Deuteronomio 31:1-30
31 Chaymantataq Moisesqa llapa Israel runakunaq ñaupanpi sayaykuspa nirqan:
2 “Noqaqa ñan pachaj iskay chunka wataypiña kashani,+ manañan noqachu pusasaykichis, chaymantapas Jehová Diosmi niwarqan: Manan qanqa chimpankichu kay Jordán mayutaqa,+ nispa.
3 Jehová Diosmi qankunaq ñaupaykichista chimpanqa, paymi chay nacionkunapi llapa runakunata chinkachinqa, jinan qankunaqa paykunaq jallp’ankuta jap’ikapunkichis.+ Chaymantapas Josuemi pusasunkichis+ Jehová Diospa nisqanman jina.
4 Jehová Diosqa llapa chay nacionkunatan chinkachinqa imaynan amorreo runakunaq reynin Sehontapas+ Ogtapas+ chinkachirqan chhaynata, imaynan llaqtankutapas ñut’urqan chhaynata.+
5 Jehová Diosmi paykunata atipachisunkichis, qankunataq llapa imachus kamachisqayman jina paykunata ruwankichis.+
6 Kallpachakuychis,+ ama manchakuychischu. Aman chay runakunataqa manchakunkichischu,+ Diosniykichis Jehová Diosmi qankunawan kuska rishan, payqa manan saqesunkichischu nitaq wijch’usunkichispaschu”,+ nispa.
7 Chaymantataq Moisesqa Josueta wajamurqan, jinaspa llapa Israel runakunaq ñaupanpi nirqan: “Kallpachakuy,+ ama manchakuychu, qanmi kay llaqtata pusanki Jehová Diospa prometesqan jallp’aman, chay jallp’atan payqa ñaupa taytankuman prometesqa, chaytan qanqa paykunaq herenciankupaq qopunki.+
8 Jehová Diosmi ñaupaykita rinqa, payqa qanllawanpunin kashanqa,+ manan saqesunkichu nitaq wijch’usunkipaschu. Chhaynaqa aman manchakunkichu, nitaq khatatatankipaschu”,*+ nispa.
9 Chaymantataq Moisesqa chay kamachikuyta qelqarqan,+ jinaspa Jehová Diospa rimanakuynin arcata apaq Leví sacerdotekunaman, Israelpi umalliqkunamanwan* qorqan.
10 Jinaspa paykunata kamachirqan: “Sapa qanchis watan, manu pampachana watapi,+ Ch’ujlla Ruway Fiestapi,+
11 Israel runakuna Jehová Diospa ñaupanman+ jamuqtinku kay kamachikuykunata llapa runakunaman leenkichis. May llaqtatachá Diosniykichis ajllakunqa chaypin chayta leenkichis.+
12 Paykunataqa llapantan juñunkichis+ qharikunata, warmikunata, wawakunata, qankuna ukhupi tiyaq waj llaqtayoq runakunata ima, chhaynapi kamachikuy simi leesqata uyarinankupaq yachanankupaqwan. Chhaynapin yachanqaku Jehová Diosninku manchakuyta, makillataqmi junt’anqaku llapa kay kamachikuykunatapas.
13 Chaymantapas kay kamachikuykunamanta mana yachaq wawankun chaykunata uyarinqaku,+ jinaspa Diosninku Jehová Dios manchakuyta yachanqaku. Jordán mayuta chimpaspa jap’ikapunaykichis jallp’api llapa kausasqanku tiempon paykunaqa Diosta manchakuspa kausanqaku”,+ nispa.
14 Chaykuna qhepatan Jehová Diosqa Moisesta nirqan: “Ñan chayamushanña wañupunayki p’unchay.+ Josueta wajamuy, paywan kuskan tupana karpaq ñaupanman jamunkichis, chaypin payta churasaq umalli kananpaq”,+ nispa. Jinan Moisesqa Josuewan kuska tupana karpaq ñaupanman rirqanku.
15 Chaypin Jehová Diosqa sayaq phuyupi rijurirqan, chay phuyuqa yupaychana karpaq ñaupanpin sayaykurqan.+
16 Jehová Diosmi Moisesta nirqan: “Qanqa ñan wañupunayki patapiña kashanki. Kay runakunaqa jap’ikapunanku jallp’a muyuriqpi kaq llaqtakunaq yanqa diosninkunawanmi noqata wasanchawanqaku.*+ Saqepuwanqakun,+ paykunawan rimanakusqaytapas p’akipunqakun.+
17 Chaypachan noqaqa paykunapaq sinchita phiñakuspa+ paykunata saqerparisaq,+ manan paykunataqa qhawarisaqchu,+ ch’usaqyachisqa kanankukaman jina kanqaku. Imaymanapi sufrispa, imaymanapi ñak’arispan+ paykunaqa ninqaku: ¿Manachu kay llakikunaqa jamushawanchis Dios saqepuwasqanchisrayku?,+ nispa.
18 Noqaqa manapunin paykunataqa qhawarisaqchu. Yanqa dioskunata yupaychaspa mana allinkunata ruwasqankuraykun mana qhawarisaqchu.+
19 ”Kunanqa kay takita qelqankichis,+ chaytan Israel runakunaman yachachinkichis.+ Chay takiwanmi paykunaqa yuyarinqaku imakunachus willasqayta.+
20 Ñaupa taytankuman jurasqay jallp’aman pusaqtiymi,+ lechepas mielpas askha kasqan jallp’aman+ pusaqtiymi paykunaqa amikunankukama chaypi mijunqaku, imaymanapin allinyanqakupas.+ Chaymantataq waj dioskunaman rinqaku, chaykunatan servinqaku, manan noqataqa respetawanqakuchu, p’akinqakun paykunawan rimanakusqaytapas.+
21 Imaymana ñak’ariykunapi llakikuykunapi tarikuqtinkun+ chay taki paykunata yuyarichinqa imakunachus nisqayta. (Aman mirayniykichis runakunaqa chay takitaqa qonqanqakuchu). Manaraq prometesqay jallp’aman pusaykunichu chaypas, noqaqa ñan yachaniña maymanchus sonqonku aysashan chayta”,+ nispa.
22 Jinan Moisesqa chay p’unchaypacha chay takita qelqarqan, jinaspa Israel runakunaman yachachirqan.
23 Chaymantataq payqa* Nunpa churin Josueta+ churarqan umalli kananpaq, jinaspa nirqan: “Kallpachakuy,+ ama manchakuychu. Qanmi Israel runakunata pusanki prometesqay jallp’aman,+ noqaqa qanllawanpunin kashasaq”, nispa.
24 Chay kamachikuykunata juj qelqapi llapanta qelqayta tukuspan Moisesqa+
25 Jehová Diospa rimanakuynin arcata apaq Leví runakunata nirqan:
26 “Kay kamachikuy qelqata apaychis+ jinaspa Jehová Diosniykichispa rimanakuynin arcaq+ ladonman churamuychis, chaypi contraykichispi testigo kananpaq.
27 Noqaqa allintan yachani kay llaqta runakuna mana kasukuq+ k’ullu+ kasqankuta. Kausashaqtiyraqtaq Jehová Diosta mana kasukunkuchu chayqa, ¡imaynaraqchá kanqaku wañupuqtiyqa!
28 Kay simikunata willanaypaq kayman juñumuychis ayllukunapi umalliqkunata, kamachikuq runakunatawan. Janaq pachata kay pachatawanmi paykuna contra testigo kanankupaq churasaq.+
29 Noqaqa allintan yachani noqa wañuqtiyqa imaymana mana allinkuna ruwanaykichista;+ pantankichismi reqsichisqay ñanmantapas, qhepamantaq imaymana ñak’ariykuna chayamusunkichis.+ Jehová Diospa ñaupanpi mana allinkunata ruwasqaykichisrayku, makiykichiswan mana allinkunata ruwaspa payta phiñachisqaykichisraykun imaymanawan muchunkichis”, nispa.
30 Chaymantataq Moisesqa chay qelqasqan takita Israel runakunaman willarqan qallariyninmanta tukukuyninkama.+ Nirqanmi:
Uraypi willakuykuna
^ Khatatataytaqa “kharkatiy” nillankutaqmi.
^ Chaypiqa “kuraq runakunamanwan” nillanmantaqmi.
^ Chaypiqa waj idolokunata yupaychaymantan rimashan.
^ Chaypiqa Diosmantan rimashanman.
