Daniel 9:1-27
9 Kaykunan pasarqan Asueroq churin Darío kamachikuyta qallarisqan watapi.+ Asueroqa Media nacionmantan karqan, paytan churasqaku Caldea suyu runakunata kamachinanpaq.+
2 Darío kamachikuyta qallarisqan watapin noqa Danielqa qelqakunata* leespa entienderqani jayk’a watachus Jerusalén llaqta purunyachisqa kanan karqan chayta. Jehová Dios profeta Jeremiaswan qelqachisqanman jinaqa Jerusalén llaqtaqa qanchis chunka watan+ purunyachisqa kanan kasqa.+
3 Chaymi qhasqa p’achawan churakuspa, ayunaspa,+ usphawan jach’ikuspa ima cheqaq Jehová Diosmanta mañakuspa rogakurqani.
4 Jehová Diosniymanmi juchaykuta willakurqani, paytan nirqani:
“Jehová Diosníy, qanqa cheqaq Diosmi kanki, ancha jatun Diosmi kanki, manchakunapaq Diosmi kanki, rimasqaykitapas junt’aq Diosmi kanki, munakuqniykikunamanpas kamachikuyniykikunata kasukuqkunamanpas+ mana tukukuq munakuyta* rikuchiq Diosmi kanki.+
5 Diosníy, juchallikuykun, mana allin kaqkunatan ruwayku, qan contran jatariyku,+ kamachikuyniykikunatapas leyniykikunatapas manan kasukuykuchu.
6 Sutiykipi rimaq profetakunatapas manan kasukuykuchu.+ Paykunan kamachiqniyku reykunaman, umalliyku runakunaman, ñaupa taytaykuman, llaqtantin runakunamanpas imaymanata willasqaku.
7 Diosniyku Jehová, qanqa chaninta ruwaq Diosmi kanki, ichaqa noqayku Judamanta kaqkuna, Jerusalenmanta kaqkuna, llapan Israelmanta kaqkuna, karupi kaqkuna, qayllapi kaqkunapas rikusqayki jina sinchi p’enqasqan kashayku. Mana kasukuq kasqaykuraykun tukuy ladoman ch’eqechiwarqankiku.+
8 ”Diosniyku Jehová, noqaykupas, reyniykupas, umalliykupas, ñaupa taytaykupas qan contra juchallikusqaykumantan p’enqasqa kashayku.
9 Diosniyku Jehová, qanpin kashan khuyapayaypas, jucha pampachaypas.+ Noqaykuqa juchasapakunan kayku, qan contran mana allinkunata ruwayku.+
10 Jehová Diosniyku, manan uyarikurqaykuchu, manan kamachiyki profetakunawan willachiwasqaykiku kamachikuykunatapas kasukurqaykuchu.+
11 Llapa Israel llaqtan kamachikuyniykikunata mana kasukuspa qanmanta t’aqakapurqayku. Kunantaq juchayku jawa qan cheqaq Diospa kamachiyki Moiseswan qelqachisqayki ñakayta+ jurasqa juchachayta chayachimuwankiku, juchaykumantan khayna mana allinpi tarikushayku.
12 Diosniyku, simiykiman jinapunin ruwashanki noqaykumanpas kamachiqniyku runakunamanpas jatun ñak’ariyta chayachimuspayki.+ Kay pachapiqa manan kaykunaqa jayk’aqpas Jerusalenpi jinaqa pasarqanchu.+
13 Moiseswan qelqachisqaykiman jinan noqaykuqa sinchita ñak’arishayku.+ Diosniyku Jehová, manan noqaykuqa yanapayniykita maskharqaykuchu, manan juchaykutapas saqerqaykuchu,+ manan cheqaq rimaq kasqaykitapas repararqaykuchu.
14 ”Jehová Diosniyku, qanqa makillan tukuy ima ruwasqaykutapas qhawamusharqanki, chaymi kay ñak’ariytaqa chayachimuwarqankiku. Jehová Diosniyku, tukuy ima ruwasqaykipas chaninkaman, noqaykun ichaqa mana simiykita uyarikurqaykuchu.+
15 ”Jehová Diosniyku, Egipto jallp’amanta jatun atiywan llaqtaykita orqomuq Diosmi kanki,+ qanmi sutiykita lliuman reqsichirqanki, kunankamapas allin reqsisqan kashan.+ Noqaykuqa juchallikuq runakunan kayku, mana allinkunata ruwaqkunan kayku.
16 Chaninta ruwaq Diosniyku Jehová,+ ama jinachu kay, amaña Jerusalén llaqtaykita ñak’arichiychu, amaña chay ch’uya orqoykita sufrichiychu. Noqaykupas ñaupa taytaykupas juchallikusqayku jawan Jerusalenpas llaqtayki runakunapas muyuriqniykupi kaq llaqtakunaq pisichasqan kashayku.+
17 Diosníy, uyariykuwayyá kay serviqniykiq mañakusqanta rogakusqantapas. Jehová Diosníy, sutiykirayku thunisqa+ ch’uya wasiykiman k’anchayniykita k’ancharichimuy.+
18 ¡Diosníy, uyariykamuway, qhawarimuway! Qhawariy, khayna wijch’usqan kashayku, sutiyki apaq llaqtapas qonqasqan kashan. Manan imatapas chaninta ruwaq kasqaykuraykuchu wajakamushaykiku, aswanpas ancha khuyapayakuq Dios kasqaykiraykun wajakamuykiku.+
19 Jehová Diosníy, uyariykuwayku. Diosníy Jehová, perdonaykuwayku.+ ¡Jehová, makilla uyariykuwayku, jinaspa yanapaykuwayku! Diosnilláy, qan kikiykirayku ama jinallata qhawawaykuchu, llaqtaykiqa, llaqtayki runakunaqa sutiykitan apanku”,+ nispa.
20 Chayta rimashallaqtiyraqmi, mañakushallaqtiyraqmi, juchaytapas Israel llaqtaypa juchantapas willashallaqtiyraqmi, Jehová Diosniymanta ch’uya orqonpaq rogakushallaqtiyraqmi,+
21 Diosniymanta mañakushaqtiymi rijuriypi rikusqay+ Gabrielqa+ maypichus kashasqayman tardeyaykuy ofrenda jaywana horasta asuykamuwarqan, noqaqa sinchi sayk’usqan kasharqani.
22 Jinaspan willawarqan imakunachus pasanqa chayta, niwarqanmi:
“Daniel, qanta yanapaqmi jamushani, noqan entiendechisayki.
23 Mañakuyta qallarishaqtiykin Diosmanta juj willakuy lloqsimurqan, chayta willaqmi jamushani. Qantaqa anchatan Diosqa munakusunki.+ Chhaynaqa, imatachus nisayki chayta tukuy yuyaywan uyariy, reparay imachus chay rijuriy chayta.
24 ”Qanchis chunka semanakunan* t’aqasqa kashan, llaqtaykimanta ch’uya orqomantapas+ jucha chinkananpaq, mana allin ruwaykunapas chinkananpaq,+ jucha pichasqa kananpaq,+ chanin kaq wiñaypaq kananpaq,+ rijuriypi rikusqapas profeciapas junt’akunanpaq,+ ch’uyay-ch’uya kaqpas ajllasqa kananpaq.
25 Kayta allinta reparay, jinaspapas entiendey, Jerusalén llaqta jujmanta sayarichisqa kananpaq+ kamachikuy lloqsimusqanmanta umalli+ Mesías* chayamunankaman+ qanchis semanakuna pasanqa, jinallataq soqta chunka iskayniyoq semanakuna.+ Sinchi llakikuy tiempopin Jerusalén llaqtaq perqankunaqa sayarichisqa kanqa, plazankunapas zanjankunapas jujmanta ruwasqan kanqa.
26 ”Chay soqta chunka iskayniyoq semanakuna pasasqan qhepamanmi Mesiasqa wañuchisqa kanqa,+ manan imanpas qhepanqachu.+
”Juj umalliq llaqtanmi jamuspa Jerusalén llaqtata ch’uya cheqastapas thuninqa.+ Lloqllawan jinan ch’usaqyachisqa kanqa. Tukukuykaman guerrapas kanqa. Diosmi ninña thunisqa kananpaq.+
27 ”Askha runakunapaqmi payqa rimanakuyta juj semanatawan junt’achinqa, kuskan semanatataq sacrificio jaywayta, ofrenda jaywaytapas tukuchipunqa.+
”Chay millay ruwaykunaq rafranpin ch’usaqyachiqqa jamunqa,+ ch’usaqyachisqa llaqtamanta imachus nisqanqa junt’akunqapunin, chinkachisqapunin kanqa”, nispa.
Uraypi willakuykuna
^ Chaypiqa “ch’uya qelqakunata” nillanmantaqmi.
^ Qhaway Explicasqa simikuna nisqapi “Mana tukukuq munakuy” nisqata.
^ Chaypiqa sapanka semana qanchis watakuna kasqanmantan rimashan. Llapanpiqa 490 watakunan.
^ Chaypiqa “ajllasqa” nillanmantaqmi.
