Efesios 2:1-22
2 Diosmi qankunata kausarichirqasunkichis mana allinkuna ruwasqaykichis jawa juchaykichis jawa ima wañusqa kashaqtiykichis,+
2 chay tiempopin qankunaqa chay mana allinkunapi purisharqankichis kay pachaq* imaynachus kausasqanman jina,+ jinallataq wayraq atiyninta kamachiqpa munayninman jina;+ chay wayraqa mana kasukuqkunata kallpachaq espiritun.+
3 Ñaupa tiempopiqa llapanchispas paykuna jinan aychanchispa munasqanman jina puriq kanchis,+ arí, aychanchispa munasqanman jina, imachus piensasqanchisman jinan puriq kanchis;+ chaymantapas nacesqanchismantapachan lliu runakuna jina Diospa phiñakuyninta chaskinanchispaq jina kasharqanchis.+
4 Diosmi ichaqa ancha khuyapayakuq+ anchatataqmi munakuwanchispas,+
5 chaymi juchanchis jawa wañusqa kashaqtinchis+ Cristowan jujllachawananchispaq kausarichiwarqanchis (qankunaqa Dios ancha sumaq sonqo kasqanraykun salvasqa karqankichis).
6 Chaymantapas Cristo Jesuswan kuskata jatarichiwaspanchismi paywan kuskata janaq pachapi tiyachiwarqanchis, paywan jujllachasqa kasqanchisrayku.+
7 Diosqa chayta ruwarqan noqanchis Cristo Jesuswan jujllachasqa kaqkunaman khuyapayakuq kayninpi mana tukukuq ancha sumaq sonqo kasqanta jamuq tiempopi rikuchiwananchispaqmi.
8 Diospa chhayna ancha sumaq sonqo kayninpin qankunaqa iñisqaykichisrayku salvasqa karqankichis.+ Chaytaqa manan imachus ruwasqaykichisraykuchu chaskirqankichis, aswanpas Diospa regalonmi chayqa.
9 Arí, salvasqa kasqaykichisqa manan imachus ruwasqaykichisraykuchu,+ chhaynapi mana pipas imamantapas alabakunanpaq.
10 Noqanchisqa Diospa makinpa ruwasqanmi kanchis, paymi Cristo Jesuswan jujllachasqa kasqanchisrayku+ allin kaqkunata ruwananchispaq kamawarqanchis,+ ñaupaqmantañan payqa piensarqan chaykuna ruwananchista.
11 Chayrayku qankuna waj nacionkunamanta kaqkuna, yuyariychis imaynas “qhari kayninku qaracha kuchusqa” kaqkunaqa “qhari kayninku qaracha mana kuchusqa kaqkuna” nispa niq kasunkichis chayta.
12 Chay tiempopiqa manan Cristotaqa reqsirqankichischu, Israel llaqtamantapas karupin kasharqankichis, Diospa promesanrayku acuerdo ruwasqankunapas manan qankunapaqchu karqan,+ kay pachapipas mana ima suyakuyniyoq mana Diosniyoq iman kasharqankichis.+
13 Arí, qankunaqa karupin Diosmanta kasharqankichis, kunanmi ichaqa Cristo Jesuswan jujllachasqa kashankichis, paypa yawarninraykutaq Diospa qayllanpi kashankichis.
14 Paymi thaj kayta qowarqanchis;+ iskay grupoman t’aqanasqa kashaqtinchismi t’aqawaqninchis perqata thunispa+ jujllaman tukuchiwarqanchis.+
15 Cuerponwanmi cheqninachiwaqninchis kamachikuy simita lliu kamachikuyninkunantinta chinkachipurqan, chhaynapi iskaynin t’aqata jujllaman* tukuchipunanpaq, iskaynin t’aqata payman jujllachachispa+ allipunachipunanpaqwan.
16 Chaymantapas ñak’arina k’aspipi*+ wañusqanwanmi iskaynin t’aqata Dioswan tukuypi allipunachirqan, chhaynapi juj cuerpollaman tukuchipunanpaq, arí, cuerponwanmi cheqninakuyta chinkachipurqan.+
17 Paymi jamuspa qankuna Diosmanta karupi kashaqkunaman thaj kaymanta allin willakuykunata willarqasunkichis, kaqllatataqmi ruwarqan cercapi kashaqkunawanpas.
18 Payraykun iskaynin t’aqa runakuna kaq espiritullata chaskinchis, chhaynapi Tayta Diosman qayllaykunanchispaq.
19 Chhaynaqa, qankunaqa manañan mana reqsisqa runakunañachu kankichis nitaq waj llaqtayoq runakunañachu kankichispas,+ aswanpas ch’uya kaqkunaq llaqtamasinñan kankichis,+ Diospa familian runakunataqmi kankichispas.+
20 Chaymantapas qankunaqa allin cimentasqa patamanmi perqasqa karqankichis, apostolkuna profetakuna pataman;+ chay perqaq cimentacionninpi esquina jap’iq rumiqa Cristo Jesusmi.+
21 Paywan jujllachasqa kaspan wasiq llapa perqankunaqa allin k’askanasqa sayarishan+ Jehová* Diospa ch’uya templonman tukunankama.+
22 Qankunapas Cristowan jujllachasqa kaspan jatarichisqa kashankichis, chhaynapi espiritunwan Diospa tiyanan wasi kanaykichispaq.+
Uraypi willakuykuna
^ Qhaway Explicasqa simikuna nisqapi “Tiempo, pacha” nisqata.
^ Griego rimaypiqa “juj mosoq runaman” ninmi.
^ Qhaway Explicasqa simikuna nisqapi “Ñak’arina k’aspi” nisqata.
^ Qhaway “Astawan yachanapaq A5” nisqata.
