Deuteronomio 30:1-20
30 ”Bendicionmanta ñakaymantawan willasqay qankunapi junt’akuqtinmi,+ maykunamanchus Jehová Dios ch’eqerichirqasunkichis chay nacionkunapi chaykunata yuyariqtiykichismi,+
2 qankunapas wawaykichiskunapas Jehová Diosniykichisman kutirimuqtiykichismi,+ paypa siminta tukuy sonqo tukuy alma*+ uyarikuqtiykichismi, kay qosqay kamachikuykunaman jina kausaqtiykichismi,
3 Jehová Diosqa wajmanta pusampusunkichis maypichus preso kashankichis chaymanta,+ qankunata khuyapayaspan+ Jehová Diosqa maykunamanchus ch’eqerichirqasunkichis chaymanta kutichimpusunkichis.+
4 Kay pacha k’uchukunamanña ch’eqechisqa karqankichis chaypas, chaymantan Jehová Diosqa oqarimpusunkichis jinaspa pusampusunkichis.+
5 Ñaupa taytaykichiskunaq jap’ikapusqan jallp’amanmi Jehová Diosqa pusampusunkichis, jinan qankunaqa chaypi tiyapunkichis. Ñaupa taytaykichiskunamantapas astawanraqmi payqa allinyachisunkichis, mirachisunkichispas.+
6 Chaymantapas Jehová Diosniykichisqa qankunaq sonqoykichista mirayniykichis runakunaq sonqonta iman ch’uyanchanqa,+ chhaynapi Jehová Diosniykichista tukuy sonqoykichiswan, tukuy almaykichiswan* munakunaykichispaq, chayta ruwaspaqa kausashallankichismi.+
7 Chaymantataq Jehová Diosqa llapa chay ñakaykunata enemigoykichiskunaman chayachinqa, pikunachus cheqnikurqasunkichis, pikunachus qatikacharqasunkichis chaykunaman.+
8 ”Qankunaqa Jehová Diosmanmi kutimunkichis, jinaspa paypa siminta uyarikunkichis, kunan willasqay llapa kamachikuyninkunatan kasukunkichis.
9 Diosniykichis Jehová Diostaq llapa ima ruwasqaykichisman bendicionninta churamunqa,+ askhan wawaykichiskunapas uywaykichiskunapas kanqa, chajraykichiskunapas sumaqtan rurunqa. Jehová Diosqa anchatan kusikunqa yapamanta qankunata allinyachispa; imaynan ñaupa taytaykichiskunata allinyachispa kusikurqan chhaynatan kusikunqa.+
10 Chaykunan kanqa Jehová Diosniykichispa siminta uyarikuqtiykichis, kay qelqapi qelqasqa kamachikuyninkunata leyninkunatapas kasukuqtiykichis, Jehová Diosniykichisman tukuy sonqo tukuy alma*+ kutirikuqtiykichis.
11 ”Kay qosqay kamachikuykunaqa manan sasa junt’aychu, manataqmi qankunamanta karupichu kashan.+
12 Manan janaq pachapichu kashan: ¿Pitaq janaq pachatari wichapuwasun chayta apamuspa willawananchispaq kasukunanchispaqpas?,+ nispa ninaykichispaqqa.
13 Manataqmi lamar-qocha chimpapichu kashan: ¿Pitaq lamar-qochatari chimpapuwasun chayta apamuspa willawananchispaq kasukunanchispaqpas?, nispa ninaykichispaqqa.
14 Aswanpas chay kamachikuy simiqa qayllaykichispin kashan, qankunaq simiykichispi sonqoykichispi iman kashan,+ chhaynapi chayta junt’anaykichispaq.+
15 ”Kunanmi qankunaq ñaupaykichisman churashani kausayta wañuytawan, allin kaqta mana allin kaqtawan.+
16 Kay qosqay Jehová Diosniykichispa kamachikuyninkunatachus junt’ankichis, Jehová Diosllata munakuspa,+ paypa ñannillanpi purispa, kamachikuyninkunata, leyninkunatapas kasukuspa chayqa, kausashallankichismi,+ askhamantaqmi tukunkichispas, Jehová Diosniykichispas askhatan bendicionninta churamusunkichis maymanchus jaykunkichis chay jallp’apiqa.+
17 ”Ichaqa sonqoykichischus Diosmanta karunchakunqa,+ manataq payta uyarikunkichischu, aswanpas engañachikunkichischus jinaspa waj dioskunaman qonqoriykukunkichis, chaykunatachus servinkichispas chayqa,+
18 cheqaqtapunin niykichis: Wañunkichismi.+ Manan unaychu kausankichis Jordán mayuta chimpaspa jap’ikapusqaykichis jallp’apiqa.
19 Kunanmi janaq pachata kay pachatawan wajani kausaymanta wañuymantawan, bendicionmanta ñakaymantawan willasqaymanta testigo kanankupaq.+ Ajllakuychis kausayta qankunapas mirayniykichis runakunapas+ kausanaykichispaq.+
20 Chhaynaqa munakushallaychis Diosniykichis Jehová Diosta,+ uyarikullaychis simintapas, payllaman k’askakuychis.+ Paymi kausayniykichisqa, paypa yanapayninwanmi jap’ikapunaykichis jallp’apiqa unaypaq kausankichis. Chay jallp’atan Jehová Diosqa prometerqan ñaupa taytaykichiskuna Abrahanman, Isaacman, Jacobman ima”,+ nispa.
