Esdras 5:1-17
5 Profeta Ageowan,+ Idopa+ nieton profeta Zacariaspiwanmi+ Judapi kashaq judío runakunata Jerusalenpi kashaq runakunatawan rimapayarqanku, Israelpa Diosninpa sutinpin* paykunaqa rimapayarqanku.
2 Chayta uyarispan Sealtielpa churin Zorobabelqa+ Jehozadacpa churin Jesuapiwan+ jujmanta Jerusalenpi Diospa wasinta sayarichiyta qallarirqanku,+ Diospa profetankunaqa kallpachashallarqankun paykunata.+
3 Chay p’unchaykunapin Éufrates mayuq inti jaykuy ladonpi kamachikuq Tatenaiqa, Setar-Bozenaiwan, llank’aqmasinkunapiwan paykunaman rispa nirqanku: “¿Pin qankunata kamachirqasunkichis kay wasita jatarichinaykichispaq, vigakunatapas churanaykichispaq?”, nispa.
4 Tapullarqankutaqmi: “¿Pikunan kay wasi ruwaypi llank’ashanku? Sutinkuta willawayku”, nispa.
5 Diosqa judío runakunaq umalliqninkunawanmi* kasharqan,+ chaymi Tatenaiwan llank’aqmasinkunapiwanqa mana sayachirqankuchu Diospa wasin ruwayta, chaymantapas paykunaqa rey Dariomanmi chaykunata juj cartapi qelqarqanku, jinaspa reymanta juj carta chayamunanta suyarqanku.
6 Kaymi kashan Éufrates mayuq inti jaykuy ladonpi kamachikuq Tatenaiwan, Setar-Bozenaiwan, sullk’a kamachiqmasinkunapiwan rey Darioman qelqasqanku carta.
7 Chay cartapin nirqanku:
“Reyniyku Darío:
”¡Thaj kay qanpaq kachun!
8 Reyniyku, Judá provinciapi jatun Diospa wasintan rirqayku. Chaypin jatun rumikunawan chay wasita jujmanta perqashasqaku. Jinaspapas maderakunawanmi perqankunaman churashanku. Llaqtantin runakuna tukuy kallpankuwan llank’asqankuraykun usqhaylla tukurushanku.
9 Chaymi umalliqninku runakunata tapurqayku: ¿Pin qankunata kamachirqasunkichis kay wasita jatarichinaykichispaq, vigakunatapas churanaykichispaq?,+ nispa.
10 Tapullarqaykutaqmi sutinkuta, chhaynapi pikunachus umallishanku chayta qanman willamunaykupaq.
11 ”Paykunataqmi niwanku: Noqaykuqa janaq pacha kay pacha Diospa kamachinkunan kayku. Israelpi juj jatun reypa unay watakunaña wasi ruwasqantan jujmanta sayarichishayku.+
12 Janaq pacha Diosta ñaupa taytayku phiñachisqankuraykun+ payqa Babilonia nacionmanta Caldea runa rey Nabucodonosorman+ paykunata entregapusqa. Chay reymi kay wasita thunisqa,+ runakunatataq Babilonia llaqtaman apapusqa.+
13 Ichaqa rey Ciro Babilonia llaqtapi kamachikuyta qallarisqan watapin, rey Ciroqa juj leyta orqomurqan Diospa wasin jujmanta sayarichisqa kananpaq.+
14 Jinaspapas rey Ciroqa Babilonia templomantan orqochimurqan Diospa wasinmanta apasqanku qori serviciokunata qolqe serviciokunatawan. Chaykunatan Nabucodonosorqa Jerusalén templomanta orqospa Babilonia temploman apapusqa.+ Chay serviciokunatan qorqanku Sesbazarman,*+ paytaqa Ciron kamachikuqta churarqan.+
15 Sesbazartan Ciroqa nirqan: Kay serviciokunata Jerusalenpi kaq temploman apapuy, Diospa wasintataq maypichus karqan chaypi jatarichinki,+ nispa.
16 Jinan Sesbazarqa Jerusalenman chayamuspa Diospa wasinpa cimentacionninkunata churarqan.+ Chaymantapachan kay wasiqa ruwakushan ichaqa manan tukukunraqchu,+ nispa.
17 ”Chhaynaqa reyniyku, allinpaq qhawarinki chayqa, Babiloniapi kaq valorniyoq cosaskunata waqaychanayki ukhupi qelqakunata maskharichiy, chhaynapi cheqaqtapunichus rey Ciro Jerusalenpi Diospa wasinta wajmanta sayarichinankupaq kamachikurqan icha manachus chayta yachakunanpaq.+ Chaymantapas willarimuwankiku imaninkichus chayta”, nispa.
Uraypi willakuykuna
^ Hebreo rimaypiqa “paykunawan kashaq Israelpa Diosninpa sutinpin” ninmi.
^ Chaypiqa “kuraq runankunawanmi” nillanmantaqmi.
