Esdras 9:1-15
9 Chaykuna ruwasqayku qhepallatan autoridadkuna asuykamuspa niwarqanku: “Israel runakunaqa, sacerdotekunapas, Leví runakunapas manan kay llaqta runakunamanta t’aqasqachu kashanku, aswanmi paykunaqa chay runakunaq mana allin ruwayninkuta ruwaysikushanku.+ Canaán runakuna, Het runakuna, perizita runakuna, Jebús runakuna, Anmón runakuna, Moab runakuna, Egipto runakuna,+ amorreo runakuna+ jinan mana allin ruwaykunata ruwashanku.
2 Paykunaqa chay llaqta warmikunawanmi casaraykakapunku, wawankutapas chay llaqta warmikunawanmi casaraykuchishanku.+ Kay ch’uya miraytan+ chay llaqta runakunawan chhaqruykapunku.+ Autoridadkunawan kamachikuqkunawanmi ñaupaqtaqa chayta ruwaykunku”, nispa.
3 Chayta uyarispa jinan noqaqa p’achayta llik’ikurqani, chujchaytapas sunkhaytapas t’irakurqani; sinchi llakisqataq tiyaykurqani.
4 Chayllamanmi Israelpa Diosninpa siminta manchakuq runakunaqa muyuriqniyman juñukamurqanku, paykunapas llakisqan kasharqanku Babiloniamanta kutimuq runakunaq juchallikusqankuwan. Noqaqa tardeyaykuyta jak’u ofrenda jaywana horaskaman sinchi llakisqa tiyarqani.+
5 Tardeyaykuyta jak’u ofrenda jaywana horasña kaqtintaq+ tiyasqaymanta sayarirqani. Jinaspa llik’i-llik’i p’achantin Jehová Diosman qonqoriykukurqani, makiyta janaq pachaman jaywarispataq
6 nirqani: “Diosnilláy, may p’enqasqan kashani, manan uyaypas kanchu qanman asuykamunaypaq. Diosnilláy, mana allinkuna ruwasqaykun sinchita askhayaykun, janaq pachamanraqmi juchaykuqa chayashan.+
7 Ñaupa taytaykuq tiemponmantapachan juchallapi kashayku.+ Juchayku jawan noqaykupas, reyniykupas, sacerdoteykupas waj nacionkunaq reyninkuman entregasqa karqayku. Chay reykunan wañuchiwarqanku,+ presotapas apawarqanku;+ paykunan imaymanaykuta qechuwarqanku,+ pisichawarqanku ima. Kunankamapas chhaynan kashan.+
8 Ichaqa Jehová Diosniyku, pisi tiempollapas sumaqtan qhawarishawankiku. Munakuyniykipin kay pisi puchuqkunallatapas preso kasqaykumanta libraspa kay ch’uya jallp’aman* kutichimuwarqankiku.+ Diosniyku, chaywanmi may kusisqa kashayku, chaywanmi esclavo kasqaykumantapas juj chhikanta samarishayku.
9 Diosnillayku, esclavoña karqayku chaypas+ manan saqerpariwarqankikuchu. Persia nacionmanta reykunawanmi sumaqta qhawarichiwarqankiku,+ mana tukukuq munakuyniykitan* rikuchiwarqankiku. Chhaynapin kallpachawarqankiku wasiykiq thunisqa perqankunata jujmanta sayarichinaykupaq.+ Juj jatun qaqa jinan Judapipas Jerusalenpipas pakaykuwarqankiku.
10 ”Kunanri Diosniyku, ¿imanisaqkutaq? Chaykunataña ruwarqanki chaypas kamachikuyniykikunatan mana kasukuykuchu.
11 Chay kamachikuykunatan qanqa serviqniyki profetakunawan willachisqanki, paykunan nisqaku: Jap’ikapunaykichis jallp’api tiyaq runakunaqa qhellin kanku, chaymi chay jallp’aqa qhelli. Paykunaqa millakunapaq kaq ruwaykunatan ruwanku, qhelli ruwayninkuqa jallp’antinpin mast’arisqa kashan.+
12 Chaymi ama ususiykichista churinkuwan casarachinkichischu, amataq churiykichistapas ususinkuwanqa casarachinkichischu.+ Aman jayk’aqpas yanapankichischu paykuna thaj kanankupaqqa ni allin kanankupaqpas.+ Chhaynapin qankunaqa kallpasapa llaqta kankichis, jallp’aq sumaq rurusqantapas mijunkichis; chay jallp’atan wawaykichiskunamanpas wiñaypaq herenciata saqenkichis, nispa.
13 Diosniyku, mana allinkuna ruwasqaykuraykun, jatun juchaykuraykun imaymanakunapi tarikurqayku. Qanqa manan mana allinkuna ruwasqaykuman jinachu castigawarqankiku,+ aswanpas kayman kutimpunaykupaqmi yanapawarqankiku.+
14 ¿Chaychu kamachikuyniykikunata jujmanta p’akiykuman? ¿Imaynapitaq sinchi millayta kausaq runakunawanri casarakuykuman?+ Chayta ruwaqtiykuqa sinchita phiñakuspachá wañurachiwankikuman, manañachá pipas kausanmanchu.
15 Israelpa Diosnin Jehová Diosnilláy, chanin Diosmi kanki,+ chhayna kasqaykiraykun wakinniykuqa kunankama kausashaykuraq. Diosniyku, manan uyaykupas kanchu ñaupaykiman jamunaykupaqqa, ichaqa kaypin kashayku kay juchasapa runakunaqa”,+ nispa.
Uraypi willakuykuna
^ Chaypiqa yaqapaschá Jerusalén llaqtamanta templonmantawan rimashan.
^ Qhaway Explicasqa simikuna nisqapi “Mana tukukuq munakuy” nisqata.