Esdras 6:1-22
6 Chaymi rey Darioqa maskhachirqan Babiloniapi kaq valorniyoq cosaskuna waqaychana ukhupi qelqakunata.
2 Jinan Media provinciapi, muyuriq perqayoq Ecbátana llaqtapi juj qelqa k’uyuta tarirqanku, chay qelqapin nisqa:
3 “Kamachikuyta qallarisqan watapin rey Ciroqa Jerusalenpi Diospa wasinpaq juj leyta orqomurqan,+ chaypin nirqan: Judío runakuna Diospa wasinpa cimentacionninta churaspa jujmanta chay wasita sayarichichunku, chaypin ofrendakunata jaywanqaku. Chay wasiq altonmi kanqa soqta chunka codo,* anchonpas soqta chunka codon kanqa,+
4 perqantaq kanqa kinsa pata jatun rumiyoq chay pataman maderayoq.+ Chay wasi ruwaypi gastokunaqa reypa cuentanpin kanqa.+
5 Jinaspapas Diospa wasinman kutichipuchunku Nabucodonosorpa apamusqan qori serviciokunata qolqe serviciokunatapas.+ Chay serviciokunataqa Jerusalenpi templomanmi apanqaku, jinaspa maypichus kananman churapunqaku,+ nispa.
6 ”Chaymi noqa rey Darío Éufrates mayuq inti jaykuy ladonpi kamachikuq Tatenaita, Setar-Bozenaita, sullk’a kamachikuqkunatawan+ niykichis: Aman chay llank’aqkunamanqa qayllaykunkichischu.
7 Aman Diospa wasin ruwanankutaqa jark’ankichischu. Judío runakunata kamachiqqa, paykunata umalliqkunapas,* maypichus karqan chaypin jujmanta chay wasita sayarichinqaku.
8 Chaymantapas qankunan chay umalliqkunataqa yanapankichis. Chay wasi ruway ama sayananpaqmi gastokunata usqhaylla pagankichis, chaytaqa pagankichis Éufrates mayuq inti jaykuy ladonmanta reypaq impuestokuna chaskisqaykichismantan.+
9 Jinaspapas Jerusalenpi kaq sacerdotekunamanmi imachus necesitasqankuta sapa p’unchay qonkichis, mana faltaytan chaytaqa qonkichis. Janaq pacha Diosman ruphachina ofrendata jaywanankupaqmi malta torokunata,+ carnerokunata,+ ovejakunatawan+ qonkichis. Qollankichistaqmi trigota,+ kachita,+ vinota,+ aceitetapas.+
10 Chhaynapin paykunaqa mana faltayta jaywanqaku janaq pacha Diospa sonqonman chayaq ofrendakunata, reypaq wawankunapaqpas Diosmantan mañakunqaku.+
11 Chaymantapas kaytan kamachikuni: Pipas kay qelqamusqay kamachikuykunata mana kasukunqachu chayqa, wasinmantan juj k’aspita orqonkichis, jinaspa chay k’aspipi warkunkichis, wasintataq jisp’ana wasiman* tukuchinkichis.
12 Jerusalenpi sutin kananpaq ajllakuq+ Diosmi chinkachinqa mayqen reypas, mayqen llaqtapas kay leyta mana kasukuqtaqa, Diospa wasinta thuniqtapas. Noqa rey Darion chayta kamachikuni. Kay kamachisqayqa kunanpacha ruwakuchun”, nispa.
13 Chaymi Éufrates mayuq inti jaykuy ladonpi kamachikuq Tatenaiwan, Setar-Bozenaiwan,+ kamachikuqmasinkunapiwanqa rey Darioq ley orqomusqanta usqhaylla kasukurqanku.
14 Judío runakunata umalliqkunaqa profeta Ageoq+ rimapayasqanwan, Idopa nieton profeta Zacariaspa+ rimapayasqanwan iman Diospa wasin jatarichiypi llank’ashallarqanku.+ Chaymantataq Israelpa Diosninpa kamachisqanman jina,+ Persia rey Ciroq,+ rey Darioq,+ rey Artajerjespa+ kamachisqankuman jina tukurqanku chay wasi ruwayta.
15 Chay wasi ruwaytaqa tukurqanku adar killapi* kinsa kaq p’unchaypin. Chaypaqqa ñan soqta wataña rey Darioqa kamachikusharqan.
16 Chaymantataq Israel runakunaqa, sacerdotekunapas, Leví runakunapas,+ llapa kutimpuq runakunapas kusisqa chay wasita Diosman entregarqanku.
17 Chay wasi entreganankupaqmi pachaj torokunata, iskay pachaj carnerokunata, tawa pachaj ovejakunatawan Diosman ofrendapi jaywarqanku. Chaymantapas Israel runakunaq juchanku pampachasqa kananpaqmi chunka iskayniyoq cabrakunata jaywarqanku, chaytaqa jaywarqanku Israelpi jayk’a aylluchus kasqankuman jinan.+
18 Chaymantataq Moisespa qelqanpi qelqasqa kasqanman jina+ sacerdotekunata Leví runakunatawan t’aqa-t’aqapi churarqanku+ Diospa wasinpi servinankupaq.
19 Chaymantapas Babiloniaman apasqa kasqankumanta kutimpuqkunaqa ñaupaq kaq killapi chunka tawayoq p’unchaypin Pascua Fiestata ruwarqanku.+
20 Sacerdotekunawan Leví runakunapiwanqa llapankun kuska ch’uyanchakurqanku, chaymi ch’uya kasharqanku.+ Jinan paykuna Pascua Fiesta sacrificiopaq animalta ñak’arqanku. Babiloniamanta kutimpuq runakunapaq, sacerdotemasinkupaq, paykuna kikinkupaq iman chay sacrificiotaqa ñak’arqanku.
21 Chaymantataq Babiloniamanta kutimpuq Israel runakunaqa chay sacrificio jaywasqankumanta mijurqanku. Chaytaqa mijurqanku paykunaman juñukamuq runakunapiwanmi, chay runakunaqa Israelpa Diosnin Jehová Diosta yupaychanankupaqmi waj nacionkunaq millay ruwasqankumanta t’aqakusqaku.+
22 Chaymantapas qanchis p’unchaymi Mana Levadurayoq T’anta Fiestata kusisqa ruwarqanku.+ Paykunaqa Jehová Diospa kusikuy qosqanwan Asiria reywan sumaqta qhawarichisqanwan+ iman kusisqa kasharqanku; chay reypa yanapayninwanmi paykunaqa Diospa wasin ruwayta tukurqanku.
Uraypi willakuykuna
^ Chayqa karqan 26,7 metro jinan. Qhaway “Astawan yachanapaq B14” nisqata.
^ Chaypiqa “kuraq runakunapas” nillanmantaqmi.
^ Chaypiqa yaqapaschá “q’opa wijch’unaman” nillanmantaq.
^ Qhaway “Astawan yachanapaq B15” nisqata.
