Ezequiel 1:1-28
1 Kinsa chunka kaq watapi, tawa kaq killapi, pisqa kaq p’unchaypin Kebar mayuq+ qayllanpi preso apasqa runakunapiwan kasharqani,+ chaypin qonqaylla janaq pacha kicharikurqan, jinaspa Diosmanta rijuriykunata rikurqani.
2 Rey Joaquinpa+ apamusqa kasqanmanta pisqa wata kashaqtinmi, pisqa kaq p’unchaypi
3 sacerdote Buzipa churin Ezequielqa* Jehová Diospa siminta chaskirqan, chaytan chaskirqan Caldea runakunaq jallp’anpi,+ Kebar mayuq qayllanpi. Chaypi kashaqtinmi Jehová Diospa atiynin* payman chayamurqan.+
4 Qhawashaqtiymi wichay ladomanta manchay wayra rijurimurqan,+ lliphipipishaq manchay jatun phuyuntin rayo t’ojaynintin ima;+ lliu muyuriqninpas sinchitan k’anchasqa. Chay lliphipipiy sonqomantan qorintin qolqentin jina k’anchay fuerteta k’anchamushasqa.+
5 Chay ukhupin kashasqa tawa kausashaqkuna,+ paykunaq rijch’ayninqa runakunaq rijch’aynin jinan kasqa.
6 Sapankankun kasqaku tawa uyayoq tawa rafrayoq ima.+
7 Chakinkunaqa rectollan kasqa, chaki pampankupas malta toroq phapatun jinan kasqa. Chaymantapas llusk’ayachisqa cobre jinaraqmi k’anchashasqaku.+
8 Sapanka rafrankuq uranpin runa maki kasqa. Tawantinkun uyayoqkama rafrayoqkama kasqaku.
9 Rafrankunaqa jujwan-jujwan tupanasqan kasqa. Purispaqa mana mayman kutirispan purisqaku, sapankankun ñaupaqllaman purisqaku.+
10 Paykunaq uyankuqa khaynan kasqa: Ñaupaqman uyankun kasqa runaq uyan jina, paña lado uyankutaq leonpa uyan jina,+ lloq’e lado uyankutaq toroq uyan jina,+ qhepaman uyankutaq ankaq+ uyan jina.+
11 Chhaynan chay kausashaqkunaq uyankuqa kasqa. Rafrankunaqa wichayman oqarisqan kasqa. Sapankankuq iskay rafrankun tupanasqa kasqa, iskaytaq cuerponkuta pakasqa.+
12 Sapankankun ñaupaqllaman purisqaku, maymanchus Diospa espiritun apan chaymanmi risqaku.+ Mana mayman kutirispan purisqaku.
13 Chay kausashaqkunaqa raurashaq sansa jinaraqmi k’anchashasqaku, paykunaq chaupinkupitaq k’ancharishaq nina rauray jina ñaupaqman qhepaman purishasqaku, chay nina rauraykunaqa ima jinaraqmi k’anchamushasqaku.+
14 Chay kausashaqkunaqa llifllikiq k’anchay jinaraqmi kayman jaqayman phawasqaku.
15 Chay tawa uyayoq kausashaqkunata qhawashaspaymi rikullarqanitaq pampapi ruedakunata; sapanka kausashaqkunaq ladonpin juj rueda kashasqa.+
16 Chay ruedakunaqa crisólito rumi jinan k’anchasqa, tawantin ruedakunan kaqkamalla kasqaku. Sapanka ruedataq iskay pasanachisqa ruedapas kanman jina kasqa.*
17 Phawaspaqa mana kutirispan may munasqanku ladoman phawasqaku; munasqankuman jinan wichaymanpas, uraymanpas, pañamanpas, lloq’emanpas phawasqaku.
18 Chay ruedakunaqa manchakuy jatunmi kasqa; tawantin ruedakunapitaqmi muyuriqnintinpi ñawikuna kasqa.+
19 Chay kausashaqkuna puririqtinkun ruedakunapas puririllasqakutaq, pampamanta oqarikuqtinkun ruedakunapas oqarikullasqakutaq.+
20 Paykunaqa maymanchus Diospa espiritun apaq chaymanmi purisqaku, maymanchá chay espíritu apan chaymanmi risqaku. Ruedakunapas paykunawan kuskan oqarikusqaku; chay kausashaqkunata apaq espiritun ruedakunatapas apallasqataq.
21 Kausashaqkuna phawariqtinkun ruedakunapas phawarillasqakutaq, kausashaqkuna sayaykuqtinkun ruedakunapas sayaykullasqakutaq, pampamanta oqarikuqtinkupas ruedakunaqa oqarikullasqakutaqmi. Chay kausashaqkunata apaq espiritun ruedakunatapas apallasqataq.
22 Chay kausashaqkunaq umanpitaq imachá kanpas k’ancharishaq jatun p’alta chullunku jina kashasqa, may jatunpunin chayqa kasqa. Chay p’alta chullunku jina kaqqa umankuq altonpin kashasqa.+
23 Chay p’alta chullunkuq uranpin chay kausashaqkunaq rafranqa chimpapura recto kashasqa. Sapankankuq iskay rafrankun kasqa juj ladonkuta pakakunankupaq, iskaytaq kasqa juj kaq ladonkuta pakakunankupaq.
24 Rafrankuq maywikusqanta uyariqtiymi askha unuyoq mayuq rimarisqan jinaraq rimarisqa, tukuy atiyniyoqpa kunkan jinaraqmi rimarisqa.+ Paykuna puririqtinkuqa askha soldadokunaq purisqan jinaraqmi uyarikusqa. Sayaykuqtinkuqa rafrankupas uraykullarqantaqmi.
25 Chay kausashaqkunaq altonpi p’alta chullunku patamantan juj kunka uyarikamurqan. (Paykuna sayaykuqtinkuqa rafrankupas uraykullarqantaqmi).
26 Chay p’alta chullunkuq altonpin imachá kanpas zafiro rumi jina kashasqa,+ chay rumiqa tiyana trono jinan kasqa.+ Chay tronopitaq pichá tiyashasqapas, paypa rijch’ayninqa runaq rijch’aynin jinan kasqa.+
27 Cinturanmanta wichaymanmi qorintin qolqentin jina k’anchay,+ nina k’anchay jina fuerteta k’anchamushasqa, cinturanmanta uraymantaq nina rauray jina kashasqa.+ Muyuriqninpitaq juj k’anchay k’anchamushasqa,
28 chay k’anchayqa paramuqtin rijurimuq k’uychi* jinan kasqa.+ Chhaynan chay k’anchayqa kasqa. Jehová Diospa k’anchaynin jinan kasqa.+ Chayta rikuspan uyanpamanta pampaman kumpakurqani, chayllamanmi juj kunka rimarimurqan.
Uraypi willakuykuna
^ Ezequiel sutiqa “Diosmi kallpachaqqa” ninantan nin.
^ Hebreo rimaypiqa “makin” ninmi.
^ Chay ruedakunaqa yaqapaschá kanman karqan iskay chakanasqa ruedakuna jina.
^ K’uychitaqa “arcoíris” nillankutaqmi.
