Esdras 3:1-13
3 Qanchis kaq killa+ chayamuqtinmi Israel runakunaqa llapanku juj yuyaylla Jerusalenpi juñukurqanku, chaypaqqa ñan paykunaqa llaqtankupiña kasharqanku.
2 Jehozadacpa churin Jesúa,+ wakin sacerdotekuna, Sealtielpa+ churin Zorobabel+ wayqenkuna iman Israelpa Diosninpa altarninta jujmanta perqarqanku. Diospa kamachin Moisespa chaskisqan kamachikuyman jina+ ruphachina sacrificiokunata jaywanankupaqmi chayta ruwarqanku.
3 Paykunaqa manchakusharqankuña muyuriqninku llaqtakunapi runakunata chaypas+ perqallarqankun chay altarta, maypichus ñaupaqpi karqan chaypin kaqta perqarqanku. Chaymantataq Jehová Diospaq ruphachina sacrificiokunata chaypi jaywayta qallarirqanku; tutamantan sacrificiokunata tardeyaykuy sacrificiokunata iman jaywarqanku.+
4 Chaymantapas kamachikuy qelqapi nisqanman jinan Ch’ujlla Ruway Fiestata ruwarqanku,+ sapa p’unchaymi ruphachina sacrificiokunata jaywarqanku jayk’atachus p’unchaypi jaywananku karqan chayman jina.+
5 Chaykuna qhepamantaq jaywarqanku sapa p’unchay jaywana ruphachina ofrendakunata,+ mosoq killa p’unchay ofrendakunata,+ Jehová Diospaq t’aqasqa fiestakunapi jaywana ofrendakunatawan,+ llapa munaqkunapas jaywallarqankutaqmi Jehová Diospaq tukuy sonqomanta qoy ofrendakunatapas.+
6 Qanchis kaq killapi ñaupaq kaq p’unchaymantapachan+ paykunaqa Jehová Diospaq ruphachina sacrificiokunata jaywayta qallarirqanku. Manaraq Jehová Diospa templonpaq cimentacionta churarqankuchu chaypas jaywallarqankun chay ofrendakunataqa.
7 Chaymantataq rumita ch’eqtaspa llank’aqkunaman,+ maderawan rumiwan llank’aq artesano runakunaman+ ima qolqeta qorqanku. Chaymantapas Sidón runakunaman Tiro runakunaman iman mijunata, ujanata, aceiteta ima qorqanku. Chhaynapi Persia nacionmanta rey Ciroq kamachisqanman jina+ Líbano ladomanta Jope+ llaqtakama cedro maderata apamunankupaq, chaytaqa lamar-qochantakaman apamunanku karqan.
8 Jerusalén llaqtapi Diospa wasinman chayamusqankumanta qhepa kaq watapin, iskay kaq killapi Sealtielpa churin Zorobabelqa, Jehozadacpa churin Jesuawan, wakin sacerdotekunawan, Leví runakunawan Jerusalenman kutimpuq+ llapa Israel runakunawan kuska templo jatarichiyta qallarirqanku. Jehová Diospa wasin ruwakusqanta qhawarinankupaqtaq iskay chunka watankumanta wichayman Leví runakunata churarqanku.
9 Chaymi Judapa mirayninmanta Jesuaqa, churinkunawan wayqenkunawan; Cajmielwan churinkunawan ima Diospa wasinta jatarichiypi llank’aqkunata qhawarirqanku. Paykunawan kuskan qhawarillarqankutaq Enadajpa+ miraynin runakunapas wayqenkunapas, chay runakunapas Leví ayllumantan karqanku.
10 Jehová Diospa templonpaq cimentacionta churayta tukuqtinkun,+ sacerdotekunaqa sacerdote p’achankuwan p’achakuspa trompetantinkama+ chaypi kasharqanku, Leví ayllumanta Asafpa churinkunataq platillontinkama chaypi kasharqanku. Chaymantataq paykunaqa Israel llaqtapi ñaupa rey Davidpa kamachikusqanman jina sayarirqanku Jehová Diosta jatunchanankupaq.+
11 Jinaspa Jehová Diosman t’aqa-t’aqapi takiyta qallarirqanku,+ payta jatunchaspa graciasta qospa iman takirqanku: “Payqa sumaq sonqo Diosmi; Israel llaqtanpaq mana tukukuq munakuyninqa* wiñay-wiñaypaqmi”,+ nispa. Chaymantataq Jehová Diospa wasinpa cimentacionnin churasqaña kasqanrayku llaqtantin runakuna alto kunkawan Jehová Diosta jatunchayta qallarirqanku.
12 Ñaupaq templota rikuq+ kuraq sacerdotekuna, Leví runakuna, familiakunaq umallinkuna iman temploq cimentacionnin churasqa kasqanta rikuspanku fuerteta waqayta qallarirqanku. Jujkunan ichaqa kusikuymanta tukuy kallpankuwan qaparirqanku.+
13 Chhaynata qaparisqankuwanmi manaña reparakurqanchu mayqenchus waqashan mayqentaqchus kusikuymanta qaparishan chayta. Runakunaqa sinchitapunin qaparisharqanku, karumanraqmi chayqa uyarikurqan.
Uraypi willakuykuna
^ Qhaway Explicasqa simikuna nisqapi “Mana tukukuq munakuy” nisqata.
