Deuteronomio 8:1-20
8 ”Allintan kay qosqay kamachikuykunataqa junt’ankichis, chhaynapi kausashanallaykichispaq,+ askhata miranaykichispaq, ñaupa taytaykichiskunaman Jehová Diospa prometesqan jallp’ata+ jap’ikapunaykichispaqwan.
2 Yuyariychis, Jehová Diosniykichismi tawa chunka wata mana tukurikuq ch’inneqninta pusamurqasunkichis+ k’umuykukuq kayta yachachinasuykichispaq, pruebaman churanasuykichispaq,+ imachus sonqoykichispi kashan chayta yachananpaq,+ kasukunkichischus kamachikuyninkunata icha manachus chayta yachananpaqwan.
3 Chayraykun k’umuykukuq kayta yachachirqasunkichis, yarqaywanpas muchuchirqasunkichis;+ chaymantataq maná nisqata mijuchirqasunkichis,+ chay mijunataqa manan ñaupa taytaykichiskunapas reqsirqankuchu. Chaywanmi yachachirqasunkichis runaqa mana t’antallawanchu kausasqanta, aswanpas Jehová Diospa llapa nisqankunawan kausasqanta.+
4 Chay tawa chunka wata ukhupiqa manan p’achaykichispas thantakurqanchu nitaq chakiykichispas punkirqanchu.+
5 Imaynan juj tayta wawanta yachachin chhaynatan Jehová Diospas qankunata yachachirqasunkichis,+ qankunaqa allintan chayta yachankichis.
6 ”Chayrayku Jehová Diospa kamachikuyninkunata kasukuychis, paypa ñanninpi purispa payta manchakuspa ima.
7 Jehová Diosniykichisqa allin jallp’amanmi pusashasunkichis.+ Chay jallp’aqa mayukunayoq, pujyukunayoq iman; wayq’onkunapipas orqo-orqonkunapipas askhan unuqa purishan.
8 Waputan chay jallp’apiqa trigopas, cebadapas wiñan; uvaskunapas, higoskunapas, granadakunapas sumaqtan wiñan.+ Chay jallp’aqa aceituna aceiteq* jallp’anmi, mielpa jallp’anmi.+
9 Chay jallp’apiqa manan imapas faltasunkichischu, llasaqmi mijuyniykichispas kanqa. Chay jallp’apiqa rumikunapas fierroyoqmi, orqokunapas cobreyoqmi, chaykunatan orqonkichis.
10 ”Chaykunata mijuspa sonqopas sonqo kaspaykichisqa Jehová Diosniykichistan jatunchankichis chay sumaq jallp’ata qosqasuykichismanta.+
11 Amapunin kay qosqay kamachikuykunata leykunatapas qonqankichischu, mana chayqa Jehová Diosniykichistan qonqashawaqchis.
12 Mijuspaykichis sonqopas sonqo kaspataq, munay wasikunata ruwaspa chaypi tiyaspataq,+
13 wakaykichiskunapas ovejaykichiskunapas askhayaqtintaq, qoriykichispas qolqeykichispas askhayaqtintaq, imaykichispas askha kaqtintaq
14 sonqoykichis jatunchakunman,+ jinaspa Egiptopi esclavo kasqaykichismanta orqomuqniykichis Jehová Diosniykichista qonqapuwaqchis.+
15 Paymi mana tukurikuq manchakuy ch’inneqninta pusamurqasunkichis,+ picaq mach’aqwaykunaq chaupinta, alacrán kurukunaq chaupinta, unuq mana kasqan pampanta. Chaypin payqa ch’ila qaqamanta unuta orqopurqasunkichis.+
16 Maná nisqa mijunatan mijuchirqasunkichis,+ ñaupa taytaykichiskunaq mana reqsisqan mijunata, chaywanmi k’umuykukuq kayta yachachirqasunkichis,+ imayna sonqochus kankichis chayta yachananpaq, chhaynapi jamuq tiempopi allillan kanaykichispaq.+
17 Sonqoykichispichus niwaqchis: Kallpaywanmi kaykunata tarini, makiypa atiyninwanmi qhapaq kani,+ nispa chayqa,
18 Jehová Diosniykichistan yuyarinkichis, paypa kallpa qosqanwanmi qankunaqa qhapaq kaykunata tarishankichis.+ Chhaynatan payqa junt’ashan ñaupa taytaykichiskunaman promesa ruwasqanta. Chaytan kunanpas rikushankichis.+
19 ”Kunanmi kayta sut’inta niykichis: Jayk’aqllapas Jehová Diosniykichista saqespa waj dioskunata servinkichis, chaykunaman k’umuykunkichis chayqa, wañunkichispunin.+
20 Ñaupaykichispi nacionkunata chinkachisqanta jinan Jehová Diosqa qankunatapas chinkachisunkichis. Jehová Diosniykichispa siminta mana uyarikusqaykichisraykun chinkachisqa kankichis.+
Uraypi willakuykuna
^ Aceituna aceitetaqa “olivo aceite” nillankutaqmi.
