Deuteronomio 16:1-22
16 ”Abib killatan* makilla suyankichis, chay killapin Jehová Diosniykichispaq Pascua Fiestata ruwankichis.+ Chay killapin Jehová Diosniykichisqa tutapi Egiptomanta orqomurqasunkichis.+
2 Maytachus Jehová Diosniykichis ajllakunqa sutin jatunchasqa kananpaq+ chaypin Jehová Diospaq Pascua Fiesta ofrendata ñak’ankichis,+ chaytan ajllankichis ovejamanta wakamantawan.+
3 Chaytaqa mana levadurayoq t’antayoqtan mijunkichis.+ Qanchis p’unchaymi mana levadurayoq t’antataqa mijunkichis. Chay t’antaqa ñak’ariy t’antan, imaynan ruwarqankichis Egiptomanta usqhaylla lloqsimushaspa chhaynatan ruwankichis.+ Chaykunata ruwaspan Egiptomanta lloqsimusqaykichis p’unchayta tukuy kausasqaykichis tiempo yuyarinkichis.+
4 Qanchis p’unchaymi llapa llaqtaykichispi mana kanqachu poqosqa masa.+ Ñaupaq p’unchay ch’isinta ñak’asqaykichis aychatapas aman qhepantin p’unchaykamaqa puchunkichischu.+
5 Jehová Diosniykichispa qosqasuykichis jallp’apiqa aman comuntachu mayqen llaqtapipas Pascua Fiestapaq sacrificiotaqa ñak’ankichis.
6 Maytachá Jehová Diosniykichis ajllakunqa sutin jatunchasqa kananpaq chaypin chaytaqa ñak’ankichis. Chaymantapas Pascua Fiestapaq sacrificiotaqa inti jaykuruqtin jinan ñak’ankichis+ ima p’unchaychus Egiptomanta lloqsimurqankichis chay p’unchaypi.
7 Chay ofrendataqa maytachus Jehová Diosniykichis ajllakunqa+ chaypin kankankichispas mijunkichispas.+ Qhepantin p’unchayqa karpaykichismanmi kutinkichis.
8 Soqta p’unchaymi mana levadurayoq t’antata mijunkichis, qanchis kaq p’unchayqa Jehová Diosniykichista yupaychanaykichispaqmi juñukunkichis. Aman chay p’unchayqa imapipas llank’ankichischu.+
9 ”Cebadaykichis rutuyta qallarisqaykichismantapachan qanchis semanata yupankichis.+
10 Qanchisnintin semana tukuytan Jehová Diosniykichispaq ruwankichis Semanakuna Fiestata.+ Chaypin Jehová Diosniykichispa bendicionta churamusqasuykichisman jina tukuy sonqo ofrendaykichista apamunkichis.+
11 Maytachá Jehová Diosniykichis ajllakunqa sutin jatunchasqa kananpaq+ chaypin Jehová Diosniykichispa ñaupanpi kusikunkichis qankunapas, qhari wawaykichispas, warmi wawaykichispas, qhari kamachiykichispas, warmi kamachiykichispas, llaqtaykichispi tiyaq Leví runapas, qankuna ukhupi tiyaq waj llaqtayoq runapas, mana taytayoq wawapas,* viuda warmipas.
12 Aman qonqankichischu Egiptopi esclavo kamusqaykichistaqa,+ chayraykun kasukunkichis kay kamachikuykuna willasqayta.
13 ”Eraykichismanta* mijuyniykichista oqariyta tukuspa, aceite ch’irwanaykichismantapas aceiteykichista oqariyta tukuspa, uvas sarunaykichismantapas vinoykichista oqariyta tukuspan Ch’ujlla Ruway Fiestata ruwankichis,+ qanchis p’unchaymi chay fiestataqa ruwankichis.
14 Chay fiestapin kusikunkichis q’ochukunkichis+ qankunapas, qhari wawaykichispas, warmi wawaykichispas, qhari kamachiykichispas, warmi kamachiykichispas, Leví runapas, qankuna ukhupi tiyaq waj llaqtayoq runapas, mana taytayoq wawapas, viuda warmipas.
15 Qanchis p’unchaymi Jehová Diosniykichispaq chay fiestata ruwankichis+ maytachá Jehová Diosniykichis ajllakunqa chaypi. Jehová Diosniykichisqa llapa llank’asqaykichismanmi, llapa ima ruwasqaykichismanmi bendicionninta churamunqa,+ chhaynapin qankunaqa kusisqa kankichis.+
16 ”Llaqtaykichispi llapa qharikunan watapi kinsa kutita Jehová Diospa ñaupanman rinqaku. Maytachá pay ajllakunqa chaymanmi rinqaku Mana Levadurayoq T’anta Fiestapi,+ Semanakuna Fiestapi,+ Ch’ujlla Ruway Fiestapi+ ima. Chay fiestakunapiqa aman pipas ch’usaq makintinqa Jehová Diospa ñaupanmanqa rinqachu.
17 Sapankan ofrendaykichista apankichis may tukuytachus Jehová Diosniykichis bendicionninta churamusunkichis chayman jina.+
18 ”Jehová Diosniykichispa qosqan sapanka llaqtapin aylluykichisman jina juezkunata+ oficialkunatawan churankichis, paykunan llaqta runakunata chaninta juzganqaku.
19 Aman justiciataqa waqllichinkichischu,+ aman pimanpas sayapakunkichischu,+ amallataqmi ima pagotapas chaskinkichischu juiciopi pimanpas sayapakunaykichisraykuqa, chayqa allin yuyayniyoq runakunatan ñausayachin,+ chanin runakunaq simintan q’ewin.
20 Chanintapunin imatapas ruwankichis,+ chhaynapin kausashallankichis, jap’ikapunkichismi Jehová Diosniykichispa qonan jallp’atapas.
21 ”Jehová Diosniykichispaq ruwasqaykichis altar qayllapiqa aman ima sach’atapas plantankichischu yupaychanapaq sayashaq k’ulluta* jinaqa.+
22 ”Aman ima yupaychana rumitapas sayachinkichischu,+ Diosniykichis Jehová Diosqa cheqnikunmi chaykunataqa.
Uraypi willakuykuna
^ Qhaway “Astawan yachanapaq B15” nisqata.
^ Chaypiqa “wajcha wawapas” nillanmantaqmi.
^ Era patataqa “wayrachina pata” nillankutaqmi.
^ Qhaway Explicasqa simikuna nisqapi “Sayashaq k’ullu” nisqata.
