ Sullataqa “chhulla” nillankutaqmi.
^ Wajchataqa “pobre” nillankutaqmi.
