Esdras 1:1-11
1 Persia nacionmanta rey Ciro+ kamachikuyta qallarisqan watapin, Jehová Diosqa chay reypa sonqonta kuyurichirqan llapa kamachisqan llaqtakunaman juj kamachikuyta willachinanpaq, chhaynapi Jeremiaswan Jehová Diospa willachisqan simikuna junt’akunanpaq.+ Chay kamachikuytaqa qelqapi iman Ciroqa churarqan,+ khaynatan nirqan:
2 “Persia nacionmanta rey Ciron nin: Janaq pacha Jehová Diosmi kay pachapi llaqtakunata kamachinaypaq churawan,+ chaymantapas paymi kamachiwan Judapi tarikuq Jerusalén llaqtapi juj templota ruwapunaypaq.+
3 Chhaynaqa pikunachus paypa llaqtanmanta kaqkuna, Judapi kaq Jerusalén llaqtata richunku, Diosninkutaq paykunawan kachun. Israelpa Diosnin Jehová Diospa wasinta jujmanta jatarichimuchunku, paymi cheqaq Diosqa; paypa wasinqa Jerusalén llaqtapin kasharqan.
4 Pikunachus qhepakuqkunaqa+ ripuq llaqtamasinkuta yanapachunku. Qorita, qolqeta, uywakunata, imankuchus kan chaykunata ima qochunku, qollachunkutaq Jerusalenpi kaq Diospa wasinpaq sonqomanta ofrendankutapas,+ nispa”.
5 Chaymi Judá ayllu familiakunaq umallinkuna, Benjamín ayllu familiakunaq umallinkuna, sacerdotekuna, Leví ayllu runakuna, Diospa kallpachasqan lliu runakunapas alistakurqanku Jerusalenta rinankupaq, chaypi Jehová Diospa wasinta jujmanta jatarichimunankupaq.
6 Llaqtamasinkunaqa* yanaparqankun paykunata. Qorita, qolqeta, uywankuta, imankuchus kan chaykunatan qorqanku, qollarqankutaqmi ancha valorniyoq kaqkunatapas sonqomanta ofrendakunatapas.
7 Chaymantapas rey Ciroqa kamachirqanmi Jehová Diospa wasinmanta orqomusqanku serviciokunata kutichipunankupaq, chay serviciokunatan Nabucodonosorqa Jerusalenmanta apamusqa, jinaspa diosninpa wasinman churasqa.+
8 Persia nacionmanta rey Ciroqa Mitrídates tesoreronpa qhawarisqanmi chay serviciokunata orqochimurqan, jinaspa yupachispa juj listaman churachirqan, chaytataq Mitridatesqa qorqan Judá ayllupi umalli Sesbazarman.*+
9 Listapi churakusqanman jinaqa karqan: kinsa chunka qori canastakuna, waranqa qolqe canastakuna, iskay chunka isqonniyoq waj canastakuna,
10 qorimanta kinsa chunka juch’uy p’ukukuna, qolqemanta tawa pachaj chunkayoq juch’uy p’ukukuna, waranqa serviciokuna ima.
11 Llapanpiqa pisqa waranqa tawa pachaj serviciokunan karqan, chaykunaqa qorimanta qolqemantan karqan. Babiloniaman apasqakuna+ Jerusalenman kutimpushaqtinkun Sesbazarqa llapa chaykunata apapurqan.
Uraypi willakuykuna
^ Chaypiqa “Wasimasinkunaqa” nillanmantaqmi.
